Sukisaarsaatigalugu eqalunniartitsinermut akuersissut

Sukisaarsaatigalugu eqalunniartitsinermut (Salvelinus alpinus) akuersissut inunnut Kalaallit Nunaanni aalajangersimasumik najugaqanngitsunut kisermaassilluni sukisaarsaatigalugu eqalunniartitsilluni aaqqissuinissamut periarfissaalernikuuvoq. Tamanna Sukisaarsaatigalugu aalisartunik aalisartitsinermut akuersissuteqartarneq pillugu Inatsisartut inatsisaat nr. 20, 22. November 2011-meersoq naapertorlugu tunniunneqarsinnaavoq.

Kuunnut sukisaarsaatigalugu aalisarlutik takornarissanut aaqqissuussiffiusunut sukisaarsaatigalugu aalisartut nunanit allaneersut arlallit ataasiakkaalluunniit takkutinnginnissaannik takornariartitsinermi suliffeqarfiit nunani allamiunut sukisaarsaatigalugu aalisarnermik aaqqissuussisartut (nunami allamiunut tassunga atatillugu inuit Danmarkimi najugaqartut aamma pineqarput) akuersissuteqarnikkut qulakkeeriffigineqarput.

Akuersissut isumaqatigiissutaavoq Aalisarnermut, Piniarnermut Nunalerinermullu Naalakkersuisoqarfiup (APNN) aamma suliffeqarfiup akornanni, suliffeqarfimmut takornarissanut sukisaarsaatigalugu eqalunniartitsinissamut tuniniaasinnaanermut pisinnaatitsisoq.

Siunertaanngilaq akuersissut nammineq sukisaarsaatigalugu aalisarnissamut imaluunniit sukisaarsaatigalugu aalisartunik aalisartitsinermi suliffeqarfinnut suleqatigiittunut namminersortunut atorneqarnissaa. Takornarissanut sukisaarsaatigalugu eqalunniartunut taamaallaat tuniniaanissamut atuuppoq, eqalunnullu amerlasuunik pisaqarnissamut taakkulu nerisassatut tuniniagassatut siunertaqarluni atugassaanani. Akuersissummik pigisaqartoq kuummut aalisarsinnaanermut pisinnaatitsissut piumaguni sukisaarsaatigalugu eqalunniartunut ullormut atuuttumik tuniniaqqissinnaavaa imaluunniit akuersissummik pigisaqartup piumasaqarnera naapertorlugu.  

Akuersissuteqartarmi siunertarineqartoq tassaavoq nioqqutissiamik immikkuullarissumik neqeroornissaq, takornarissanut tuniniarneqarsinnaasumik taamalu takornariartitsinermi kaaviiaartitat annertusineqarsin­naaqqullugit, akuerssissummik pigisaqartumut kiisalu sumiiffinni inuiaqatigiinnut saniatigut isertitaqarfigisinnaasumik.

Sumiiffinni nunamiit aalisarluni tulaassiviusumi atorneqartussanik akuersissummik tunniussinissaq siunertaavoq. Akuersissut sumiiffinnut aalajangersimasumik killilikkamut akuersissutaavoq. Sumiiffik akuersissuteqarfiusoq amerlanertigut kuujussaaq, kisianni kangerluup iluani imaluunniit tatsimi kuummut atasumi imaluunniit kuummi tatsimilu ataatsimoortillugit atorneqarsinnaasunngortillugu aamma tunniunneqarsinnaavoq.

Sumiiffimmi najugallit kuummik atuinerat akuersissummik tunniussinermi killiliinngilaq. Tassa imaappoq danskit naalagaaffianni innuttaasut Kalaallit Nunaanni aalajangersimasumik najugaqavissut aamma nunat allat naalagaaffiini Danmarkiunngitsumi innuttaassusillit Kalaallit Nunaanni aalajangersimasumik najugaqartutut ukiunilu marlunni tulleriinni najugaqarsimasut sumiiffimmi akuersissuteqarfiusumi suli aalisarsinnaapput. Sumiiffinni qangali eqalunniartarneq pisarnermisut ingerlaannassaaq.

Sumiiffiit akuersissuteqarfiusut kommunimit toqqagaapput tamannalu pitinnagu tamanut ammasumik tusarniaaffigineqarsimallutik.