Aalisarneq Pillugu Siunnersuisoqatigiit

Aalisarneq pillugu Siunnersuisoqatigiit Kalaallit Nunaanni aalisakkanik killilersuinermut suliniutit nutaat pillugit Naalakkersuisunut oqaaseqaateqarfigisarpaat. Aalisarneq pillugu Siunnersuisoqatigiit aalisarnermik inuussutissarsiuteqartut sinniisuutitaannit katitigaavoq.

Aalisarneq pillugu Siunnersuisoqatigiit Kalaallit Nunaanni aalisarnermi tunngasuni peqqussutit nutaat tamaasa Naalakkersuisunut oqaaseqaateqarfigisarpaat. Siunnersuisoqatigiit nammineerlutik Naalakkersuisut nutaanik inatsisilioqqullugit imaluunniit inatsisit atuutereersut allanngortin­neqar­nissaannut kaammattuisinnaapput. Siunnersuisoqatigiittaaq apeqqutit aalisarnermi pissutsinut tunngasut, Naalakkersuisuni annertunerusumik oqallisigeqqaartariaqanngitsut, sammisinnaavaat. Siunnersuisoqatigiit siulittaasuat siunnersuisoqatigiit sinnerlugit apeqqutinut aalisarnikkut politikkimut sammisunik tamanut ammasumik oqaaseqarsinnaavoq.

Siunnersuisoqatigiit ilaasortat marluk amerlanerusulluunnit akornanni isumaqatigiinngissutit suliarineq ajorpaat. Naalakkersuisut aalisarneq pillugu siunnersuisoqatigiit Inatsisartut aalisarneq pillugu inatsisaat nr. 18, 31. oktober 1996-imeersumi §§ 5, 7, 9, 10, 11, 13, 18, 20, 22, aamma 23-mut tunngatillugu suliassanut siunnersuisoqatigiit tusarniartarpaat.

Aalisarneq pillugu Siunnersuisoqatigiit imatut katitigaavoq: Sulisitsisut Peqatigiiffiat (GA - Grønlands Arbejdsgiverforening) pingasunik sinniisuutitaqarpoq, KNAPK (Kalaallit Nunaanni Aalisartut Piniartullu Kattuffiat) aamma pingasunik sinniisuutitaqartoq.

Taaseqataasinnaanatik peqataasartut ukuupput: Aalisarnermut, Piniarnermut Nunalerinermullu Naalakkersuisoqarfik, Kalaallit Nunaanni Aalisarsinnaanermut Nakkutilliisoqarfik, Pinngor­tita­leriffik, Aningaasaqarnermut Naalakkersuisoqarfik, Nunamut Namminermut, Pinngortitamut Avata­ngii­sinullu Naalakkersuisoqarfik, Inuussutissarsiornermut Suliffeqarnermullu Naalakker­sui­soqarfik, SIK, KANUKOKA aamma NUSUKA (Nunaqavissut Suliffiutillit Kattuffiat). AVATAQ (Pinngortitaq avatangiisillu pillugit peqatigiiffik) ullormut oqaluuserisassani AVATAQ-mut soqutiginartunik imaqaraangat ilaasarpoq taaseqataasinnaanani.

Siulittaasoq GA-mit KNAPK-millu nikittaallutik toqqarneqartarpoq. Siulittaasup tullia kattuffimmit siulittaasuutitaqanngitsumik toqqarneqartarpoq. Siunnersuisoqatigiinnut allattoqarfik Aalisarnermut Naalakkersuisoqarfimmit isumagineqarpoq.

Aalisarneq pillugu Siunnersuisoqatigiit siulittaasuat immikkut ilisimasalinnik Pinngortitalerif­fim­meersunik aammalu Kalaallit Nunaanni Aalisarsinnaanermut Akuersissutinik Nakkutilliisoqarfim­meersunik (KANUAANA) imaluunnit inunnik aalisarneq pillugu siunnersuisoqarfimmi suliarine­qartussanut tunngatillugu immikkut ilisimasalinnik aggersaasinnaavoq.