Kalaallit Nunaanni ilisimatusarnissamut akuersissut

Kalaallit Nunaanni ilisimatusarusukkuit taamaaliornissamut akuersissuteqaqqaarnissap piumasaqaataasinnaanera eqqumaffigissavat. Ilaatigut naalakkersuisoqarfinniit arlalinniit akuersissummik pissarseqqaarnissaq piumasaqaataasarpoq. Suliap qaammatit marluk angullugit suliarineqarsinnaanera naatsorsuutigineqassaaq.

Angallatip ilisimatusaatip qinnuteqartullu suminngaanneerneri apeqqutaallutik qinnuteqarneq ingerlassaaq. Ataani periuseq nassuiarneqarpoq:
1. Angallat naalagaaffimmit pigineqarpat
1.1. Angallat qinnuteqartorluunniit kalaaliunngikkaangata qallunaajunngikkaangataluunniit
1.2. Angallat qinnuteqartorluunniit kalaaliugaangata qallunaajugaangattaluunniit
2. Angallat nammineq pigineqarpat

1. Angallat naalagaaffimmit pigineqarpat
1.1. Angallat qinnuteqartorluunniit kalaaliunngilaq qallunaajunaniluunniit
Aalisarnermut, Piniarnermut Nunalerinermullu Naalakkersuisoqarfiup (APNN) angallatit naalagaaffimmit pigineqartut, kalaaliunngitsut qallunaajunngitsulluuunnit Danmarkimi aallartitaqarfimminnut tamanna pillugu saaffiginneqquneqarput.

Danmarkimi nunanut allanut ministereqarfiup Kalaallit Nunaata imartaani angallammik nunamit allameersumik ilisimatusarlutik misissuinissamut qinnuteqaatit suliarisarpai. Qinnuteqaatit ilisimatusarluni misissuinissamut tunngasut tamarmik, angallat qinnuteqartorluunniit kalaaliunngikkaangata qallunaajunngikkaangataluunniit Nunanut Allanut Ministereqarfimmut, nunanut allanut attaveqarfimmut nassiunneqartassapput. Taamaattumik nunanit allanit qinnuteqartoq aallarniutigalugu Danmarkimi nunap nammineq aallartitaqarfianut saaffiginnissaaq. Aallartitaqarfik tamatuma kingorna Nunanut Allanut Ministereqarfimmut saaffiginnissaaq taassumalu kingorna qinnuteqarnissamut immersuiffissaq qinnuteqarniartumut nassiussissaaq. Qinnuteqartup qinnuteqarnermut immersugassaq immersoreerpagu Nunanut Allanut Ministereqarfimmut utertillugu nassiunneqassaaq, tamatumalu kingorna Namminersorlutik Oqartussani Nunanut Allanut Naalakkersuisoqarfimmut immersugaq nassiunneqarumaarluni.

1.2. Angallat qinnuteqartorluunniit kalaaliugaangata qallunaajugaangataluunniit
Imaatigut angallatit ilisimatusaatit kalaaliuppata qallunaajuppataluunniit, matumani angallat ilisimatusartullu kalaaliuppata qallunaajuppataluunniit aallaaviatigut Danmarkimi Nunanut Allanut Ministereqarfik akuliutsinneqarneq ajorpoq. Qinnuteqartoq(tut) Namminersorlutik Oqartussani naalakkersuisoqarfimmut attuumassutilimmut toqqaannartumik saaffiginnissapput. Angallat ilisimatusaat assersuutigalugu imaani miluumasunik, timmissanik aalisakkanillu ilisimatusarnermut atorneqassappat taamaaliornissamut qinnuteqaat APNN-imut nassiunneqassaaq:

Aalisarnermut, Piniarnermut Nunalerinermullu Naalakkersuisoqarfik
APNN@nanoq.gl
Imaneq 1A, 701
3900 Nuuk
Postboks 269

Qallunaat angallataat ilisimatusaat nunani allani imaani ilisimatusarfinniit attartorneqarpat periuseq qulaani nassuiarneqartoq atussanngilaq. Tassunga atatillugu paarlattuanik periuseq angallat qinnuteqartorluunniit kalaaliunngikkaangata qallunaajunngikkaangataluunniit atorneqartartoq innersuunneqarpoq.

2. Angallat nammineq pigineqarpat
Qinnuteqartut Kalaallit qallunaallu ilisimatusaatigalugit angallataatillit, kiisalu angallatit ilisimatusaatit nammineq pigineqartut, qinnuteqaatinut periutsimi atuuttut malillugit, matumani angallat qinnuteqartorluunniit kalaaliuppata qallunaajuppataluunniit qinnuteqaatitik/qinnuteqaatertik Namminersorlutik Oqartussani naalakkersuisoqarfimmut akisussaasumut toqqaannartumik tunniutissavaat. Angallat nunanit allaneersoq, nunanit allamiunit ilisimatusartunik sulisulik nammineq pigineqarpat, umiarsuup ilisimatusaatip aqutsisuata suliffeqarfianit pigineqarluni nunanut allanut attaveqarfimmit akuerineqaqqaarnissaq pisariaqanngilaq.

Paasissutissat amerlanerusut:

Ilisimatusarnissamut akuersissutit

Ilisimatusarnermut Avatangiisinullu Naalakkersuisoqarfiup nittartagaanut innersuunneqarpoq

Qinnuteqarnissamut immersugassat
Kalaallit Nunaanni ungasissumi ilisimasassarsiornissamut Namminersorlutik Oqartussat nittartagaat innersuunneqarpoq:
https://exp.gl/

Tassani ilaatigut uumasut miluumasut, timmissat aalisakkallu pillugit ilisimatusarnissamut qinnuteqarnermut immersugassaq aaneqarsinnaavoq.
https://exp.gl/Permit-Application/Additional-Permits

Kalaallit Nunaanni ungasissumi angalanissaq pillugu nittartagaq aamma alakkarsinnaavat:
https://naalakkersuisut.gl//en/About-government-of-greenland/Travel-activities-in-remote-parts-of-Greenland

Nunanut Allanut Ministereqarfik
Nunanut Allanut Ministereqarfiup Danmarkip, Savalimmiut aamma Kalaallit Nunaata eqqaani imartani nunanit allanit umiarsuit atorlugit imaani ilisimatuassarnissamut qinnuteqaatit kiisalu qallunaat umiarsuaasa nunat allat imartaanni imaani ilisimasassarsiornermut akuersissutinik qinnuteqaataat suliarisarpai. Qinnuteqaatit imaani ilisimatusarnissamut tunngasut Nunanut Allanut Ministeqarfik aqqutigalugu nunanut allanut attaveqartarfimmut nassiunneqassapput.

https://um.dk/da/udenrigspolitik/folkeretten/folkeretten-a/havret/

Periutsimut assigisaanullu tunngasunik apeqqutissaqaruit Nunanut Allanut Ministereqarfik e-mailikkut jthav@um.dk-kkut attavigiuk.

Inatsisit
Aalisarnermi uumassusilinnik misissuinerit misileraallunilu aalisarnerit pillugit piumasaqaatit Aalisarneq pillugu inatsisartut inatsisaanni nr. 18, 31. oktober 1996-imeersumi kapitali 9-mi nassuiarneqarput.
Inatsisit attuumassutillit Kalaallit Nunaanni atuuttut tamarmik http://inatsisit.gl/-imi atuarneqarsinnaapput.

Attaveqarfissaq
Kalaallit Nunaata imartaani ilisimasassarsiornermut kiisalu miluumasunik, timmissanik aalisakkanillu ilisimatusarnermut tunngasunik apeqqutissaqaruit Aalisarnermut, Piniarnermut Nunalerinermullu Naalakkersuisoqarfik e-mailikkut apnn@nanoq.gl-ikkut attavigiuk.