11. december

Naalakkersuisut ulloq 11. December ataatsimiikkamik una aalajangerpaat

2018-imut aalisagaqatigiit ilaannut TAC-mik aalajangersaanermut tunngasoq kiisalu Sinerissami qanittumi saarulliit 2018-mut TAC pillugu isummernissamik tunngavissiamut tapiliussaq.
Naalakkersuisut aalajangerput:
  • 2018-imi aalisagaqatigiit ilaannut TAC-t aamma isummernissamut tunngavissiaq manna naapertorlugit aalajangerneqassasut, tassani Tunumi avaleraasartoorniarnissamut pisassiissutit 2017-imisut 66.000 tons-inut annertussusilerneqassallutik.
  • Aalisarnermut Piniarnermullu Naalakkersuisoq 2018-imi piginnaatinneqassasoq NEAFC-mi ukiumoortumik ataatsimiinnermi naalagaaffinnik sinerialinnik allanik isumaqatigiissuteqarneq naapertorlugu Irmingerhavetsimi suluppaagartassanik aalajangersaanissamut.
  • Aalisarnermut Piniarnermullu Naalakkersuisoq 2018-imi piginnaatinneqassasoq nutaamik siunnersuisoqarneratigut ammassattassat pillugit isumaqatigiissut naapertorlugu 2017/2018-imut ammassattassanik aalajangersaanissamut.
  • Aalisarnermut Piniarnermullu Naalakkersuisoq piginnaatinneqassasoq NEAFC-p ukiumoortumik ataatsimiinnerani naalagaaffinnut sinerialinnut pisassiissutitut aalajangersarneqartunit Kalaallit Nunaata pisassai naapertorlugit saarullernartassanik aalajangersaanissamut.
  • Aalisarnermut Piniarnermullu Naalakkersuisoq 2018-imi piginnaatinneqassasoq Pinngortitaleriffimmut aamma KANUAANA-mut tusarniaasoqareernerani misileraalluni aalisarnermut tunngatillugu piumasaqaatinik atugassarititaasunillu aalajangersaanissamut.
  • Sinerissami qanittumi saarulliit pisassat 36.500 tonsiniit 1.500 tonsit 2018-mi sunngiffimmi saarullinniartunut immikkoortinneqassasut.
  • Sinerissap qanittuani qaleralinnut atatillugu immikkoortortani pisassiissuteqarfiunngitsuni sinerissap qanittuani qaleralinniarnermi angallatit pisaat, pisassiissutinut tamarmiusunut nalunaarsuinermut ilanngunneqartassapput,
  • Aalisarnermut Piniarnermullu Naalakkersuisoq piffissami qaninnerpaami Nuuk kangerluani pisassiisarnissamut pilersaarummut siunnersuummik suliaqassaaq,
  • 2018-imi siunissamilu sinerissap qanittuani qaleralittassanut pisassiissutigineqartunut atatillugu, ingammik siunnersuiffimmi Qeqertarsuup Tunua-ni, pisassiissutit ingerlaavartumik 10% appartinneqarsinnaasarnissaat nalilersuiffigineqassaaq,
  • Naalakkersuisunut saqqummiussassamik suliaqartoqassasoq, tassani siunnersuutigineqarluni sinerissap qanittuani qaleralinniarfinni immikkoortortaqarfinni siunnersuisarfiit ataasiakkaat blokki-nut/karsinut minnernut agguataarneqarsinnaaneri, tassani immikkoortortaqarfinni siunnersuisarfinni ataasiakkaani aalisarnerup siaruarneqarsinnaanera aammalu blokkini/karsinis ataasiakkaani aalisarnerup unitsinneqartarsinnaanera anguniarneqassalluni. Pinngortitaleriffik aalisakkanit aqutsiveqarfinni ataasiakkaani taama annikitsigisuni aalisagaqatigiiaat qanoq siaruariarsinnaanerinut ineriartorsinnaanerinullu sanilliullugit pitsaaqutaasinnaasut/ajoqutaasinnaasut nalilersorneqarnissaat pillugit suleqatiserineqassaaq,
  • Naalakkersuisut aalajangiineri tusagassiorfinnut nalunaarutinngorlugit piareersarneqassasut.
Paasissutissat sukumiinerusut Pisortaq Jørgen Isak Olsen Aalisarnermut, Piniarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput