Aalisarneq pillugu Ataatsimiititaliarsuaq


Aalisarneq pillugu Inatsisartut inatsisissaat nutaaq ukiuni arlalinni suliarineqarnikuuvoq. Siumut, Atassutip aamma Nunatta Qitornaasa akornanni Naalakkersuisooqatigiinnissamik isumaqatigiissutaat 2. oktobari 2018-imeersoq naapertorlugu aalisarneq pillugu inatsisip naammassineqarnissaa partiit sukumiisumik sulissutiginiarpaat. Tassunga tunngatillugu Aalisarneq pillugu Ataatsimiititaliarsuaq pilersinneqarpoq taannalu aalisarnermi soqutigisaqaqatigiinnik suliniaqatigiiffinnillu ilaasortaqarpoq. Ataatsimiititaliarsuup sulinerani siunertaq pingaarnerpaaq taamaalilluni tassaavoq Aalisarneq pillugu Ataatsimiititaliarsuup aalisarneq pillugu inatsisissamut suliniutissanullu tassunga atasunut allanut aalisarnerup ineriartornissamut periarfissaanut pitsaasumik tapersiisinnaasunik inuiaqatigiillu aalisarnermik pisuussutinillu annertunerpaamik iluaquteqarnissaannut qulakkeerinneqataasinnaasunik inassuteqaateqartoqarnissaa.

Tamatuma malitsigisaanik Aalisarneq pillugu Ataatsimiititaliarsuaq aalisarneq pillugu Inatsisartut inatsisaannik iluarsiinissamik siunnersuuteqartussaavoq, siunnersuullu tamatumunnga inatsisitigut killiliissaaq aamma aalisarneq pillugu immikkoortumut pilersaarummut siunnersuuteqartoqassaaq.

Ataatsimiititaliarsuaq suliani pillugu isumaliutissiissummik kingusinnerpaamik 2020-imi junip naanerani tunniussissaaq, ataatsimiititaliarsuulli pisariaqartippagu piffissaliussaq sivitsorneqarsinnaassaaq. Naalakkersuit kingusinnerpaamik 2020-mi upernaakkut ataatsimiinnermi inatsisissasut siunnersuutivimmik aalajangersimasumik saqqummiisinnaassasut siunertaavoq.