Kalaallit Nunaanni ilisimatusarneq

Namminersorlutik Oqartussat ilisimatusarnermik ingerlatsiviat

Namminersorlutik Oqartussat ilisimatusarnermut immikkoortortaanut tikilluarit.
Ilisimatusarnermik immikkoortoqarfiup Namminersorlutik Oqartussat ilisimatusarnikkut anguniagaanik aallussisuuvoq, Nunatsinni issittumilu ilisimatusarnermi suleqatigiinerup nukittorsarnissaa anguniarlugu. Ilisimatusarnerrmik suliaqartut pisortallu akornanni attaveqaqatigiinnerat isumasioqatigiinnerni ataatsimeersuarnernilu aaqqissueqataanermikkut peqataanermikkullu ilanngullugit aallutarisussaavaat.

Nunatsinni Ilisimatusarnermik Siunnersuisoqatigiit, Ilisimatusarnermik suliffeqarfiit saammisaqartut, pilersitsinermik nutaaliornermillu sammisaqartullu attaveqarfigisarneri tunngavigalugit, siunnersuineq sulianillu ingerlatsineq, killiffik sumiinersoq takutinniarlugu sukkullu suliniuteqartoqarsinnaanersoq, Naalakkersuisut Inatsisartullu anguniakkanik politikkikkullu aalajangiinissaminnut tunngavissiuullugit.

Ilisimatusarnermik immikkoortortaqarfik Namminersorlutik Oqartussat Ilisimatusarnerup siuarsarnissaanut aningaasaliissutaanut Ilisimatusarnermi Siunnersuisoqatigiit agguaattagaanut ingerlatseqataasarpoq. Aningaasaliissutit ilisimatusartunut nunatsinni ilisimatusarnermik suliffeqarfinnut attuummassuteqartut ilisimatusarnermik ingerlataqarnissaanut tapiissutaasarput.

Tamatuma saniatigut immikkoortoqarfiup nunatsinni issittumilu ilisimatusarneq tamanut saqqumilaartinneqarnissaa suliarisussaavaa, ilaatigut Inussuk aqqutigalugu nutaarsiassiinikkut atuagassiinikkullu.

Inatsisitigut tunngaviusoq – politikkikkut anguniakkat
Ilisimatusarnermut tunngasuni Namminersorlutik Oqartussat politikkikkut angunigaat tassaavoq Kalaallit Nunaanni tunngaveqartoq aamma inuiaqatigiinnut kalaallinut iluaqutaasoq ilisimatusarneq siuarsassallugu nukittorsassallugulu.

Immikkoortut uku ilisimatusarnermut siunnersuisarneq ilisimatusarnermullu aningaasaliisarneq pillugit Inatsisartut inatsisaat nr. 5, 29. november 2013-meersumut ilaapput (imm. 2):
  • Ilisimatusarnermi sammineqartut ilisimatusarnerullu annertusarnissaat, taakkununnga ilaalluni ilisimatusarnermik ilinniagaqarneq.
  • Ilisimatusarnermut suliniutip ataqatigiissaarneqarnera pingaarnersiorneqarneralu.
  • Kalaallit Nunaata nunani tamalaani ilisimatusarnikkut suleqatigiinnermut peqataanissaata nukittorsarnissaa.
  • Naalagaaffeqatigiinnerup iluani Kalaallit Nunaata ilisimatusarnikkut suleqatigiinnermi peqataanissaata nukittorsarnissaa.
  • Pisortat namminersortullu ilisimatusarneranni suleqatigiinnerup nukittorsarnissaa
  • Kalaallini inuiaqatigiinni ilisimatusarnikkut angusat nutaaliornerullu annerusumik atorneqalernissaat, tassani ilanngullugu niuernerpalaartumik ingerlatsilernissamut tunngavissaq.
  • Kalaallit ilisimatusarnerat pillugu kikkunnut tamanut annerusumik paasissutissiisarnissaq.