Meeqqat, Inuusuttut Ilaqutariillu

Meeqqat ilaqutariillu pillugit politikkit pillugit kiisalu inatsisinik atuutsitsinermut suliassaqarfik pillugit Naalakkersuisut Inatsisartullu aalajangigaat Meeqqanut, Inuussuttunut, Ilaqutariinnut Inatsisillu Atuutsinneqarnerannut Naalakkersuisoqarfiup piviusunngortinniarlugit suliarisarpai.

Meeqqanut, inuusuttunut ilaqutariinnullu suliassaqarfimmi suliassaqarfiup iluani oqartussaaffimmut sinaakkusiussat iluanni suliaqarnermi politikkikkut aalajangikkat naammassineqarnissaat siunertarineqarpoq.  Suliat tassaapput suliassaqarfimmi ineriartornerup misissueqqissaarfigineqarnera, inatsisiliorneq, ilisimasanik pilersitsineq paasissutissiinerlu kiisalu kommuninut inatsisit nassuiarneqarnerinik ikiuineq.  

Meeqqanut, inuusuttunut ilaqutariinnullu suliassaqarfimmi Naalakkersuisoqarfiup makku isumagisarpai:  

  • Meeqqat ilaqutariillu aarlerinartorsiortut persuttaaneq, meeqqat kinguaassiutitigut atornerlugaasarnerat, angerlarsimaffiup avataanut aamma ulloq unnuarlu paaqqinnittarfinnut inissinneqartarnerat pillugit ajornartorsiutaasa pitsaaliorneqarnissaasa isumagineqarnera.
  • Meeravissiartaarnermut meerartaarnermullu atatillugu sulinngiffeqarnernut tunngasunik politikkikkut aalajangiinerit tamaasa isumagineqarnerat.
  • Inunnut innarluutilinnut suliassaqarfimmi inuit innarluutillit pingaarnertut unammilligassaasa ajornartorsiutillu misigisarsinnaasaasa pitsaaliorneqarnerat suliarineqarnerallu.

Taakku saniatigut naalakkersuisoqarfik meeqqanut, inuusuttunut ilaqutariinnullu iluaqutaasussanik suliniutinik ingerlatsillunilu isumaginnittuuvoq.  Meeqqanut, Inuussuttunut, Ilaqutariinnut Inatsisillu Atuutinneqarnerannut Naalakkersuisoqarfiup Isumaginninnermut Aqutsisoqarfiullu, kalaallit qallunaallu suleqatigisat peqatigalugit, meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinnermit innersuussutigineqartut atuutsilernissaat akisussaaffigaat. Kalaallit Nunaanni meeqqat inuusuttullu atugaasa suliniutit 16-it atorlugit pitsanngorsaaviginissaat suleqatigiinnerup siunertaraa.  

Aammattaaq suli atualinngitsut pillugit suliassaqarfimmut inuillu pisinnaatitaaffiinut suliassaqarfimmut naalakkersuisoqarfimmit ineriartortitsinermik inatsisiliornermillu suliassat Naalakkersuisoqarfiup isumagisarai.

Naalakkersuisoqarfiup nunatsinni nunanilu avannarlerni oqartussat suleqatigaat.  Tassani nunat avannarliit Europamilu nunat akornanni ilisimasanik avitseqatigiittoqartarpoq kiisalu FN-ip Meeqqat Pisinnaatitaaffii pillugit Komiteanut aamma FN-ip inunnut innarluutilinnut komiteeanut nalunaarusiortoqartarluni.

Naalakkersuisoqarfiup Meeqqat illersuisuannut, Inuit innarluutillit illersuisuanut aamma Kalaallit Nunaanni Inuit Pisinnaatitaaffii pillugit Siunnersuisoqatigiit pillugit naalakkersuisoqarfimmit suliarineqartussat isumagisarpai, pineqartullu suliffeqarfiupput naalakkersuinikkut arlaannulluunniit attuumassuteqanngitsut. Suliffeqarfiit taakku missingersuusiornermut malitassanut ilaapput.