Aalisarneq pillugu nunatsinni nunallu assigiinngitsut akornanni politikki

Aalisarnermut, Piniarnermut Nunalerinermullu tunngasutigut Naalakkersuisut politikkiannut ilaapput Nunatsinni pisuussutit uumassusillit tamarmik

Aalisarnermi politikkimi pingaarnerusutigut aalisakkanik isumalluutinik atuineq aamma piujuaannartitsinissaq ilaapput.

Tamanna ingerlanneqarpoq makkua tunaartaralugit

  • Imminut nammassinnaasumik iluaquteqarnermut tunngatillugu nunatsinni nunallu assigiinngitsut akornanni pisussaaffiit
  • Inuiaqatigiinnut aningaasaqarniarnikkut pissarsinarnerpaamik atuinissaq
  • Naleqquttumik inuutissarsiummut peqqissinartumillu ujartuinermut agguaassineq

Aalisarnermi anguniagaq pingaarneq tassaavoq aalisakkanik isumalluutit sapinngisamik pitsaanerpaamik inuiaqatigiinnit aningaasaqarniarnikkut ataavartumik iluaqutigineqarnissaasa qularnaarneqarnissaa. Pingaartinneqarpoq isumalluutit piujuaannartinneqarnissaat kinguaassiortuarnissaallu, ingerlatsinikkut, aningaasarsiornikkut ingerlatsivinnilu attuumassuteqartuni ukiullu ilaanut naleqqiullu atuilluarnerunissaq.

Pingaarnertut anguniagaq alla tassaavoq pinngortitami aalisakkat pisuussutinik annertunerusumik atuinissap qulakkeernissaa.

Anguniagaq tunaartarineqarpoq isumalluutinik inuutissarsiortunilu aningaasarsiornikkut allanngoriartornernik ataavartumik misissuiuarluni killilersuinernik nutaanik pioreerunilluunniit allanngortitsinissamut siunnersuuteqartarnikkut.

Aammattaaq Naalakkersuisunit pingaartinneqarpoq nunatta annertunerusumik pilersorsinnaaneranut periarfissat misissorneqarnissaat ineriartortinneqarnissaalu. Tamanna inuussutissat avataaniit eqqussukkat pinngitsoorsinnaannginnerinik killilernissaat kissaatigalugu.

Qulaani taaneqartunut ilaavoq sinerissamut qanittumi avataasiortunullu peqqussutit atuuttut pitsaaner­paamik aalisagartassanik imminut nammassinnaasumik tunngaveqarluni iluaquteqarnissamut periarfissii­nissaq. Isumalluutinik iluaquteqarneq pilersaarusiorneqassaaq sinerissamut qanittumi avataasiorlunilu aalisariutinut pigineqartunut, tunisassiorfinni aamma allannguutissanut pilersaarutigineqartunut naleqqut­tuutinneqassallutik.

Aalisarneq pillugu politikki nalinginnaasumik sulineqarlunilu piviusunngortinneqartarnissaa aalisarneq pillugu kattuffiit kiisalu allat susassaqartu tusarniarlugillu isumaqatiginiareerlugit.

Sammisami Naalakkersuisoqarfiup nalilerpaa Nunatta avammut niuerneranit isertitai ukiut 10 - 15-ini tulliuttuni tunngaviatigut allanngungaarnavianngitsoq. Taamalu Nunatta avammut niuernikkut isertittagai pingaarnerusumik aalisarnermeersuussasut.

Nunanut allanut tunngasutigut anguniagaavoq sapinngisamik annertunerpaamik ilisimasaqarnissaq misilittagaqarnissarlu Namminersorlutik Oqartussat soqutigisaasa aalisarnerup killilersuiffigineqarnerani aalisarsinnaanermullu pisinnaatitaaffinni tunngasutigut pitsaanerpaamik periarfissaqarnissaata nunat allat kattuffiini isumaqatigiinniarfiinilu qunarlaarneqarnissaat siunertaralugu.

Ullutsinni Kalaallit Nunaata isumalluutinik uumassusilinnik atuinerata avataaniit alaatsinaanneqarnerata siunissaq qanittoq isigalugu minnerulernissaa ilimagineqanngilaq.