23. marts

Naalakkersuisut ulloq 23. Marts ataatsimiikkamik makku aalajangerpaat

Inuit Pisinnaatitaaffiinut Kalaallit Nunaata Siunnersuisoqatigiivi pillugit naliliinermik ilanngussanillu agguaanissap akuerineqarnissaa
Naalakkersuisut aalajangerput, Inuit Pisinnaatitaaffiinut Kalaallit Nunaata Siunnersuisoqatigiivi pillugit naliliineq ilanngussallu Inatsisartunut agguaassassatut akuerineqassasut

Paasissutissat sukumiinerusut Pisortaq Julie Præst Wilche Isumaginninnermut, Ilaqutariinnut, Naligiissitaanermut Inatsisinillu Atortitsinermut Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput


Piujuartitsineq siunertaralugu aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutaannut nr. 12, 17. november 2011-meersumut allannguutissatut siunnersuut pillugu
Naalakkersuisut aalajangerput, Piujuartitsineq siunertaralugu aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutaannut allannguutissatut siunnersuut iluarsiissutitalerlugu akuersissutigineqassasoq.

Paasissutissat sukumiinerusut Pisortaq Jørgen Isak Olsen Aalisarnermut, Piniarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Qeqertarsuarmi sumiiffimmut aatsitassarsiorluni misissuinissamut akuersissutip 2012/29-ip atugassarititaasut akuersissummi aalajangersarneqartut tunngavigalugit sivitsorneqarnissaa pillugu inassuteqaat.
Naalakkersuisut aalajangerput:

  • Aatsitassarsiorluni misissuinissamut akuersissutip 2012/29 Qeqertarsuarmi inissisimasup piffissamut 31. december 2021 tikillugu sivitsorneqarnissaa akuerineqassasoq,
  • Aatsitassanut Ikummatissanullu Aqutsisoqarfik tamatuma kingorna aatsitassarsiorluni misissuinissamut akuersissummut 2012/29-imut tapiliussami teknikkimut inatsisilerinermullu tunngasunik annikinnerusunik iluarsiinissamut piginnaatinneqassasoq,
  • Aatsitassanut Ikummatissanullu Naalakkersuisoq aatsitassarsiorluni misissuinissamut akuersissummut 2012/29-imut tapiliussap atsiornissaanut piginnaatinneqassasoq

Paasissutissat sukumiinerusut Pisortaq Jørgen T. Holm Aatsitassanullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Piiaanissamut akuersissutip 2008/40, Malmbjerg Molybdenum A/S, utertinneqarnissaa
Naalakkersuisut aalajangerput:

  • Tunumi Maqqagai-mi nunami sumiiffimmi aatsitassanik aalajangersimasunik piiaanissamut, piiaanissamut akuersissutip 2008/40-ip utertinneqarnissaa akuerineqassasoq,
  • atugassarititaasut isummernissamut tunngavissiami taaneqartut tunngavigalugit piiaanissamut akuersissutip 2008/40-ip utertinneqarnissaa pillugu isumaqatigiissut akuerineqassasoq,
  • piiaanissamut akuersissutip 2008/40-ip utertinneqarnissaa pillugu isumaqatigiissummi teknikkimut inatsisilerinermullu tunngasunik annikinnerusunik iluarsiinissamut Aatsitassanut Ikummatissanullu Aqutsisoqarfik piginnaatinneqassasoq,
  • Aatsitassanut Ikummatissanullu Naalakkersuisoq piiaanissamut akuersissutip 2008/40-ip utertinneqarnissaa pillugu isumaqatigiissutip atsiornissaanut piginnaatinneqassasoq.

Paasissutissat sukumiinerusut Pisortaq Jørgen T. Holm Aatsitassanullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Maannakkut qinersisarnermik aaqqissuussinermi iluaqutit ajoqutillu pillugit Inatsisartunut nassuiaatip akuerineqarnissaa
Naalakkersuisut aalajangerput, “Maannakkut qinersisarnermik aaqqissuussinermi iluaqutit ajoqutillu pillugit Inatsisartunut nassuiaat”-ip maannatut iluseqarluni Inatsisartunut agguaanneqarnissaa akuerineqassasoq.

Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Imarsiorneq pillugu misissueqqissaarneq – Namminersorlutik Oqartussat imarsiornermut suliassaqarfiup tigusisinnaanerannut tunngavissanik misissueqqissaarneq
Naalakkersuisut aalajangerput:

  • imarsiorneq pillugu misissueqqissaarnerup Inatsisartuni ilaasortanut ingerlateqqinneqarnissaa Naalakkersuisut akuerissagaat.
  • imarsiorneq pillugu misissueqqissaarnerup ingerlateqqinneqarnissaanut allagaq Naalakkersuisut akuerissagaat.

Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Nalinginnaasumik ataatsimeersuarneq - Greenland Oil Spill Response A/S
Naalakkersuisut aalajangerput:
  • ingerlatseqatigiiffiup 2016-imut ukiumoortumik nalunaarusiaa akuerineqassasoq.
  • angusanik atugassanngortitsinissamut siulersuisut siunnersuutaat akuerineqassasoq,
  • siulersuisut aningaasarsiat pillugit politikkiannut siulersuisut inassutigisaat tusaatissatut tiguneqassasoq,
  • siulersuisut ajunngitsorsiassaqartitaaneranni ingerlatseqatigiiffinni namminersorlutik oqartussanit pigineqartuni siulersuisunut aningaasarsiat pillugit Naalakkersuisut politikkiata malinneqarnissaa akuersissutigineqassasoq,
  • siulersuisunut toqqarneqartussatut inassutigineqartut akuerineqassasut,
  • ingerlatseqatigiiffiup 2016-imut ukiumoortumik nalunaarusiaata Grønlands Revisionsselskab-imit kukkunersiorneqarnissaa pillugu siulersuisut inassuteqaataat akuerineqassasoq,
  • ingerlatseqatigiinnut allattoqarfimmut pisortap Lars Balslevip ataatsimeersuarnermi piginneqataasutut taasisinnaatitaanera malillugu, taasisinnaatitaanerata atuutsinneqarnera akuerineqassasoq.
Paasissutissat sukumiinerusut Pisortaaneq Søren Hald Møller Naalakkersuisut Siulittaasuata Naalakkersuisoqarfiani oqarasuaat 34 50 00 saaffiginnilluni pissarsiarineqarsinnaapput