Kalaallit Nunaanni Aalisarsinnaanermut Akuersissutinik Nakkutilliisoqarfik (KANUAANA)

KANUAANA-p pingaarnertut siunertaraa qularnaassallugu, Kalaallit Nunaanni Namminersorlutik Oqartussat aalisanermi piniarnermilu inatsisaat eqqortinneqarnissaat, tassani ilanngullugit malittarisassat nunat illugiilluni isumaqatigiissuteqarfigisat imaluunniit Kalaallit Nunaata nunat tamat akornanni kattuffiit peqataaffigisai imaluunniit nunat tamat akornanni aalisarneq pillugu ingerlatsinermik isumaqatigiissutit atuutilersinneqartut naapertorlugit.

KANUAANA-p allaffissornikkut toqqaannartumillu aalisarnerup piniarnerullu nakkutigineqarneranni suliassat arlallit isumagisarai. KANUAANA-p pingaarnertut suliassai ilaatigut makkuupput:
  • Nalunaarutit, umiarsuup allattaavii aamma aalisariutiniit tunisinerit tunitsiviillu ataavartumik nakkutigineqarneri
  • Angallatit aalisariutit Kalaallit Nunaata imartaaniittut angallatillu nunatsinneersut imartani nunat tamalaat akornanniittut qaammataasat atorlugit nakkutigineqarneri
  • Aalisarnernit pisassiissutit naatsorsuutaat, kattuffinnut oqartussaqarfinnullu attuumassuteqartunut siammartertarneri. Nalunaarutini, umiarsuup allattaaviini, tulaassinerni tunisinernilu paasissutissat aallaavigalugit naatsorsuutit taakkua suliarineqartarput
  • Sinerissap qanittuani aalisarnermik nakkutilliisunit, avataasiortuni aalisarnermik alapernaarsuisunit kiisalu Arktisk Kommando suleqatigalugu nakkutigineqarneri.
  • Aalisakkanik tunisassiat EU-mut avammut niuerutigineqarneranni Kalaallit Nunaanni pisanik uppernarsaasersuisarneq
  • Umiarsualivissinnermi nakkutilliineq (Port State Control, PSC) aamma unioqqutitsisumik, killilersugaanngitsumik nalunaarutqaranilu aalisarnermik (IUU) akiuiniarneq, kiisalu nunat tamalaat akornanni suleqateqarneq ilaatigut Northwest Atlantic Fisheries Organization (NAFO) aamma North East Atlantic Fisheries Commission (NEAFC).
  • Nunat illugiit isumaqatigiissutaat nakkutilliinermilu suleqatigiinnerit.
Aalisarnermik nakkutilliinermi pingaarnertut tunngavigineqartoq tassaavoq alapernaarsuineq nakkutilliinerlu, aamma taaneqartartoq MCS, tassa imaappoq Monitoring, Control and Surveilance. KANUAANA arlalinnik atortoqarpoq Kalaallit Nunaanni aalisarneq nakkutiginissaannut alapernaannissaanullu.

Aalisarneq killilersugaavoq aalisagaqassutsip atorluarneqarnera nungusaataanngitsumik kiisalu aningaasaqarneq isumannaatsumik ingerlanissaat qularnaarniarlugu. Nungusaataanngitsumik killilersuinerup sunniuteqarfigissavaa pisassiissutit amerlanerusut taamaasillunilu aalisanermik inuussutissarsiorneq aningaasaqarnikkut ingerlalluartoq, immakkut aamma nunakkut. Killilersuineq iluatsinnissaanut piumasaqaataavoq malittarisassanik pitsaasumik eqqortitsineq, taamaasilluni aalisarneq kissaatigisatut ineriartunngippat naalakkersuinermik aqutsinermillu ingerlatsineq eqqarsaatigalugit akuliuttoqarsinnaalluni.

Nakkutilliinermi suliassat kivinniarlugit KANUAANA APNN suleqatigalugu nalunaarsuinermut aaqqissuussamik nutaaliaalluinnartumik atortoqarpoq pasissutissanik qitiusumik katersuivik, taannalu arlalinnik katitigaavoq:
  • angallatinut nalunaarsuiffik
  • inunnut suliffeqarfinnullu nalunaarsuiffik
  • nalunaarutinut nalunaarsuiffik
  • umiarsuup allattaaviinut nalunaarsuiffik
  • tunisinermut nalunaarsuiffik
  • pisassiissutinut nalunaarsuiffik
  • akuersissutinut nalunaarsuiffik
  • Piniarnermut aallaaniarnermullu nalunaarsuiffik
Paasissutissanik qitiusumik katersuiffiup pisinnaanngortippaa paasissutissanik uppernarsaasinnaaneq kiisalu nunatta iluani nunallu tamat akornanni atugassanik naatsorsuutinik assigiinngitsunik suliaqarnermi tunngavissaqarneq. Aalisagaqassuseq naliliiffigineqarneranut aamma TAC pisassiissutillu pillugit siunnersuinermut atatillugu Pinngortitaleriffimmit aalisarnermi paasissutissat ilaatigut atorneqartarput.

Nalunaarutit, pisanik nalunaaruteqartarneq il.il. pillugit ilitsersuutit www.businessingreenland.gl-mi nassaarisinnaavatit Aalisarneq, Aalisarnermik nakkutillineq ataani.