Kalaalimerngit

Aalisarnermut Piniarnermullu Naalakkersuisoqarfiup (APN-ip) pingaartitaasa ilagaat annertunerusumik kalaaliminertornerulernissarput.

Nunarput amerlaqisunik pisuussuteqarpoq, assigiinngiiaaqisunik pitsaanerusumik annertunerungaartumik atorluarnerusariaqakkagut, aammalu sumiiffinnut siammasinnerusumik siammarternerusariaqakkagut. Naalakkersuisooqatigiinnissamut isumaqatigiissummi pingaartinneqarpoq inuussutissa­tigut imminut pilersornerusinnaanerup misissornissaa ineriartortinnissaalu, inuussutissanik avataanit pilersorneqarneq killilersimaarniarlugu.

Pisuussutit isumalluutigut assigiinngiiaaqaat aamma annertoqaat nerisassianik imarmiuneersut, timmissat, miluumasut imarmiunit nunamiutallu kiisalu naasorissaanermit nioqqutissiat. Nioqqutissiat tamatigoortut peqqinnartumillu nerisaqarfigisinnaasagut.

Tassalu siunertaavoq kalaallit nerisassiaataasa amerlanerpaat innuttaasunut amerlanerpaanut pissarsiarineqarsinnaasunngortinnissaat. Nammineq nerisassiaatigut ukkatarineqarnerulertariaqarput, taamalu piumaneqarnerinik qaffassaasoqarluni.

Naalakkersuisut erseqqissarnikuuvaat immitsinnut pilersorsinnaanitta annertusaavigineqarnissaata siuarsarneqarnissaanullu periarfissat misissorneqarnissaata pingaaruteqassusia. Tassalu sammisami imminut pilersorsinnaanerup annertusarnissaanut kissaateqarneq tamatigoortumik piviusunngortikkiaar­tuaar­neqartariaqarpoq.

Periarfissaasinnaasut ilagaat pisortat kalaaliminernik atuinerisa annertusarnissaannut periarfissanik ujartuinissaq                      . Ilaatigut anguniagaavoq pisortat suliffeqarfiisa nerisassanut pisiortornerisa nalingat minnerpaamik affaat aalisartut piniartut nunaatillillu tunisassiaannik pisiortornermut atorneqalernissaat.

Naggataatigut tamatta imikkut atuisartutut, kalaallit nerisassiaataannik atuinerunissarput eqqumaffigineru­sariaqarparput. Politikerit pisortallu ingerlatsinerat tassani suliassaat uaniippoq ukkatarineqarnissaat aamma aqqutissiuinissaq kiisalu kalaallit nerisassiaannik atuinerulersin­naa­nissatsinnut aporfiusinnaasunik qaangiiniarnissaq.