Avatangiisinut aningaasaateqarfik



Avatangiisinut Aningaasaateqarfik sunaava?
Avatangiisinut Aningaasaateqarfik suliniutinut Kalaallit Nunaanni avatangiisinut iluaqutaasussanut tapersiisarpoq.
Inatsisartut Avatangiisinut Aningaasaateqarfimmik pilersitsiniarlutik 2018-imi ukiaanerani aalajangerput. Avatangiisinut Aningaasaateqarfimmit nuna tamakkerlugu avatangiisini pissutsinik pitsannguiniarluni suliat pingaarutillit tapersiiffigineqartarput. Aningaasat suliniutinik nutaanik, mingutsitsinngitsunut allannguiniarnermi siuarsaataasinnaasunik, misileraanermut atorneqartussaapput.

Suut tapiissutissatut qinnuteqaatigineqarsinnaappat?
2021-mi makkua aningaasaliivigineqarnissaannut qinnuteqartoqarsinnaavoq:

  • Eqqagassalerinermik nutarterineq, nunami namminermi eqqagassalerinermi aaqqiissutissanik tunngavissiinissamut atortussanik pisiniarneq aamma sulisunik ilinniartitsineq pillugit kommunimi suliassat. Suliassanut taakkununnga katillugit 3,1 mio. koruunit immikkoortinneqarput.
  • Eqqiluisaarneq eqqakkanillu immikkoortiterinerusalernissaq, atoqqiineq imaluunniit eqqakkanik ataasiakkaanik naggorissaatissanngortitsisarneq pillugit suliniutit. Suliniutinut taakkununnga katillugit 1 mio. koruunit immikkoortinneqarput.
  • Aalisakkanut qassutit/atortut qimaannakkat aamma aalisarfinni piniariartarfinnilu eqqiluitsuutitsinissaq pillugu suliniutit. Suliniutinut taakkununnga katillugit 1 mio. koruunit immikkoortinneqarput.
  • Suliniutit innuttaasuni imaluunniit suliffeqarfinni isumalluutinik eqqumaffiginninnerulluni pissusilersortalernermik malitseqartussat. Suliniutinut taakkununnga katillugit 500.000 koruunit immikkoortinneqarput.

 

2022-mi suut aningaasaliivigineqarnissaat qinnuteqaatigineqarsinnaanersoq ukiup ingerlanerani kingusinnerusukkut nalunaarutigineqassaaq.

Qaqugu qinnuteqassaanga?
Avatangiisinut Aningaasaateqarfik 2022-mi qinnuteqaatinut nutaanut ammaavoq. Ullussaa ukiup ingerlanerani kingusinnerusukkut nalunaarutigineqassaaq.

Kikkut tapiiffigineqarnissamik qinnuteqarsinnaappat?
Avatangiisini suliniutinut aningaasaliissutissat assersuutigalugu kommuninit, inuussutissarsiutinik ingerlataqartunit, atuaqatigiinnit inuinnarnillu qinnuteqaatigineqarsinnaapput.

Aningaasalersueqataanissaq piumasaqaataava?
10.000 koruunit sinnerlugit tapiiffigineqarnissamut qinnuteqaruit, minnerpaamik 25%-inik aningaasaleeqataanissat piumasarineqarpoq. 10.000 koruuninik taakkuluunniit inorlugit tapiiffigineqarnissamik qinnuteqaruit, aningaasaleeqataanissat piumasaqaataanngilaq.

Qanoq tapiiffigineqarnissamut qinnuteqartoqassava?
Avatangiisinut Aningaasaateqarfik pillugu annertunerusut atuakkit aamma qinnuteqarnermi immersugassaq nassaariuk, uani:


Qinnuteqarnermi immersuiffissaq

Nalunaarusiornermi immersuiffissaq

Avatangiisinut Aningaasaateqarfik pillugu Inatsisartut inatsisaat

Avatangiisinut Aningaasaateqarfik Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit allaffissornikkut aqunneqarpoq.
Qinnuteqartup Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit neriorsuummik tigusaqarnissani sioqqullugu aningaasartuutigisimasaanik utertitsinissamut Avatangiisinut Aningaasaateqarfik periarfissaqanngilaq.

Suliniutip Avatangiisinut Aningaasaateqarfiup siunertaanut naammassinneqataanissaa, kiisalu suliniummut nassuiaatit pitsaassusaat, qinnuteqaatit tiguneqartut nalilersorneqarneranni Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup pingaartumik pingaartissavai.
Suliniut naammassippat, aammalu Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik naatsorsuutit ilanngussartaqartut ilanngullugit nalunaarusiamik inaarutaasumik tigusaqarpat akuersissuteqareerpallu, tapiissutissat pissarsiarineqartut tunniunneqassapput. Nalunaarusiornermut immersugassat aalajangersimasoq atorneqassaaq. Nalunaarusiornermut immersugassaq allakkatigut imaluunniit e-mailikkut nassiunneqassaaq kingusinnerpaamik ulloq 31. august 2022.

Paasissutissanik annertunerusunik piniarnermi attaveqarfigineqassaaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik, E-mail: pan@nanoq.gl