Nunat Avannarliit Killiit suleqatigiinnerat

Nunat Avannarliit Killiit Siunnersuisoqatigiiffiat Kalaallit Nunaata, Savalimmiut Islandillu akornanni inatsisartuni ingerlatsiviuvoq Nunallu Avannarliit Siunnersuisoqatigiiffianni suleqatigiinnermut attuumassuteqarluni. Taamatuttaaq Nunat Avannarliit Killiit Siunnersuisoqatigiiffiat nunallu avannarliit killiit naalakkersuisuisa akornanni suleqatigiinnissamut isumaqatigiissuteqarpoq, pingaarnerusutigut suleqatigiinnissamut tunngaviliisumik.

Aaqqissugaaneq
Siunnersuisoqatigiiffik 18-inik ilaasortaqarpoq. Nunani ataasiakkaani inatsisartuni partiit nukittussusaat naapertorlugu nunamit ataatsimit ilaasortat arfinillit nunat inatsisartuinit toqqarneqartarput.
Nunat ataasiakkaat aallartitaasa aallartitatut siulittaasussartik toqqartarpaat tamatumalu kingorna taanna Nunat Avannarliit Killiit Siunnersuisoqatigiivisa Siulittaasoqarfianut ilannguttarpoq. Taamaalilluni Siulittaasoqarfik pingasunik ilaasortaqarpoq - nunanit tamanit ilaasortaq ataaseq. Siulittaasoqarfimmi siulittaasuuneq nunat taakku pingasut akornanni paarlakaajaalluni pisarpoq, taamaalilluni ukiut pingasut ingerlanerini nunat tamarmik ukiumik ataatsimik siulittaasuuffeqartarlutik.
Kalaallit Nunaanni Inatsisartunut Siulittaasoq aallartitat siulittaasussaattut toqqarneqartarnera ileqquuvoq.

Nunat Avannarliit Killiit Siunnersuisoqatigiiffiata anguniagai
Nunat Avannarliit Killiit soqutigisaasa suleqatigiissutiginissaat, tassunga ilanngullugu Atlantikup Avannaani isumalluutinik kulturimillu illersuinissaq anguniagaapput. Naalagaaffiit nunallu Naalakkersuisui aqqutigalugit Nunat Avannarliit Killiit soqutigisaasa, tassunga ilanngullugit isumalluutinik aqutsinerup, avatangiisinik illersuinerup il.il. ineriartortinneqarnissaanik tapersersuinissaq siunertaralugu.
Nunat Avannarliit Killiit Siunnersuisoqatigiiffiat tamatuma saniatigut Naalagaaffiit nunallu Naalakkersuisuisa nunanut avannarlernut killernut tunngatillugu suleqatigiinnermik aamma Nunat Avannarliit Siunnersuisoqatigiiffiannik suleqateqarnermik malitseqartitsisarpoq. Nunat Avannarliit Killiit Siunnersuisoqatigiiffiat nunani avannarlerni suleqatigiinnermi nunat avannarliit soqutigisaanut tunngatillugu akunnermiliuttuuvoq. Taamatuttaaq Nunat Avannarliit Killiit Siunnersuisoqatigiiffiat nunat avannarliit killiit suleqatigiiffiisa aamma inuiaat allat nunallu tamalaat akornanni tassungalu ilanngullugu issittumi inatsisartoqarnikkut suleqatigiinnermi suleqatigiiffiit allat akornanni inatsisartoqarnikkut akunnermiliuttuuvoq.

Ataatsimiittarneq
Nunat Avannarliit Killiit Siunnersuisoqatigiivi ukiumut marloriarlutik aalajangersimasumik ataatsimiittarput. Tamanna nalinginnaasumik junimi augustimilu pisarpoq, Siunnersuisooqatigiit immikkut qulequtaqarlutik isumasioqatigiinnerannut ukiumoortumillu ataatsimiinnerit ingerlanneqarnerannut atatillugu. Ataatsimiinnerit isumasioqatigiinnerillu nunat taakku pingasut akornanni paarlakaattumik pisarput.

Ukiumoortumik ataatsimiinneq Siunnersuisoqatigiinni oqartussaaffiit qullersaraat ataatsimeersuarnertullu isigineqarsinnaalluni. Ukiumoortumik ataatsimiinnermi Siunnersuisoqatigiit ilaatigut inassuteqaatinik akuersissuteqarsinnaapput taakkulu tamatuma kingorna nunat pingasuusut inatsisartuinut saqqummiunneqartarlutik. Inassuteqaatit ima ilusilersugaapput inassuteqaatit naammassineqarnissaannut nunat naalakkersuisui inatsisartunit piumaffigineqartarlutik.

Tamatuma saniatigut Siunnersuisoqatigiiffimmi siulittaasoq ukiumut arlaleriarluni napittarpoq. Tamatuma saniatigut Siunnersuisoqatigiit Islandimi, Reykjavikimi nammineerlutik allattoqarfeqarput allattaanermik (generalsekretær) inuttalerneqarsimasumik.

Nunat Avannarliit Killiit Siunnersuisoqatigiiffianni Kalaallit Nunaata peqataanera
Nunani Avannarlerni suleqatigiinnermut Naalakkersuisoq Naalakkersuisut Nunat Avannarliit Killiit Siunnersuisoqatigiivinik oqaloqateqarnissamut akisussaasuuvoq. Nunani Avannarlerni suleqatigiinnermut Naalakkersuisoq Nunat Avannarliit Killiit Siunnersuisoqatigiiffiata allattaaneranut (generalsektretær) Nunat Avannarliit Killiit Siunnersuisoqatigiiffiata inassuteqaataanik Naalakkersuisut malitseqartitsinerat pillugu ukiumoortumik nalunaarusiortarpoq. Nunani Avannarlerni suleqatigiinnermut Naalakkersuisoq ministerillu suleqataasut allat marluk Nunat Avannarliit Siunnersuisoqatigiiffianni isumasioqatigiinnermi ilisimatitseqatigiiffiusumik ataatsimiinnermi Nunat Avannarliit Killiit Siunnersuisoqatigiiffiata Siulittaasoqarfianik naapeqateqartarput.

Nunat Avannarliit Killiit Siunnersuisoqatigiiffianut innersuussissut