Assartuussineq

Imarsiorneq
Imarsiornermut suliassaqarfik attaveqarnermi tunngavigineqartut ilagaat. Tassani inuiaqatigiinni isorartussutsinit annertuunit aammalu nunami sumiiffinni siammasissunik innuttaqartumit unammilligassat ataqatigiissinnissaat qulakkeerneqartarpoq.

Sunngiffimmi imaatigut angalaneq, aalisarneq imaluunniit nioqqutissanik ilaasunillu assartuussineq pineqaraluarpalluunniit, nunami angalanissaq kissaatigigaanni imaatigut angalanissaq pingaaruteqarpoq. Imarsiornermut suliassaqarfik suli tiguneqanngilaq, taamaattumillu inatsisit Danmarkimit ilusilersorneqartarput, kisiannili Kalaallit Nunaanni pissutsinut naleqqussarneqartarlutik. Suliassaqarfimmi Kalaallit Nunaata aamma Danmarkip paaseqatigiinnissaat ilaatigut Kalaallit Nunaanni Namminersorlutik Oqartussat aamma Danmarkimi Imarsiornermut Aqutsisoqarfiup aallartitaasa akornanni attaveqaqatigiinnermut ataatsimiititaliap ataatsimeeqatigiittarneri pisartut aqqutigalugit ineriartortinneqartarpoq.

RAL
 ”Royal Arctic Linep umiarsuaa ”Naja Arctica” Sisimiuni talinngasoq”

Imarsiornerup isumannaatsuunissaa pillugu qaammarsaaneq
Imarsiornermut suliassaqarfimmi tulleriiaarinermi pingaaruteqartut ilaat tassaavoq imarsiornerup isumannaatsuunissaa. Taamaattumik Attaveqarnermut Allaffeqarfik ukiualuit ingerlanerini qaammarsaanermik ingerlataqarpoq, assigiinngitsunik suliniuteqarnikkut imarsiornerup isumannaatsuunissaa pillugu ilisimasanik siaruarterinissamik siunertaqartumik. Tassani isumannaallisaanissamut atortunullu siunnersuutit arlaliupput, videot radiukkullu saqqummiussat arlaliupput, kiisalu suliniut nutaanerpaaq tassaavoq pinnguaat Piniarneq.

Pinnguaat pingaartumik Kalaallit Nunaannut tulluussagaavoq. Taamaattumik tammoorfik imarsiornerup isumannaatsuunissaa pillugu apeqqutit ilisarnarluinnartuupput. Pinnguarnermi ajugaassaguit aarrit, nannut umimmaallu pisarisariaqarpatit. Kisiannili piniartorsuunissaq naammanngilaq. Angallatit isumannanngitsumik nunamut tikissappat, isumannaallisaanermut atortut eqqortut pigisariaqarpatit.

Imaani isumannaallisaanermik qaammarsaanermi suliniutit tamarmik upalungaarsimanermut ataatsimiititaliarsuup nittartagaanut (link til www.upa.gl) katersorneqarput.

Silaannakkut angallanneq
Silaannakkut angallanneq Kalaallit Nunaanni Attaveqarnermut pingaarutilinnut ilaavoq. Tassani timmisartut qulimiguullillu atorlugit ilaasunik nioqqutissanillu angallassisoqartarpoq. Silaannakkut angalaneq tiguneqarsimanngilaq, taamaattumillu inatsisit Danmarkimit aalajangersarneqartarput, tamatumalu kingorna Kalaallit Nunaanni pissutsinut naleqqussarneqartarlutik. Silaannakkut angallannermi aamma danskit kalaallillu oqartussaasuisa akornanni attaveqaqatigiinnermut ataatsimiititaliaannik pilersitsisoqarsimavoq.

Ammasumik silaannakkut angallannissaq pillugu Kalaallit Nunaat Islandimut isumaqatigiissuteqarpoq. Taamaattumillu nunat siumoortumik akuersissuteqartoqaqqaanngikkaluartoq annertunerusumik imminnut silaannartamikkut timmisartumik qulaavaassinnaapput.

Attartortitsillutik angallassisartut allallu, Kalaallit Nunaanni timmisartuussinissamut akuersissummik pigisaqanngitsut Kalaallit Nunaanni timmisartornissamut minnissamullu akuersissummik qinnuteqaqqaartussaapput. Takornarianik, ilisimasassarsiornermi ilisimatusartunik allarluinnarnilluunniit siunertaqartut tassani pineqarput. Timmisartuussinissamut akuersissummik qinnuteqarusukkuit uunga allassinnaavutit: fly@nanoq.gl
Air Greenland

Nunakkut assartuussineq
Kalaallit Nunaanni sumiiffiit isorartuneri aammalu inukinnera pissutaallutik Kalaallit Nunaanni illoqarfiit akornanni aqqusineqanngilaq. Taamaattumik nuna tamakkerlugu illoqarfiit iluini aqqusernit 160 kilometerit missaannaanniipput. Tamanna pissutigalugu nunakkut assartuussineq imaatigut silaannakkullu assartuussinermut sanilliulluni pingaannginneruvoq. Nunakkut assartuussineq tiguneqarsimanngilaq, taamaattumillu suliassaqarfimmut inatsisit Danmarkimi aalajangersarneqartarput, tamatumalu kingorna Kalaallit Nunaannut atuutsinneqalertarlutik.

Assartuussineq pillugu Isumalioqatigiissitaq
2009-mi ukiakkut Naalakkersuisut assartuussineq pillugu isumalioqatigiissitamik pilersitsivoq. Siunissami qaninnerpaami nunatsinni assartuussinermi unammilligassanut aaqqiissutissanik siunnersuusiornissamut ataatsimiititaliarsuaq suliakkerneqarpoq. Assartuussineq pillugu Isumalioqatigiissitap isumaliutissiissutini 2011-mi apriilimi saqqummiuppaa.

Assartuussineq pillugu Isumalioqatigiissitap isumaliutissiissutaa saqqummiussaalu allat Saqqummersitat ataani nassaarineqarsinnaapput.

Transportkommissionen
Nick Nielsen, Vagn Andersen, Karl Davidsen, Kristian Lennert, Christen Sørensen aamma Susanne Larsen Assartuussineq pillugu Isumalioqatigiissitami ilaasortaapput.