Namminiilivinneq

Naalakkersuisut 2016-imi oktobarimi Namminiilivinnissamut Naalakkersuisumik toqqaaniarlutik aalajangerput. Suliassaqarfimmut akisussaaffik Namminiilivinnissamut, Pinngortitamut, Avatangiisinut Nunalerinermullu Naalakkersuisoqarfimmut inissinneqarpoq.

2016-2018-imut naalakkersuisooqatigiinnissamut isumaqatigiissummi allassimavoq, “Kalaallit Nunaat allanngortinneqarsinnaanngitsumik namminiivikkiartorpoq aammalu taamatut ingerlaneq naalakkersuinikkut patajaatsumik ingerlatsiviusariaqarpoq, nunalu tamakkerlugu ataatsimoornissaq pisariaqalerluni. Tamanna aallaavigalugu naalakkersuisooqatigiit isumaqatigiipput, qinigaaffiup sinnerani suleqatigiinniarlutik.”

Kalaallit tunngaviusumik inatsisissaannik piareersaaneq Naalakkersuisunit pingaartinneqarpoq. Kisiannili aamma namminiilivinneq allarpassuarnik qulequtaqarpoq, soorlu kulturi aningaasaqarnerlu, taamaattumillu suliassaavoq Namminersorlutik Oqartussani suliassaqarfiit arlallit akimorlugit ingerlanneqartussaq.

Kalaallit Nunaannut tunngaviusumik inatsisissap piareersarneqarnera

Inatsisartut 2016-imi Ukiakkut Ataatsimiinneranni Naalakkersuisunut tunngaviusumik inatsisiliornissamut ataatsimiititaliamik pilersitsinissaat pillugu aalajangiiffigineqarpoq (EM 2016/39). Oqallinneq sioqqullugu Naalakkersuisunit 19. november 2016-imi Kalaallit tunngaviusumik inatsisiliornissamut ataatsimiititaliaannik pilersitsinissaq pillugu nassuiaat tamanut ammasumik saqqummiuppaat. Tamanna pillugu tusagassiorfinnut nalunaarut uani atuarneqarsinnaavoq.

Nassuiaammi tunngaviusumik inatsisiliornissamut ataatsimiititaliamik pilersitsinissaq pillugu Inatsisartuni oqallinnerit tunngavissaqarluarnissaat siunertarineqarpoq. Nassuiaammi tunngaviusumik inatsisiliornissamut ataatsimiititaliap qanoq ililluni pilersinneqarsinnaanera allaaserineqarpoq, aammalu ataatsimiititaliap suliassaanut siunnersuutit allaaserineqarlutik.

Nassuiaat 2011-mi aamma 2015-imi namminersorneq aammalu Kalaallit Nunaanni tunngaviusumik inatsisissamik piareersaanissaq (UKA 2011/61/72 aamma UKA2015/62/111/138) pillugu oqallittoqareernerani suliarineqarpoq.

Namminersulerneq pillugu inatsit 2009-meersoq malillugu ”Kalaallit namminiilernissaat inuiannit kalaallinit aalajangiiffigineqarsinnaavoq.”

Uddeling af kulturprisen
Asseq: Namminersornermut pillugu inatsit tunniunnera, 2009.

Namminiilivinnissamut Naalakkersuisoq Suka K. Frederiksen novemberimi 2016 Savalimmiuni namminiilivinnissamut aqqutissaq pillugu isumassarsiorluni aallarpoq. 

Assimi takuneqarsinnaavoq savalimmiuni Lagmand-i Aksel V. Johannesen issiaqatigaa. Tusagassiutinut nalunaarut uani takuuk.