Nalunaarusiartai kalaallisuunngortinneqanngillat, tassa teknikkikkut imai assut paasiuminaammata ilaatigut nutseruminaallutik.

Erngup naqitsineranik ilusiliami umiarsualivimmi eqqaanilu immap qummut killinganut sarfanullu tunngasunik allaaserinnippoq. Ilusiliap siunertaa tassaavoq umiarsualiviup allineqarnera siunissami umiarsualivimmi sarfani pissutsinut qanoq sunniuteqassanersoq nalilersussallugu. Tamatuma saniatigut ilusiliaq umiarsualivimmi sulianut ilaatigullu ikeriissitaartut sinneruttut toqqornerinut atatillugu ikeriissitaartut siaruarnerinik naatsorsuinermut tunngaviussaaq.

Angallanneq pillugu ilusiliami naatsorsuinerit aqquernit allanngortinnerisa aamma angallannerup annertusisup/ annikillisup, umiarsualiviup pilersinneqarnerata tassunga atasut aqqusernit angallannikkut kingunissai nassuiarneqarput. Naatsorsuinernut ilaatigut ilaapput kaajallarissani utaqqisarnerit allallu kingunissat.

Nipiliornerit pillugit nalunaarusiaq maannakkut aamma umiarsualiviup nutaap pilersinneqarnerata ingerlanneqarnerata kinguneranik eqqaaniittumi nipiliornerit allanngornerinik allaaserinnippoq. Maskiinat angisuut assersuutigalugu atorneqarnerisa sanaartornerullu nalaani aqqusinerni ingerlanerit annertusineraniit pisut nipiliornerit sajuppillannerillu nalunaarusiami allaaserineqarlutillu nalilersorneqarput kiisalu umiarsualivimmi ingerlatsinermiit tassungalu tassanngaanniillu biilernerniit nipiliornerit sajuppillatsitsinerillu eqqaaniittunut qanoq annertutigisumik ajoqusiissanersut.

Ikeriissitaartuni pissutsit pillugit nalunaarsuiami sanaartornermi sulinerit eqqaaniittunut ikeriissitaarnernut qanoq sunniuteqarnissaanik allaaserineqarput. Ikeriissitaartunik piiaanermi, immersueqqinnermi ilaatigullu toqqorsinermi tamatigut maangaannartitsisoqartassaaq. Ikeriissitaarnerit tassaapput issoq sananeqaatillu assigiinngitsut mingutsitsisut assersuutigalugu aatsitassat oqimaatsut aamma sananeqaatit avatangiisinut takornartat. Taamaattumik ikeriissitaartunik misiligutissanik tigusisoqarsimavoq, misissoqqissaarneqartunik. Erngup naqitsinera pillugu ilusiliaq iluaqutigalugu tamatuma kingorna sanaartornermi sulinerit eqqaaniittumut immamut qanoq sunniuteqassanersut naatsorsorneqassaaq.

Immap iluani nipiliorneq pillugu nalunaarusiami immap naqqani qaarsumik qaartitsisoqarnera eqqaaniittunut qanoq sunniuteqassanersoq allaaserineqarpoq. Tamatuma saniatigut taamatut qaartitsinerniit sunniutit qanoq annikillisinneqarsinnaanersut allaaserineqarpoq, taamaalilluni sunniutit annertuneroqqunagit.