3. april

Naalakkersuisut ulloq 3. april ataatsimiikkamik makku aalajangerpaat

2017-imi misileraalluni aalisarnernik pilersitsineq
Naalakkersuisut aalajangerput:

  • Isummernissamut tunngavissiami misileraalluni aalisarnissat saqqummiunneqartut piviusunngortinneqarnissaat inassutigineqarpoq,
  • Aalisarnermut Piniarnermullu Naalakkersuisoq misileraalluni aalisarnissanut akuersissutinik agguaassisarnissamut maleruagassanik siunnersuusiussasoq, taakkulu piaarnerpaamik Naalakkersuisunut akueritillugit.

Paasissutissat sukumiinerusut Pisortaq Jørgen Isak Olsen Aalisarnermut, Piniarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Kalaallit Nunaata kitaani 2017-mi arnarlunniarnissamut pisassat agguataarneqarneri
Naalakkersuisut aalajangerput, Naalakkersuisut akuerissagaat piffikkaartumik pisassiissutit aamma ullut arnarlunniarfiusussat kalaallit nunaata kitaani

Paasissutissat sukumiinerusut Pisortaq Jørgen Isak Olsen Aalisarnermut, Piniarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Avaleraasartuunik kiisalu ammassassuarnik aamma saarullernanik tunineqarnissamut pisassiissutinik piumasaqaatinillu pilersitsineq
Naalakkersuisut aalajangerput:

 Kalaallit Nunaanni ikerinnarsiorluni aalisarnerup ineriartortitsiffiunissaanut tunngaviliinissaq pingaarnertut anguniagaavoq, tamatumalu aningaasaqarnikkut, suliffissaqartitsiniarnikkut uumassuseqassutsikkullu isumannaatsuunissaa anguniarneqarluni.

  • Tunumi avaleraasartuunut pisassiissutit 66.365 tonsinut aalajangiunneqassasut.
    • Immikkoortoq 1: Pisassiissutit amerlanerpaat kalaallit angallataannut agguaanneqas-sapput. Tassani pisassiissutit 46.365 tonsinik immikkoortitsiffigineqarput. Amerlassusai kalaallit aalisariutaannut piumasaqaatinik naammassinnittunut assigiim-mik agguarneqassapput. Agguaanneqartut minnerpaamik 75 %-ii kalaallit aalisariu-taannit aalisarneqassapput sinneruttullu 25 %-ii aalisariutinit attartukkanit/erfalasut-sinnit erfalasulikkanit aalisarneqassallutik.
    • Immikkoortoq 2: Pisassiissutit 20.000 tonsit ingerlatseqatigiiffinnut nammineq aalisa-riuteqanngitsunut agguaanneqassapput. Ingerlatseqatigiiffiit tassaassapput piumasa-qaatinik assigiinngitsunik naammassinnittut, ilaatigut aalisarnerup aalisakkanilluunniit tunisassiornerup iluani suliaqareersimanissaannut piumasaqaatit. Annertussusaat assi-giissillugit ingerlatseqatigiiffinnut agguarneqassapput.
  • Pisassiissutit aalisarnerup ingerlanerani pisariaqalissagaluarpat agguaanneqaqqissinnaassasut.
  • Annerpaamik 15 % (9.945 tons) nunat tamalaat akornanni imartani aalisarneqarsinnaapput. Tamanna maanna pisinnaavoq Kalaallit Nunaat aalisakkanut sinerialittut akuerisaammat. Aalisarnernut taakkununnga kalaallit aalisariutaat salliutillugit pisassinneqassapput.
  • Pisassiissutit aalisarnerup ingerlanerani pisariaqalissagaluarpat agguaanneqaqqissinnaassasut. Aalisarnermut Piniarnermullu Naalakkersuisoqarfik pisassiissutinik agguaasseqqinnissamut inassuteqaammik Naalakkersuisumut akuerineqartussamik pisinnaatinneqarpoq.
  • Tunumi ammassassuarnut pisassiissutit 30.000 tonsinut aalajangiunneqassasut, pisassiissutillu taakku kalaallit aalisariutaannut salliutillugit pisassiissutigineqassasut. Taakku saniatigut utaqqiisaasumik erfalasulerneqartut akuerineqartassapput.
  • Tunumi saarullernanik pisassiissutit 10.000 tonsinut aalajangiunneqassasut, pisassiissutillu taakku avaleraasartuunik aalisarsinnaanermut akuersissuteqartunut tamanut tunniunneqassasut.
  • Utaqqiisaasumik erfalasulikkanik aalisariutinik aalisartitsisinnaanermik akuersisoqassasoq. Utaqqiisaasumik erfalasulerlugit aalisartitat Kalaallit Nunaanni allanik aalisarsinnaatitaalissanngillat siunissamilu ikerinnarsiortunik pisassiissutinik immikkut pisinnaatitaassanatik.
  • Angallatit attartorneqartut NAFO-mi, NEAFC-imi ilaasortaneersuussapput imaluunniit Nunani umiarsualiveqarfiusuni oqartussaanerup iliuuseqarfigineqarnissaa pillugu FAO-p isumaqatigiissutaanut, tassalu aalisarnermi aalajangersugaanngitsumik unioqqutitsisumik, nalunaaruteqartannginnermut killilersugaanngitsumillu aalisarnermik pinaveersaartitsisussaq pillugu atsiuinissaq pillugu ilaasunut nunaneersuussapput (IUU-aalisarneq).
  • Immikkoortoq 2-mi piumasaqaatinik naammassinnissimallutik qinnuteqartut amerlappata makitsisoqassaaq.

Paasissutissat sukumiinerusut Pisortaq Jørgen Isak Olsen Aalisarnermut, Piniarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Sikuki Nuuk Harbour A/S-imi akit akinullu tunngaviusut iluarsineqarnissaannut qinnuteqaat
Naalakkersuisut aalajangerput, Sikuki Nuuk Harbour A/S-imi akit akinullu tunngaviusut iluarsineqarnissaannut qinnuteqaat iluarsiissutitalerlugu akuerineqassasoq, tamatumani kissaatigineqarluni suleriaasissatut tunngavissiani immikkoortoq 3.1.3-p ataani “sivisunerusumik tulaqqanissap” ersarinnerusumik aalajangersaaffigineqarnissaa.

Naalakkersuisut Siulittaasuata Naalakkersuisut immikkoortumik suliarinninnerini ataatsimiinneq qimakkallarpaa.

Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Open Skies-it pillugit Islandimut isumaqatigiissutip nalinginnaasunnngorsarneqarnissaanik aallartitsinissaq
Naalakkersuisut aalajangerput, Kalaallit Nunaata aamma Islandip akornanni silaannakkut angallassinerup pisariillisarneqarnissaa pillugu isumaqatigiissutip ilusilernissaanut suliat aallartinneqarnissaat Naalakkersuisut akuerissa-gaat. Isumaqatigiissummut tassunga angallavinni timmisartuussineq, attartortitsilluni timmisartuus-sineq aamma qulimiguulinnik sullissinerit ilaassapput. Missingiut inaarutaasoq Naalakkersuisunit akuerineqassaaq. 

Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Konto pingaarnermi Kommunini atuarfiit, Alluitsup Paani atuarfimmik nutaamik sananissamut aningaasanik atugassanngortitsineq
Naalakkersuisut aalajangerput, Inatsisartut Aningaasaqarnermut Akileraartarnermullu Ataatsimiititaliaannut akuerisassanngorlugu inassuteqaatsip nassiunneqarnissaa Naalakkersuisut akuersissutigissagaat
Paasissutissat sukumiinerusut Pisortaq Lone Nukaaraq Møller Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput