Umiarsualiviit mittarfiillu

Umiarsualiviit
Kalaallit Nunaanni umiarsualiviit, ikaartarfiit puttasut talittarfiillu katillugit 180-it aamma 200-t akornanni amerlassuseqarput.

Namminersorlutik Oqartussat umiarsualivinnut immikkoortortaata illoqarfinni nunaqarfinnilu umiarsualiveqarfiit tamangajammik aserfallatsaaliorneqarnerat iluarsaanneqartarnerallu isumagisaraa.

Tssalu aalisarnermik, ilaasunik angallassinermik nassiussanillu angallassinermik inuussutissarsiuteqartut illoqarfinni nunaqarfinnilu aserfallatsaaliukkanik taliffissaqarnissaat aamma umiarsualivinnut immikkoortortap isumagisussaavaa.

Tamatuma saniatigut Namminersorlutik Oqartussat umiarsualivinni qitiusumik, tassalu umiarsualivinnut inatsisinut aammalu umiarsualivinni maleruagassanut oqartussaasuupput. Umiarsualivinni oqartussaaneq siammasissoq illoqarfiit amerlanersaanni Royal Arctic Line-mit isumagineqarpoq. Nunaqarfinni, kiisalu Qeqertarsuarmi Ittoqqortoormiinilu tamanna KNI Pilersuisumit isumagineqarpoq, kiisalu Kangerlussuarmi, Narsarsuarmi Kulusummilu umiarsualivinni oqartussaanerup suliassartaannik Mittarfeqarfiit isumaginnittuuvoq.

Mittarfiit
Kalaallit Nunaanni mittarfiit 13-iupput aammalu qulimiguulinnut mittarfiit 43-uullutik. Kangerlussuarmi nunanit tamalaanit mittarfik mittarfinni annersaavoq, tassungalu nunatsinnut nunatsinniillu ilaasartut amerlanersaat aqqusaartarput.
Kalaallit Nunaanni mittarfiit qulimiguulinnullu mittarfiit Mittarfeqarfinnit ingerlanneqarput. Mittarfeqarfiit pillugit annertunerusumik atuagaqarsinnaavutit