Danskit-kalaallit inuussutissarsiornikkut suleqatigiinnerulernissaannut innersuussutit 12-it

Kalaallit Nunaanni niuernermi inuussutissarsiutitigut periarfissat pillugit nalunaarusiq erhvervs- og vækstminister Henrik Sass Larsen aamma inuussutissarsiornermut, suliffeqarnermut, niuernermut nunanullu allanut naalakkersuisup Vittus Qujaukitsoq tamanut saqqummiussisut.

Ingammik aatsitassarsiorfiusumi takornariartitsisoqarfimmilu danskini nunatsinnilu suliffeqarfiit akornanni suleqatigiinnerup nukittorsarnissaanut periarfissaqarluarpoq. Kalaallit Nunaanni, ullumikkut aalisarnermik annertuumik aningaasaqarnera tunngaveqartumi ineriartortitsinermik nutaamik, suliffeqarfinnik arlalinnillu sammivilimmik inuussutissarsiornikkut ilutsimik pilersitsinissamut tamanna ilapittuisinnaavoq.

Tamanna nunatsinni aatsitassarsiorfiusumi takornariartitsisoqarfimmilu ineriartortitsinermut neriunartuutaasumik sammiviliisumi nalunaarusiami nutaami takuneqarsinnaavoq. Nalunaarusiami piviusunik innersuussutinik aqqaneq-marlunnik tulleriiaarisoqarpoq, dankini nunatsinnilu suliffeqarfiit akornanni annertunerusumik suleqatigiinnermik, aammalu nunatsinni arlalinnik sammiveqarnerusumik inuussutissarsiornikktu ilutsimik ilapittuisinnaasunik.

Nunatsinni Inuussutissarsiornermut, Suliffeqarnermut, Niuernermut Nunanullu allanut Naalakkersuisoqarfiup aammalu Erhvervs- og Vækstministereqarfiup akornanni suleqatigiinnikkut nalunaarusiaq suliarineqarpoq.

Erhvervs- og Vækstministeri Henrik Sass Larsen:

”Nalunaarusiap innersuussutai aqqaneq-marluk tassaapput Kalaallit Nunaanni arlalinnik sammiveqarnerusumik inuussutissarsiorfinni kulturimik pilersiniarluni suliarisamut aammalu danskini kalaallinilu suliffeqarfiit akornanni annertusisamik suleqatigiinnermut pingaarutilittut ilapittuutaapput.

Suliassaqarfinni, annertunerpaamik neriunartoqartulinni iliuuserisat soorunami sammitinneqartariaqarput. Taamaattumik nalunaarusiakkut periarfissaqarfiunerpaat takornariartitsinerup aamma aatsitassarsiorfiusup iluiniinnerinik erseqqissumik takussutissaqalernerput iluarinartuuvoq.”

Inuussutissarsiornermut, suliffeqarnermut, niuernermut nunanullu allanut naalakkersuisoq Vittus Qujaukitsoq:

”Nalunaarusiap inerniliissutai assut iluarisimaarpakka. Siunissami siuarsarnermik pilersitsinissamut Danmarkip aamma Kalaallit Nunaata ataatsimoorullugu qanoq suliffeqarfitsinnut oqilisaasinnaaneranik erseqqissunik innersuussutinnik saqqummiussivoq”.

Nalunaarusiami innersuussutinit pingaarnersiukkat ilaat:

  • Nunatsinnit inuussutissarsiornikkut suliniutinut akiliisinnaassusilinnut Eksportkreditfondenimit qularnaveeqqutit.
  • Den Nordiske Investeringsbankip ataani issittormiunut taarsigassarsianut sinaakkutissiaq.
  • Asiami niuerfiusumut tunngatillugu kattutsitanik misigisassat sammisanik pilerisaarinerit pillugit VisitDenmarkip aamma VisitGreenlandip akornanni suleqatigiinneq annertusisaq.

Nalunaarusiamut linki.

Nalunaarusiaq pillugu paasissutissartanut linki.

Suliassassat allassimaffiannut linki.

Erhvervs- og Vækstministereqarfimmi inuk attaveqarfissaq:
Pressesekretær Søren Møller Nielsen

Inuussutissarsiornermut, Suliffeqarnermut Niuernermullu Naalakkersuisoqarfimmi inuk attaveqarfissaq:
Naalakkersuisoqarfiup pisortaa Jørn Skov Nielsen