Nunalerineq pillugu Siunnersuisoqatigiit Naalakkersuisunut siunnersuisartuupput apeqqutini nunalerinermut tunngasuni
Nunalerineq pillugu siunnersuisoqatigiit suleriaasissaanut malittarisassat takujumallugit una tooruk
Nunalerineq pillugu Siunnersuisoqatigiit suliassanik aalajangersimasunik isumaginnittartuupput, Naalakkersuisuniit isumagisassanngortinneqarsimasunik Naalakkersuisunullu oqaaseqaateqarsinnaallutik Kalaallit Nunaanni nunalerinikkut iluarsaassinerup iluani suliniutit nutaat pillugit. Tamakku saniatigut Siunnersuisoqatigiinnit nunalerinermut tunngasutigut apeqqutit Naalakkersuisuni suliareqqinneqartariaqanngitsut suliarineqartarsinnaapput.
Nunalerineq pillugu Siunnersuisoqatigiit namminerisaminnik suliniuteqarnermikkut Naalakkersuisut kaammattorsinnaavaat nunalerineq pillugu inatsisiliornermi atuuttumi suliniutissanut nutaanut siunnersuusioqqullugit allannguuteqaqqullugilluunniit.
Nunalerineq pillugu Siunnersuisoqatigiit paasissutissanik katersinikkut suliaqarnermikkullu nunalerinerup aningaasaqarnikkut ineriartornera malinnaaffigissavaat. Aammattaaq siunnersuisoqatigiit nunalerinermi tamarmi inuussutissarsiutip aningaasaqarniarnerata ilorraap tungaanut ingerlalernissaa siuarsarniarlugu siunnersuisassapput. Nunalerineq pillugu Siunnersuisoqatigiit Aningaasanut inatsimmi nunalerinermut tapiissutit agguataarnissaannut atorneqarnissaallu pillugit siunnersuuteqarsinnaapput.
Nunalerinermut Siunnersuisoqatigiit paasissutissanik katersinermikkut suliaqarnermikkullu nunalerinermut tunngasutigut ineriartorneq malinnaaffigissavaat.
Naalakkersuisut Nunalerineq pillugu Siunnersuisoqatigiinnik pilersitsissapput, ukuninnga ilaasortalinnik:
1) Siulittaasoq Naalakkersuisunit toqqagaq
2) Ilaasortat marluk Savaatillit Peqatigiit Suleqatigiissut (SPS) toqqagaat
3) Ilaasortat marluk Kommune Kujalliup toqqagai
4) Nunalerinermut Siunnersuisoqarfimmi sulisuni sinniisoq ataaseq
5) Neqi A/S-imit toqqagaq ilaasortaq ataaseq
6) Namminersorlutik Oqartussani Uumasunut nakorsaqarfiata toqqagaa ataaseq.
Siunnersuisoqatigiinni aalajangersimasumik ataatsimeeqataasartut tassaapput soqutigisaqaqatigiit oqartussaasullu makkua: Savaateqarnermut Allaffissornikkut allaffeqarfik SPS-ip ataani inissisimasoq, Nunalerinermut Siunnersuisoqarfik, Savaatilinngorniat atuarfiat, Pinngortitaleriffik, Inuussutissarsiutinut immikkoortortaqarfiup allattoqarfia kiisalu Avatangiisinut Pinngortitanullu Naalakkersuisoqarfik.
Maannakkut Siunnersuisoqatigiinni ukua ilaasortaapput: Siulittaasoq Niels Lund, Frederik Frederiksen, Aqqalooraq Frederiksen, Otto Nielsen, Ole Mølgaard Motzfeldt, Stine Egede Nørbæk, Knud Albrechtsen. Aalajangeeqataasinnaanatik peqataasartut ukuupput: Lajos Zultan (Uumasut nakorsaqarfia) aamma Asiarpa Motzfeldt (Nunalerinermik ilinniarfik).
Siunnersuisoqatigiit siulittaasuat siunnersuisoqatigiit sinnerlugit apeqqutinut nunalerineq pillugu politikkimut sammisumik tamanut ammasumik oqaaseqarsinnaavoq. Suliassat aalajangersimalluinnartut suliarinissaannut Siunnersuisoqatigiit iluminni ataatsimiititaaraliorsinnaapput.
Nunalerineq pillugu Siunnersuisoqatigiit sulinini pillugu ukiumoortumik Naalakkersuisunut nalunaarusiortarput.
Nunalerineq pillugu Siunnersuisoqatigiit Naalakkersuisunit allatseqartinneqarput. Ulluinnarni aqutsisunik pilersitsisoqarnikuuvoq siulittaasumik, siulittaasup tullianik kiisalu Nunalerineq pillugu Siunnersuisoqatigiinni ilaasortanik pingasunik inuttaqartumik.