Aalisarneq Pillugu Siunnersuisoqatigiit

Aalisarneq pillugu Siunnersuisoqatigiit Kalaallit Nunaanni aalisakkanik killilersuinermut suliniutit nutaat pillugit Naalakkersuisunut oqaaseqaateqarfigisarpaat. Aalisarneq pillugu Siunnersuisoqatigiit aalisarnermik inuussutissarsiuteqartut sinniisuutitaannit katitigaavoq.

Aalisarneq pillugu Siunnersuisoqatigiit nammineq kajumissutsiminik Kalaallit Nunaanni aalisarnermi tunngasuni peqqussutit nutaat tamaasa Naalakkersuisunut oqaaseqaateqarfigisarpaat. Siunnersuisoqatigiittaaq apeqqutit aalisarnermi pissutsinut tunngasut, Naalakkersuisuni annertunerusumik oqallisigeqqaartariaqanngitsut, sammisinnaavaat. Siunnersuisoqatigiit siulittaasuat siunnersuisoqatigiit sinnerlugit apeqqutinut aalisarnikkut politikimut sammisunik tamanut ammasumik oqaaseqarsinnaavoq.

Siunnersuisoqatigiit ilaasortat marluk amerlanerusulluunnit akornanni isumaqatigiinngissutit suliarineq ajorpaat. Naalakkersuisut aalisarneq pillugu siunnersuisoqatigiit Inatsisartut aalisarneq pillugu inatsisaat nr. 18, 31. oktober 1996-imeersumi § 5, 7, 9, 10, 11, 13, 18, 20, 22, aamma 23-mut tunngatillugu suliassanut siunnersuisoqatigiit tusarniartarpaat.

Ilaasortat

Aalisarneq pillugu Siunnersuisoqatigiit imatut katitigaavoq: Sulisitsisut Peqatigiiffiat (GE - Grønlands Arbejdsgiverforening) pingasunik sinniisuutitalik, KNAPK (Kalaallit Nunaanni Aalisartut Piniartullu Kattuffiat) aamma pingasunik sinniisuutitaqartoq.

Taaseqataasinnaanatik peqataasartut ukuupput: Aalisarnermut, Piniarnermut Nunalerinermullu Naalakkersuisoqarfik, Kalaallit Nunaanni Aalisarsinnaanermut Nakkutilliisoqarfik, Pinngortitaleriffik, Aningaasaqarnermut Naalakkersuisoqarfik, Nunamut Namminermut, Pinngortitamut Avatangiisinullu Naalakkersuisoqarfik, Inuussutissarsiornermut Suliffeqarnermullu Naalakkersuisoqarfik, SIK aamma NUSUKA (Nunaqavissut Suliffiutillit Kattuffiat). Piujuaannartitsilluni Kalaallit Nunaanni Aalisarneq (SFG), aamma SQAPK (Sinerissap Qanittuani Aalisartut Piniartullu Kattuffiat).

Siulittaasoq GA-mit KNAPK-millu nikittaallutik toqqarneqartarpoq, uffa siulittaasup tullia suliniaqatigiiffimmit siulittaasuutitaqanngitsumit toqqarneqartartoq. Siunnersuisoqatigiinni allatseqarfik Aalisarnermut, Piniarnermut Nunalerinermullu Naalakkersuisoqarfimmi isumagineqarpoq.

Aalisarneq pillugu Siunnersuisoqatigiit siulittaasuat immikkut ilisimasalinnik Pinngortitaleriffimmeersunik aammalu Kalaallit Nunaanni Aalisarsinnaanermut Akuersissutinik Nakkutilliisoqarfimmeersunik (KANUAANA) imaluunnit inunnik Aalisarneq pillugu Siunnersuisoqatigiinni suliarineqartussanut tunngatillugu immikkut ilisimasalinnik aggersaasinnaavoq.

Siunnersuisartoqatigiinnut suleriaaseq