Aalisarneq

Aalisarneq nunatsinni inuussutissarsiutit annersaralugulu pingaarnersaraat. Nunatta imartaani aalisakkat inuiaqatigiinnit pigineqarput. Aalisarneq pillugu inatsimmi taassumalu malitsigisaani inatsisini tunngaveqartumik ingerlatseriaatsit assigiinngitsut aqqutigalugit aalisarnermik inuussutissarsiuteqartunut pisuussutit atugassanngortinneqarput.


Assimik piginnittoq: Royal Greenland

Kalaallit Nunaata imartaani aalisarneq

Kalaallit Nunaata Kitaa Tunullu imartaanni Kalaallit Nunaata aalisarnikkut oqartussaaffigisaa sinerissamiit avammut 200 sømilinik isorartussuseqarpoq. Kalaallit Nunaata aalisarnikkut oqartussaaffigisaa Kitaata Tunullu imartaannut Kujataaniit avammut titarnermik aalisarfimmut aamma Tunumiit avammut aalisarfimmut agguarneqarpoq. Kalaallit Nunaata imartaani inuussutissarsiutigalugu aalisarneq avataasiorluni aalisarnermut aamma sinerissamut qanittumi aalisarnermut agguarneqarpoq, taakku taaneqartarlutik avataasiorluni aamma sinerissamut qanittumi aalisarneq.

Sinerissap qanittuani aalisarneq: Tamanna Kitaata imartaani ingerlanneqarneruvoq, tassa Tunup imartaani pingaaruteqartumik sinerissamut qanittumik niuernerpalaartumik aalisartoqanngimmat ataasiinnarmillu tunitsiveqarluni.

Sinerissap qanittuai umiatsiaaqqanik aamma angallatinik mikinerusunik 75 BRT/120 BT-it inorlugit imartussusilinnut sinerissamiit avammut 3 sømilit tikillugit aalisarneq ingerlanneqartarpoq. Taamaattorli maleruagassanit taakkunannga aalajangersimasunik immikkut aalajangiisoqarsimalluni. Sinerissap qanittuani saarullinniutit saattuarniutillu aamma avataasiorlutik aalisarsinnaapput. Avataani aamma sinerissap qanittuani angallatit angissusii apeqqutaatinnagit uiluinniartoqarsinnaavoq.

Sinerissap qanittuani aalisartut qassusersornerupput ningittagarsornerullutillu aammali qalorsuit atorlugit aalisartoqartarpoq. Sinerissap qanittuani aalisartut umiatsiaaraasarput aamma angallataasarlutik 75 BRT/120 BT-it inorlugit usisinnaasut aammali sumiiffiit ilaanni ukiuunerani sikumit aalisarnerni qimussit qamuteralaallu atorneqartarlutik.

Sinerissap qanittuani annermik qaleralinniarneq, saarullinniarneq, saattuarniarneq nipisanniarnerlu ingerlanneqarput, aammali uiluiit, nataarneq, qeeqqat, eqaluit suluppaakkallu aalisarneqartarlutik.

Avataasiorluni aalisarneq: Sinerissamiit 3 sømilit avataannit 200 sømilit tikillugit avataasiorluni aalisartoqartarpoq. Kitaata Tunullu imartaanni avataasiorlutik aalisartarput. Nunat aalisarnissamik isumaqatigiissutaat naapertorlugit nunat allat imartaanni aalisartoqartarlunilu nunat tamalaat imartaanni pisassiissutinik ikerinnarsiortunik ataatsimoorussanik aalisartoqartarpoq.

Avataasiorluni aalisarnermi annermik raajat, qalerallit, saarulliit, suluppaakkat kiisalu ikerinnarsiortunik soorlu ammassanik, ammassassuarnik avaleraasartuunillu aalisartoqartarpoq.

Imartani allani kalaallit aalisartarnerat

Kalaallit angallataat Savalimmiut, Norgep Ruslandillu imartaanni aalisarsinnaatitaapput. Nunat allat imartaanni aalisartoqarnerani killiulissat aalajangersimasut malinneqartussaapput ukiullu tamaasa isumaqatigiinniartoqarnerani nunat pineqartut Kalaallillu Nunaata akornanni isumaqatigiissutit tamanut iluaqutaasussat aqqutigalugit pisassiissutissat agguataarneqartarput.

Nunat allat imartaanni aalisarsinnaanerup saniatigut Kalaallit Nunaat nunat tamalaat imartaanni Kalaallit Nunaata kujammut kitaaniittumi (NAFO-p imartaani) kiisalu Kalaallit Nunaata kangiata kujammut kangianiittumi (NEAFC-p imartaani) aalisarsinnaatitaavoq.

Pisassiissutit aalisarsinnaanermullu akuersissutit.

Aalisarneq ilaatigut Naalakkersuisunit aalajangersarneqartunik pisassiissutitigut akuersissutitigullu aalajangersaaffigineqartarpoq. Inatsit malillugu akuersissut piginnittunut imaluunniit ingerlatseqatigiiffinnut ataasiakkaanut aalisakkat suut akuersissummit piginnittumit aalisarneqassanersut, angallatit suut atorlugit aamma imartami sumi aalisarneq ingerlanneqassanersoq kiisalu aalisarnermut piumasaqaatit erseqqinnerusut nalunaarutigineqartarput.

Aalisakkat akuersissuteqarfiusut tassaapput aalisakkat tamarmik inuussutissarsiutigalugu aalisarnissamut akuersissummik peqarfiusussat. Aalisakkat akuersissummik peqarfiusussat pillugit nalunaarsugaq Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaannik nr. 8, 8. april 2016-imeersumik aqunneqarput.

Aalisakkanut ataasiakkaanut akuersissutit assigiinngitsut angallatillu assigiinngitsut

 

Piffissami aalajangersimasumi akuersissutit

Piffissami aalajangersimasumi akuersissutit

 

Annerpaamik pisarineqarsinnaasut

Annerpaaffiligaanngitsumik pisarineqarsinnaasut

Annerpaamik pisarineqarsinnaasut

Annerpaaffiligaanngitsumik pisarineqarsinnaasut

 

Angallatit 75 BRT/ 120 BT taannaluunniit sinnerlugu

 

 

Aalisakkat assigiinngitsut raajat minillugit

 

 

Aalisakkat ataatsimoorussamik pisassiissutitallit

 

Raajat

 

 

Angallatit 75 BRT/ 120 BT-nit 6 meterillu sinnerlugit  takissusillit

 

 

Assagiarsuit

 

Raajat qalerallillu

 

 

Angallatit 75 BRT/ 120 BT-mit 6 meterillu ataallugit angissusillit

 

 

Aalisakkat assigiinngitsut tamakkerlugit

 

 

Akuersissutit assigiinngitsut tunniunneqartartut marluupput, tassa piffissamik killiliussalimmut akuersissutit ukiumut ataatsimut atuuttussat piffissamilu killiligaanngitsumut akuersissutit. Akuersissutinut tamanut pisarisinnaasat amerlanerpaaffissalerneqarsinnaapput.

Akuersissutit piffissamik killiligaanngitsut pisassallu amerlanerpaaffigisassaannik akuersissutitaqartut, raajarniarnissamut pisariaqartinneqarput. Qeqertarsuup Tunuani, Uummannami aamma Upernavimmi sinerissamut qanittumi qaleralinniarnermi akuersissutinut apeqqutaasarpoq angallatit takissusia (L.O.A) 6 meteriusoq. Angallatinut 6 meter sinnerlugu angissusilinnut aammalu 19,99 BRT/31,99 BT-nit mikinerusunut piffissami killigaanngitsumik pissassanilli amerlanerpaaffilerneqarsimasunik akuersissuteqarput, angallatinullu 6 meteri inorlugit takissusilinnut piffissami killilimmi akuersissutaallutik ataasiakkaat pisarisinnaasaat amerlassusissaat killiligaanatik (paggatassiissutit).

Aalisarnermut, Piniarnermut Nunalerinermullu Naalakkersuisoqarfiup immikkoortuata Aalisarnermut immikkoortortaqarfiup Kalaallit Nunaata imartaani aalisarfiit aquppaat ingerlallugillu. Kalaallit Nunaanni Aalisarsinnaanermut Akuersissutinik Nakkutilliisoqarfiup (KANUAANA) aalisarnerit nakkutigai misissuiffigisarlugillu.

Aalisarnerit ataasiakkaat, Kalaallit Nunaanni inuussutissarsiutigalugu aalisarnerit, piumasaqaatit aamma aalisarnissanut qinnuteqaatit pillugit annertunerusumik paasisaqarit.