Nuugaatsiami Illorsuarnilu inissianik taartissanik agguaanissamut tunngavissat

Innuttaasut assigiimmik pineqarnissamut tunngavissat malillugit pineqarnissaat, aamma aningaasat pitsaanerpaamik atorneqarnissaat, kiisalu Nuugaatsiami Illorsuarnilu innuttaasut amerlanerpaat iluaquserneqarnissat qulakkeerniarlugu, Naalakkersuisut inissianik taartissanik agguaanissamut tunngavissanik ersarissunik aalajangersaapput.

Naalakkersuisut 7. juni 2018-imi aalajangerput, Nuugaatsiami Illorsuarnilu innuttaasunut inissianik taartissanik agguaanissamut tunngavissat matuma kinguliani aalajangersarneqartut malinneqassasut:

  • Taamaallaat tassaarsuup nalaani innuttaasunut, inuit allattorsimaffianni Nuugaatsiami Illorsuarnilu najugaqartutut nalunaarsorsimasut inissianik taartissanik tunineqassapput.
  • Taamaallaat innuttaasunut, Nuugaatsiap Illorsuillu avataanni inissiamik nammineq pigisamik pioreersumik pigisaqarnikkut inissiamik imminnut pilersornissamut periarfissaqanngitsunut, inissianik taartissanik tunniussisoqassaaq.
  • Nuugaatsiap Illorsuillu avataanni inissiamik nammineq pigisamik pioreersumik pigisaqarnikkut inissiamik imminnut pilersornissamut periarfissalinnut, inoqutigiinnut ataatsinut 50.000 koruuninik taarsiissuteqartoqassaaq.
  • Tassaarsuup nalaani inoqutigiinnut ataasiusunut inissiamik taartissamik ataatsimik tunniussisoqassaaq.
  • Inissiap taartissap tunniunneqartussap angissusissaanut inoqutigiinni inuit amerlassusaat aalajangiisuussapput.
  • Piffissami tassaarsuup pinerata nalaani, inoqutigiit najugarisaanni B- normumut piginnittutut nalunaarsorsimasumut inissiaq tunniunneqassaaq.
  • Tunngaviusumik attartortut inissiamut attartortittakkamut innersuunneqassapput.
  • Inoqutigiit Upernaviup Uummannallu taakkulu eqqaasa avataanni illoqarfimmut annerusumut allamut nuukkusuppata, inissianik attartortittakkanik taartissatut tunniussisoqarsinnaavoq. Attartortoq maleruagassat atuuttut naapertorlugit ineqarnermut akiliisassaaq.

Inatsisartut Aningaasaqarnermut Akileraartarnermullu Ataatsimiititaliaata 15. juuni 2018-imi ataatsimiinnermini tunngavissat akuerai.

Inatsisartut Aningaasaqarnermut Akileraartarnermullu Ataatsimiititaliaata aalajangiinera Inatsisartut nittartagaanni, www.inatsisartut.gl, Aningaasaqarnermut Ataatsimiititaliap aalajangiinerisa ataanni takuneqarsinnaavoq.