Nunani Avannarlerni suleqatigiinneq

Kalaallit Nunaata nunani avannarlerni suleqataanera sammisaqarfinni pingasuni aallunneqarpoq: Nunat Avannarliit Siunnersuisoqatigiivini, Nunani Avannarlerni Ministerit Siunnersuisoqatigiivini aammalu Nunat Killiit Avannarliit Siunnersuisoqatigiivini

Naalakkersuisut nunanut allanut politikkiannut ilaavoq nunat avannarliit pillugit politikki, tamanna Nunani Avannarlerni Ministerit Siunnersuisoqatigiivini sulinermut sammivoq Inatsisartunullu tunngatillugu sulineq Nunat Avannarliit Siunnersuisoqatigiivini aammalu Nunat Killiit Avannarliit Siunnersuisoqatigiivini pisarluni.

Naalakkersuisut nunat avannarliit pillugit politikkiat makkunannga tunngavinnik aallaaveqarpoq:

  1. Naalakkersuisut politikkiat nunanut qaninnernut politikkikkut suleqatigiinnermi malunnaataanissaa, nunani avannarlerni suleqatigiinneq pillugu Helsingfors-imi isumaqatigiissummik tunngaveqartoq. (Allagartap uppernarsaatip kalaallisuua perusukkukku NAP@nanoq.gl allaffigissavat)
  2. Naalakkersuisut naalakkersuisutut akisussaassuseqartutut suliassani akueraat, nunani qanittuni politikkikkut tapersiilluarluni suleqatigiinneq pineqartillugu. Tamanna politikkikkut suliamullu tunngatillugu qaffasissuseqartumit eqeersimaartumik peqataanikkut pisassaaq.
  3. Naalakkersuisut nunanik avannarlernik suleqateqarneq nunat assigiinngitsut akornanni kattuffinni suliffeqarfinnilu Kalaallit Nunaata politikkikkut soqutigisaasa ilisimaneqarnerulernissaat anguniarlugu atorusuppaat.
  4. Naalakkersuisut nunanik avannarlernik aammalu kitaata avannaatungaanit suleqateqarnermut atatillugu Kalaallit Nunaanni inatsisartut sinniisuutitaannik eqeersimaartumik suleqateqarniarput, nunani avannarlerni ataatsimoorussamik aalajangiinerni kalaallinut iluaqutissat kalaallillu sunniisinnaanerisa qaffassarnissaat anguniarlugu.

Nittartakkami matumani takuneqarsinnaapput paasissutissat soorlu nunani avannarlerni suleqatigiinnermut tunngavigineqartoq, suliniutit kingulliit pillugit eqqartuinerit, kiisalu ullorsiutit pisussat pillugit paasissutissanik imaalik.