Immikkoortut qitiutinneqartut

Naalakkersuisut Naalakkersuisooqatigiinnissamik isumaqatigiissutaanni takuneqarsinnaavoq naatitanik, neqinik inuussutissanillu imminut pilersornerput annertusarneqassasoq. Nersutit savallu toqorarneqartartut amerlisarneqassapput. Naalakkersuisunit nunaateqarnerup siuarsarnerani Nunalerineq pillugu Siunnersuisoqatigiit qanimut suleqatigineqassapput.

Nunalerinermi unammilligassaqarpoq, sammisanut arlalinni siumut isigaluni suliniuteqarnissamik pisariaqartitsisumik. Ataani taaneqartut nunaateqarnermi inuussutissarsiornermi ineriartornissamut periarfissaqarnissaq qulakkiissavaat, taakkulu inuussutissarsiortut tunisassiaannik atuisartut pisariaqartitaat malissavaat, sapinngisamillu inuiaqatigiit ineriartornissamik kissaataannut naapertuutissallutik.

  • Inuussutissarsiortut piumassuseqarlersinniarlugit aaqqissuussaanerit pitsaanerusut, taamaaliornikkut nunalerinermi pisortat namminersortullu aningaasaliineranni pisuussutinik naammassisaqarsinnaassutsimillu pitsaanerusumik atuisoqarsinnaalersillugu.
  • Allaffissornikkut ingerlatsinerup pisariillisarnissaa malittarisassanillu piuminarsaanissaq, ilaatigut aqutsinerup pisariillisarneqarneratigut, allaffissornermi qarasaasiakkut aaqqiinerit pitsaanerusut atornerisigut nunalerinermilu naleqquttumik annertussusilinnik malittarisassanik oqilisitsinikkut.
  • Nutaalionermi tunisassianillu ineriartortitsinermi aalajangersimasumik anguniagaqarluni suliniutit ilaatigut SPS-ip inuussutissarsiornermilu siuarsaanermik suliaqartut allat suliffeqarfiillu akornanni pitsaanerusumik suleqatigiilernikkut kiisalu Nunalerinermut Siunnersuisoqarfimmi pisinnaasat ineriartortinneqarnerisa ingerlateqqinneratigut.
  • Siunnersuinermi allaffissornermilu sulianik ilisimasaqarnerup kiisalu pisinnaasanik ineriartortitsinermik suliniuteqarnerup qulakkeernissaa ilaatigut inuussutissarsiortunik iliniartitsinerup ilinniartitseqqittarnerullu qitiutillugit isiginiarneqarnerisigut.
  • Aningaasartuutikillisaanernut suliniutinik ukkataqarnerunissaq,
    soorlu erngup seqerngullu nukinganik annertunerusumik atuinikkut, kiisalu ivikkat (nerukkaatissat) naatinneqartartunik annertusaaneq.

Siunertaavoq unammilligassat inuussutissarsiortut, Savaatillit Peqatigiit Suleqatigiissut (SPS) aamma Nunalerineq pillugu Siunnersuisoqatigiit, qanittumik suleqatigalugit aaqqinniarneqassasut