Piniarnermut Siunnersuisoqatigiit

Apeqqutinut piniarnermut aallaaniarnermullu tunngasuni Piniarnermut Siunnersuisoqatigiit Naalakkersuisunut siunnersuisoqatigiiupput

Suliassat naliginnaasut
Piniarneq aallaaniarnerlu pillugit Inatsisartut Inatsisaat naapertorlugu Piniarnermut Siunnersui-soqatigiit pilersinneqarput. Inatsimmi § 16 naapertorlugu suliani aalajangersimasuni inatsimmi pineqartuni Naalakkersuisut Piniarnermut Siunnersuisoqatigiinnik tusarniaanissartik pisusaaffigaat. Piniarnermut Siunnersuisoqatigiit suleriaaseq pillugu malittarisassiortussaapput Naalakkersuisunit akuerineqartussamik.

Piniarnermut Siunnersuisoqatigiit siunnersuisartuupput, piniarnerup aallaaniarnerullu iluani ajornartorsiu­taa­sinnaasut ineriartornerlu kiisalu pisuussutit uumassusillit aqunneqarnerat oqaluuserineqartarlutik. Taamaa­silluni siunnersuisoqatigiit suliat piniarnermut aallaaniarnermullu suliniutinut tunngasuusut nammineerlutik suliarisinnaavaat, taamaasillutik tamanna pillugu Naalakkersuisunut oqaaseqaateqarsinnaallutik. Piniar­ner­mut Siunnersuisoqatigiit suleriaasiat naapertorlugu siunnersuisoqatigiit siulittaasuata oqaluuse­rineqartut siunnersuisoqatigiit sinnerlugit avammut oqaaseqarfigisinnaavai.

Piniarnermut Siunnersuisoqatigiit inuttalersorneqarneratigut Kalaallit Nunaanni pisuussutit uumas-susillit ineriartortinnerannut aqunneqarnerannullu siunnersuisoqatigiit immikkut ittumik ilisimasa-qarfiulerput. Piniarnerup aallaaniarnerullu kiisalu pisuussutit uumassusillit aqunneqarnerisa oqaluuserineqarfiinut atatillugu Siunnersuisoqatigiit immikkut ilisimasatik taakku atugassiissutigi-sinnaavaat. Suliassat aalajangersimalluinnartut suliarinissaannut Siunnersuisoqatigiit iluminni ataatsimiititaaraliorsinnaapput.

Katitigaanera
Piniarnermut Siunnersuisoqatigiit pisortaqarfinnit soqutigisaqaqatigiiffinniillu ukunannga ilaasor­taa-tita­qarput: Kalaallit Nunaanni Aalisartut Piniartullu Kattuffiat (KNAPK) marlunnik ilaasortaatita-qartoq, Kalaallit Nunaanni Kommunit Kattuffiat (KANUKOKA) aamma marlunnik kiisalu Tapertaralugu Piniartartut Aalisartartullu Kattuffiat (TPAK) ataatsimik sinniisuutitaqarluni.  Taakkua saniatigut soqutigi­saqaqatigiiffiit pisortaqarfiillu assigiinngitsut aalajangersimasumik ataatsimee-qataatitaqartussanik (taase­qataasinnaanngitsunik) aallartitaqarput. Soorlu aamma Siunnersui-soqatigiinni pisariaqartinneqarpat, taakkua avataatigut inunnik pisortaqarfinnilluunniit Siunner-suisoqatigiit oqaluuserisassaannut immikkut ilisimannittunik ataatsimeeqataatitsisoqarsinnaavoq. Siunnersuisoqatigiit allattoqarfia Aalisarnermut Piniarnermullu Naalakkersuisoqarfimmit isumagineqarpoq.

Piniarneq aallaaniarnerlu pillugit oqaaseqaatit
Piniarneq aallaaniarnerlu pillugit inatsit naapertorlugu suliat §§ 2, imm. 3-4, § 4, § 7, § 8, imm. 1-2 aamma §§ 9-10-mut tunngasut pillugit Naalakkersuisut pisussaaffigigaat Piniarnermut Siunnersuisoqatigiit tusarniassallugit.  

Piniartutut inuussutissarsiup ineriartortinnera
Piniarnermik inuussutissarsiuteqarnerup ineriartortinnissaanut periarfissat pillugit Piniarnermut Siunner­sui­soqatigiit siunnersuuteqarsinnaapput saqqummiussillutillu. Inuussutissarsiutip iluani aningaasaqarnikkut, inooqatigiinnermut kulturikkullu pissutsit pitsaanerpaanngortinnissaat Siunnersuisoqatigiit aallaavigissavaat, Kalaallit Nunaata eqqaani pisuussutit uumassusillit nungusaataanngitsumik atorluarneqarnissaat aallaavi­galugu. Najukkami, nunap immikkoortuani nunamilu tamarmi inuit ataatsimooqatigiillu sapinngisamik amerlanerpaat ineriartornermi iluaquserneqarnissaat nakkutigissallugu Piniarnermut Siunnersuisoqatigiit suliassaraat.

Piniarnermut Siunnersuisoqatigiit paasissutissanik katersinermikkut suliaqarnermikkullu piniarnerup, aallaaniarnerup aammalu pisuussutit uumassusillit aqunneqarnerisa aningaasaqarnikkut ineriar-tornerat malinnaaffigisinnaavaat. Siunnersuisoqatigiit suliaq tamanna nammineerlutik suliarisinnaavaat, imaluunniit suliap aallaartinneqarnissaa inassuteqaatigisinnaallugu. Ilanngullugulu piniarnermut atatillugu ilinniartitsisoqarnissaanik Piniarnermut Siunnersuisoqatigiit siunnersuuteqarsinnaapput.