25. april

Naalakkersuisut ulloq 25. april ataatsimiikkamik makku aalajangerpaat

Global Forum-imut ilaasortanngornissamut qinnuteqarneq

Naalakkersuisut aalajangerput, Naalakkersuisunut inassutigineqarpoq Kalaallit Nunaat Global Forum-imi ilaasortanngornissamut qinnuteqassasoq.

Paasissutissat sukumiinerusut Pisortaq Nikolai Sten Christensen Aningaasaqarnermut Akileraartarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

2017-imut Aningaasaqarnikkut Ingerlatsineq pillugu Nalunaarut
Naalakkersuisut aalajangerput:

  • 2017-imut Aningaasaqarnikkut Ingerlatsineq pillugu Nalunaarutip Inatsisartut upernaanerani ataatsimiinnerani suliarineqartussanngorlugu nassiunneqassasoq.
  • 2017-imut Aningaasaqarnikkut Ingerlatsineq pillugu Nalunaarummut saqqummiussissut, Inatsisartut 2017-imi upernaakkut ataatsimiinneranni suliarineqartussanngorlugu Inatsisartunut nassiunneqassasoq akuerissagaat.
  • 2017-imut Aningaasaqarnikkut Ingerlatsineq pillugu Nalunaarut aammalu 2017-imut Aningaasaqarnikkut Ingerlatsineq pillugu Nalunaarutip saqqummiussissutaa iluarsiissuteqassasut.
  • Aningaasaqarnermut Akileraartarnermullu Naalakkersuisoq kingorna 2017-imut Aningaasaqarnikkut Ingerlatsineq pillugu Nalunaarummut saqqummiussissummullu teknikikkut kukkunersiorneqarneranilu allannguutinik akuersisinnaanermut piginnaatinneqassasoq

Paasissutissat sukumiinerusut Pisortaq Nikolai Sten Christensen Aningaasaqarnermut Akileraartarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Ukioq manna EU-p ammassassuarnik 6.000 tonsit tikillugit pisassin-niarlugu neqeroorfigineqarsinnaanerata akuersissutigineqarnissaa pillugu Kalaallit Nunaata EU-llu Joint Committeemi ataatsimeeqatigiinnissaat pillugu
Naalakkersuisut aalajangerput:

  • Ulluni 26. - 28- apriilimi Joint Committeemi upernaakkut ataatsimiinnermut atatillugu kalaallit ataatsimiigiartitaat EU-p 6.000 tonsinik ammassassuartassinneqarnissaanik neqerooruteqarnissaannut piginnaatitaaffilerneqassasut.
  • Isumaqatiginninniarnikkut angusaasut Aalisarnermut, Piniarnermullu Naalakkersuisumut inaarutaasumik akuerisassanngorlugit saqqummiunneqassapput.

Paasissutissat sukumiinerusut Pisortaq Jørgen Isak Olsen Aalisarnermut, Piniarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Nunatsinni Ilisimatusarnermik Siunnersuisoqatigiinnut ilaasortassat Grønlands Forskningsråd
Naalakkersuisut aalajangerput:

  • immikkoortortaqarfimmi pisortaq, Josephine Nymand, Pinngortitaleriffik Nunatsinni Ilisimatusarnermik Siunnersuisoqatigiinnut (Grønlands Forskningsråd – Greenland Research Council) siulittaasutut toqqarneqarnissaa akuerineqassasoq ukiuni pingasuni atuuttussatut 1. april 2017-imiit 31. marts 2020-mut.
  • inuit uku Nunatsinni Ilisimatusarnermik Siunnersuisoqatigiinnut (Grønlands Forskningsråd – Greenland Research Council) ilaasortassatut toqqarneqarnissaat akuerineqassasut ukiuni pingasuni atuuttussatut 1. april 2017-imiit 31. marts 2020-mut:
    • Morten Meldgaard, Professor, Ilisimatusarfik, Inuiaqatigiilerinermi ilisimatusarneq
    • Louise Kolby Christensen, Ilinniartitsisoq, Campus Kujalleq, Inuiaqatigilerinermi ilisimatusarneq
    • Gert Mulvad, nakorsaq, Peqqissutsimik Ilisimatusarfik, Dronning Ingridip Napparsimavissua, Peqqinnissamik Ilisimatusarneq
    • Lotte Frank Kirkegaard, Siunnersorti, Sulisitsisut, Nutaaliorneq
    • Thomas Ingemann-Nielsen, Ph.D., ARTEK, Teknologi/Nutaaliorneq
    • Inge Høst Seiding, Ph.D., Nunatta Katersugaasivia Allagaateqarfialu, Humaniora
    • Daniel Thorleifsen, Pisortaq, Nunatta Katersugaasivia Allagaateqarfialu, Humaniora

Paasissutissat sukumiinerusut Pisortaq Lone Nukaaraq Møller Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Ingerlatseqatigiiffimmut Ironbark Zinc Limited-imut aatsitassarsiorluni misissuinissamut akuersissutit pingasut sivitsorneqarnissaat pillugu inassuteqaat.
Naalakkersuisut aalajangerput:

  • aatsitassarsiorluni misissuinissamut akuersissutit 2007/31 Kalaallit Nunaata avannaani Seernani inissisimasoq, 2007/32 Tunumi Mestersvig-ip eqqaaniittoq aamma 2007/33 Kalaallit Nunaata kitaata avannaani Daugaard Jensen eqqaaniittoq piffissamut 31. december 2019 tikillugu sivitsorneqarnissaat akuerineqassasoq,
  • Aatsitassanut Ikummatissanullu Aqutsisoqarfik tamatuma kingorna aatsitassarsiorluni misissuinissamut akuersissutit 2007/31, 2007/32 aamma 2007/33, sivitsorneqarneranni teknikkimut inatsisilerinermullu tunngasunik annikinnerusunik iluarsiinissamut piginnaatinneqassasoq
  • Aatsitassanut Ikummatissanullu Naalakkersuisoq aatsitassarsiorluni misissuinissamut akuersissutit 2007/31, 2007/32 aamma 2007/33 sivitsorneqarnerisa atsiornissaannut piginnaatinneqassasoq.

Paasissutissat sukumiinerusut Pisortaq Jørgen T. Holm Aatsitassanullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Inatsiartunut ingerlatitaq

Meeqqat inuusuttuaqqallu 18-t inorlugit ukiullit ikiaroornartumik atuilersimasut katsorsartinnissaannik immikkut ittumik neqeroorsinnaanissamik Naalakkersuisut UKA2018-mut pilersaarusiornissaannik Inatsisartut aalajangiiffigisassaattut siunnersuut.