Qeqqata Kommuniani sukisaarsaatigalugu aalisartitsisalernissamut akuersissutinik qinnuteqaqqusineq

Qinnuteqaqqusinermi allakkiaq najoqqutassallu matumani nassaarineqarsinnaapput.

Qeqqata Kommunia kuuit katillugit 16-it atugassiissutiginiarlugit Kommunimut pilersaarummut tapiliussaq nr. 27-imi aalajangerpoq, tassani innuttaasut suliffeqarfiillu eqalunniarluni sukisaarsaatigalugu aalisarnermik neqerooruteqarnissamut kisermaassisussaatitaalluni ingerlatsinissamut akuersissummik qinnuteqarsinnaallutik.

Kuuit 16-it taakkua ingerlatsinissamut akuersissuteqarfittut atugassiissutigineqarnerat, Naalakkersuisut takornariartitsisarnermut suliassaqarfimmi periusissaannut ilaasutut isigineqassaaq, tassani siunertaalluni Kalaallit Nunaanni takornariartitsisarnermik inuussutissarsiornermi namminersortut aningaasaliisarnerisa annertusitinnissaa, taamaalillunilu siunissami siuariartortitsinerup suliffissaqartitsiniarnerullu annertunerulersinnissaat.

Suliniuteqarneq taanna suliassaqarfiit arlallit Naalakkersuisut nunatsinni kommunit suleqatigalugit takornariartitsinermik suliaqarnernut assigiinngitsunut ingerlatsinissamut akuersissuteqarfissatut immikkoortissallugit pilersaaruteqarfigisaasa, siullersaraat.

Qinnuteqaqqusissummut ilanngussanullu apeqqutissaqaruit Inuussutissarsiornermut, Suliffeqarnermut Niuernermullu Naalakkersuisoqarfimmut kingusinnerpaamik 4.februar 2016 attaveqassaatit: isiin@nanoq.gl

Piffissamut pilersaarut:

  • 21.01.2016 Neqeroortitsineq tamanut takusassiarineqassaaq www.naalakkersuisut.gl tusagassiorfiillu allat aqqutigalugit.
  • 04.02. 2016 Piffissaliussaavoq kingulleq qinnuteqartitsinermut tunngatillugu apeqqutinik tigusaqarnissamut.
  • 11.02. 2016 Qinnuteqartitsinermut paasissutissanut tunngatillugu apeqqutit akissutillu kingulliit ullormi tassani nassiunneqarsinnaapput. Akissutit tamarmik www.naalakkersuisut.gl-imi takusassiarineqassapput.
  • 07.03.2016 nal 12.00 Qinnuteqaatit tiguneqarnissaannut piffissaq kingulleq
  • Sap. ak. 10-11 2016 Qinnuteqaatit ataatsimiititaliamit Naalakkersuisut sinniisuinik kommunimilu sinniisunik inuttaqartumit misissorneqassapput.

Qaaqqusinermi allakkiaq: 

Soqutiginnittut matumuuna qaaqquneqarput qinnuteqaammik nassiussaqarnissamut, qaaqqusissut una naapertorlugit. Neqeroortitsinermi atortut makkuupput:

  1. Qinnuteqaqqusilluni qaaqqusinermi allakkiaq 
  2. Kuuit 16it eqaloqarfiusut akuersissuteqarfittut toqqarneqarsimasut nunami assigat 
  3. Kommunimi nunaminertanut atuinissamut ilassutitut pilersaarut nr. 27;
  4. Nunami ammaannartumi qamutinik motorilinnik angalasinnaanermut Qeqqata Kommuniata ileqqoreqqusaa.
  5. Eqalunniarneq pillugu Namminersornerullutik Oqartussat nalunaarutaat nr. 20, 25. august 2005-imeersoq.
  6. Eqalunniartarneq pillugu Qeqqata Kommuniani malittarisassaq.
  7. Sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat nr. 19, 3. december 2012-meersoq.
  8. Sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat nr. 15, 3. juni 2015-imeersoq Inatsisartut inatsisaata nr. 19, 3. december 2012-imeersup allanngortinneqarnera pillugu (Inatsisip atuuffigisaa sukisaarsaatigalugu aalisarnermut akuersissutinut sumiiffikkaanullu pilersaarutinut piginnaatitsissummik ilaqartilerlugu annertusisaaq).
  9. Qinnuteqarnermi immersugassaq

Qinnuteqaatit faxikkut imaluunniit elektroniskimik nassiunneqarsinnaapput, kisianni ataatsikkut aamma allakkatigut  imaluunnit e-mailikkut tammatsaalisatut nassiunneqassallutik. Aamma qinnuteqaqqusilluni allakkiamut ilanngussallu pillugit apeqqutissaqaraanni uunga saaffiginnittoqassaaq:

  • Inuussutissarsiornermut, Suliffeqarnermut Niuernermullu Naalakkersuisoqarfik Imaneq 1A 301 Postboks 1601 3900 Nuuk Telefon: (+299) 34 50 00 / Telefax (+299) 34 63 64 E-mail: isiin@nanoq.gl  

Qinnuteqaammut, Pilersaarusiornermut il.il ikiorneqassagaanni attavissat:

Imaluunniit:

  • Visit Greenland A/S Hans Egedesvej 29 Postboks 1615 3900 Nuuk Telefon (+299) 34 28 20 E-mail: info@greenland.com