Arlaannaannulluunniit attuumassuteqanngitsumik paasiniaasussanut aningaasaliissutit

Aatsitassanut suliffissuaqarnermullu pilersaarutinut atatillugu arlaannaannulluunniit attuumassuteqanngitsumik paasiniaasussanut aningaasanik tapiissutit

Konto pingaarneq manna aqqutigalugu Naalakkersuisut pitsanngorsaaffigerusuppaat pisortat tusarniaanerannut innuttaasut peqataasarnissaannut periarfissat. Aningaasaliissutit iluini nunatsinni innutaasut, sumiiffinni najugaqartut aamma suleqatigiiffiit misissuinissamut aamma aatsitassanut suliffissuaqarnermullu pilersaarutinut atatillugu immikkut ajornartorsiutaasinnaasut qulaajarniarlugit siunnersortissarsiornissamut kiisalu pilersaarutip inuiaqatigiinnut avatangiisinullu sunniutigisinnaasai pillugit ataatsimiinnissamut aningaasaliiffigitinnissamut qinnuteqarsinnaapput. Nunatsinnittaaq tusagassiorfiit siunertanut assingusunut aningaasaliiffigineqarnissamut qinnuteqarsinnaapput.

Siunertaavoq aningaasani agguagassani aningaasat avatangiisinut tunngasut aamma annerusumik inuiaqatigiinnut tunngasut iluini siunertanut qulaani pineqartunut atorneqartarnissaat.

Aningaasat agguagassat aqqutigalugit qulakkeerniarneqarpoq, sumiiffinni najugaqartut innuttaasullu aatsitassanut suliffissuaqarnermullu pilersaaruteqartut misissuinerit naammassineqarnissaannut imaluunniit ajornartorsiutit ernumassutigisalluunniit erseqqissumik oqaatigiuminaatsut pillugit arlaannaannulluunniit attuumassuteqanngitsunit paasissutissanik pissarsinissamut aningaasaliiffigineqarnissamut qinnuteqarsinnaanerat. Taamatuttaaq aningaasat agguagassat siunertanut sumiiffinni najugaqartut innuttaasullu aatsitassanut suliffissuaqarnermullu pilersaaruteqartut arlaannaannulluunniit attuumassuteqanngitsunit siunnersorneqarnissaannik qulakkeerinnittussanut atorneqarsinnaapput. Soorluttaaq nunatsinni suleqatigiiffiit tusagassiorfiillu nalunaarsorneqarsimasut misissuinerit naammassineqarnissaannut imaluunniit aatsitassanut suliffissuaqarnermullu pilersaarutinut arlaannaannulluunniit attuumassuteqanngitsut paasissutissaataannik pissarsinissamut aningaasaliiffigineqarnissamut qinnuteqarsinnaapput.

Aningaasanik agguagassanik pilersitsinermut siunertarineqarpoq aatsitassanut suliffissuaqarnermullu pilersaarutinut atassutilinnik arlaannaanulluunniit attuumassuteqanngitsumik isornartorsiuisumik oqallinnissap piukkunnaateqartumik nukittorsarneqarnissaa.

Aningaasani agguagassani aningaasat Siulittaasup Naalakkersuisoqarfianit aqunneqassapput, tassa aningaasat agguagassat toqqaannartumik pisortatigut akisussaatitaasup suliffissuaqarnermut, aatsitassaqarnermut avatangiiseqarnermullu tunngasunik suliaqarneraniit immikkoortinniarlugit.

Sukumiinerusumik paasisaqarusuttut Naalakkersuisut Siulittaasuata Naalakkersuisoqarfianut saaffiginnissinnaapput, oqarasuaat: 34 50 00 imaluunniit e-mailikkut: govsec@nanoq.gl

Qinnuteqaammut immersuivissaq