Kalaallit Nunaanni ilisimatusarneq

Namminersorlutik Oqartussat ilisimatusarnermut immikkoortortaanut tikilluarit.

Immikkoortortami attaveqarfinnik ineriartortitsinikkut, ataatsimeersuartitsisarnikkut allatigullu ingerlataqarnikkut Kalaallit Nunaanni ilisimatusarfiit nukittorsarneqarput, aamma  ilisimatusarneq pillugu nunatsinni nunanilu tamalaani paasissutissiinikkut.

Aammattaaq immikkoortortap suliassaralugu Naalakkersuisut Inatsisartullu siunnersussallugit, kiisalu Kalaallit Nunaanni Ilisimatusarnermut Siunnersuisoqatigiit aamma ilisimatusarfiit ilisimatusarnissamik pisussaaffillit suleqatigalugit ilisimatusarneq pillugu naalakkersuinikkut ingerlatsinermi suliniuteqarfissanik siunnersuusiornissaq.

Ilisimatusarnermut immikkoortortaq aamma ilisimatusarnermik siuarsaanermut Namminersorlutik Oqartussat immikkoortitaannik aqutsinermut iluaqutaavoq, taakku ilisimatusarluni suliniutinut akuerineqarsimasunut Kalaallit Nunaanni Ilisimatusarnermut Siunnersuisoqatigiinnit agguarneqartarlutik.  Immikkoortitat kalaallit nunaanni ilisimatusarfinnut aamma Naalakkersuisunit toqqarneqartut suliniuteqarfiit iluanni ilisimatusarnikkut suliniutit aallartinnissaannut tapiissuteqartarput.

Aammattaaq immikkoortortaq ilisimatusarneq pillugu ilisimasanik ingerlaavartumik Kalaallit Nunaanni innuttaasunut ingerlatitseqqittarluni.  Taakku saniatigut immikkoortortap saqqummersittarlugit atuagassiaq INUSSUK - Arktisk Forskningsjournal aamma nutaarsiassat Forskningsenheden informerer.

Annertunerusumik paasisaqarniarlutit attavigikkit ilisimatusarnermi ataqatigiissaarisut Najâraq Paniula aamma Sten Lund

Kalaallit Nunaanni ilisimatusarneq

Ilisimatusarnermut tunngasuni Namminersorlutik Oqartussat politikkikkut angunigaat tassaavoq Kalaallit Nunaanni tunngaveqartoq aamma inuiaqatigiinnut kalaallinut iluaqutaasoq ilisimatusarneq siuarsassallugu nukittorsassallugulu.

Immikkoortut uku ilisimatusarnermut siunnersuisarneq ilisimatusarnermullu aningaasaliisarneq pillugit Inatsisartut inatsisaat nr. 5, 29. november 2013-meersumut ilaapput (imm. 2):

  • Ilisimatusarnermi sammineqartut ilisimatusarnerullu annertusarnissaat, taakkununnga ilaalluni ilisimatusarnermik ilinniagaqarneq.
  • Ilisimatusarnermut suliniutip ataqatigiissaarneqarnera pingaarnersiorneqarneralu.
  • Kalaallit Nunaata nunani tamalaani ilisimatusarnikkut suleqatigiinnermut peqataanissaata nukittorsarnissaa.
  • Naalagaaffeqatigiinnerup iluani Kalaallit Nunaata ilisimatusarnikkut suleqatigiinnermi peqataanissaata nukittorsarnissaa.
  • Pisortat namminersortullu ilisimatusarneranni suleqatigiinnerup nukittorsarnissaa
  • Kalaallini inuiaqatigiinni ilisimatusarnikkut angusat nutaaliornerullu annerusumik atorneqalernissaat, tassani ilanngullugu niuernerpalaartumik ingerlatsilernissamut tunngavissaq.
  • Kalaallit ilisimatusarnerat pillugu kikkunnut tamanut annerusumik paasissutissiisarnissaq.