Naalakkersuisut periusissiaat

Kalaallit Nunaata uuliasiornermut aatsitassarsiornermullu 2014-imiit 2018-imut periusissaa

Naalakkersuisut inuiaqatigiit kalaallit pigissaarnissaasa atugarissaarnissaasalu qulakkeerneqarnissaat kissaatigaat. Iliuusissat ilaat tassaavoq aatsitassanut suliassaqarfimmi isertitaqalernissamut suliffeqalernissamullu nutaamik periarfissaqalersitsinissaq. Naalakkersuisut siunnerfigaat niuernikkut piujuartitsisumik uuliamik nassaarnissamut periarfissanik siuarsaanissaq.

Piffissami 2014-imiit 2018-imut periusissami inassuteqaatinik piviusunngortitsinissaq alloriarnerusussaavoq annertooq. Matuma allanneqarnerani takuneqarsinnaavoq piffissami 2014-imiit 2018-imut aatsitassarsiorfiit pingasuniit tallimanut amerlatigisut ammarneqarsinnaassasut, aamma naliliisoqarpoq ukioq allortarlugu sinerissap avataani qillerinermik suliaqarnerit ataasiussassasoq imaluunniit marlunnik amerlassuseqartassasut. Periusissami suliniutissat annertussusaat taakkuninnga qulakkeerinneqataassapput, imaluunniit 2018 naatinnagu annertussusissat piviusunngortinneqarnissaat aallaaviussalluni.

Periussissiani aatsitassaqarnermut suliassaqarfiusumi suliassaqarfiillu allat inuiaqatigiinniittut (ilinniartitaaneq, suliffeqarneq, attaveqarneq aamma peqqissutsimut isumaginninnermullu suliassaqarfiit ) pitsaanerpaamik ataqatigiissinneqarnissaat qulakkeerniarlugu suliniuteqarnitta annertusitinnissaanik pisariaqartitsineq tikkuarneqarpoq. Aatsitassanut suliassaqarfiup piujuartussatut ineriartortinneqarneranut tamatta peqataanissarput pingaaruteqartoq Naalakkersuisut isumaqarput.

Kalaallit Nunaata uuliasiornermut aatsitassarsiornermullu 2014-imiit 2018-imut periusissaa atuaruk
Aamma ikummatissamut aatsitassanullu akitsuusersueriaatsit pilluguilanngussat takukkit.

Suliffissaqartitsinermut periusissiaq 2015

Kalaallit Nunaanni inuussutissarsiorneq aamma suliffeqarneq piniarnermit aamma aalisarnermit Namminersorlutillu Oqartussat ingerlatsiviini suliffippassuarniit, siunissami namminersorluni inuussutissarsiornermi, takornariartitsinermi aamma nunami inuussutissarsiorfinni suliffissat nassaassaalersussaapput. Taamaammat Namminersorlutik Oqartussat Kommunillu suliffissaqartitsiniarlutik suliniutaat nunami tamarmi suliffeqartitsinermut siuarsaataasariaqarput.

Suliniutit timitalersorluassagutsigit Suliffissaqartitsinermi periusissiami 2015-imi suliniutit 16-it piviusunngortinnissaannut periarfissat aamma akunnattoorfiusinnaasut misissuataarnissaat pingaaruteqarpoq. Periusissiami apeqqutit neqeroorutissanut aallartisarneqartariaqartunut tunngasut immikkut sammineqassapput, aamma suliniutit nunaqavissunik sulisitsilernissamik siunertaqartut sammineqassallutik. Suliniutini aamma sulisinnaasut piginnaanngorsarneqarnissaannut pisariaqartitsineq, nuttarnerulernissaq aamma pisariinnerusumik sulisussarsiorsinnaaneq allaaserineqarput.

Suliffeqartitsinermut Periusissiaq 2015 uani atuarsinnaavat

Aamma atuagassiaaraq Suliffeqarneq toqqissisimanartoq uani aasinnaavat.

 

Nunami Namminermi takornariartitsinermut Periusissaq 2016-2020

Iliuusissatut anguniakkat nutaat “Takornariartitsinermik Kalaallit Nunaanni ineriartortitsineq: Suut iliuusaasariaqarpat?” atuuttuuvoq piffissamut 2016 – 2020-imut. Naalakkersuisut politikkeraat takornariartitsinermi ineriartortitsinissamut periarfissat annertuut tapersersorneqarnissaat.

 

Sammisaq pingaarneq tassaavoq takornariartitsinerup siuariartornissaanut pisariaqartunik ingerlatsinermut killiliussassanik ineriartortitsineq. Takornariartitsinermik ineriartortitsineq tassaaginnanngilaq ussassaarinissamut aningaasartuutissanik annertuunik missingersuusiorsimaneq, - taamatulli pingaartigaaq nunap iluani attaveqaatit atortulersuutillu pitsanngorsarneqartuarnissaat, aammalu misigisassarsiortitsinerit ineriartortsittuarnissaat.

 

Taamaattumik Naalakkersuisut siullermeersumik aningaasaliissutissanik immikkoortitsipput takornariartitsinerup iluani siammasissumik suliniutinut atorneqartussanik.

 

Iliuusissatut pilersaarutit ukua takornariartitsinerup iluani immikkut suliniutissanik imaqarput, taamalu tunngavissanik imaqarlutik qanoq aaqqissuussinikkut Kalaallit Nunaat takornariartitsinikkut ineriartortitsisinnaanersoq:

 Takornariartitsinermik Kalaallit Nunaanni ineriartortitsineq - Suut iliuusaasariaqarpat?