23. februar

Naalakkersuisut ulloq 23. februar ataatsimiikkamik makku aalajangerpaat

Aasianni Namminersorlutik Oqartussat inissiarsuaataannut pilersaarut
Naalakkersuisut aalajangerput:
  • Aasianni immikkoortumut pilersaarut 2016 – Namminersorlutik Oqartussat inissiaataannik iluarsaassineq isaterinerlu – maannatut iluseqarluni akuerineqassasoq.
  • Qaasuitsup Kommuniata B-689-imik atuartunut angerlarsimaffittut atuiinnarnissamik kissaataa akuerineqassanngitsoq.

Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Nuummi, Ilulissani Qaqortumilu mittarfiliassat Kalaallit Airports-ip ataani killiffii
Naalakkersuisut aalajangerput:
  • Mittarfiliassat killiffii, tassungalu piffissamut pilersaarutit iluarsisat ilanngullugit, tusaatissatut tiguneqassasut.
  • Mittarfiliassat qaammammoortumik nalunaarusiortarnissaannut malitassat, 2016-imi maajimeersut atorneqannginnissaat Naalakkersuisunit akuerineqassasoq. Tassunga taarsiullugu malitassamik nutaamik Kalaallit Airports A/S suleqatigalugu suliaqartoqassaaq. Malitassaq nutaaq 2017-imi qaammatit siulliit pingasut ingerlaneranni immikkut ittumik isummernissamut tunngavissiornikkut ilisaritinneqassaaq.
  • Inassuteqaat manna kiisalu ilanngussat Inatsisartut Aningaasaqarnermut Akileraartarnermullu Ataatsimiititaliaannut kiisalu Inatsisartut Sanaartornermut Ataatsimiititaliaannut ilisimatitsissutitut nassiunneqarnissaat Naalakkersuisut akuerissagaat.

Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

"Sumiiffinni annikitsumik aarlerinaatilinni" qimmit akiuussutissalersimanissaannik piumasaqaammit immikkut ittumik akuersissuteqarneq.

Naalakkersuisut aalajangerput, Aalisarnermut Piniarnermullu Naalakkersuisup Naalakkersuisunut inassutigaa Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaata nr. 24, 28. november 2016-imeersoq naapertorlugu 2017-imut immikkut ittumik akuersissuteqartoqassasoq takuuk inatsimmi nr. 4, § 21, imm. 2 , pineqarluni akiuussutissalerneqarsimanissamik piumasaqaat "ukiumi siullermi pingasoriarlugu". Immikkut ittumik piumasaqaammit pineqarput sumiiffinni annikitsumik aarlerinaatilinni qimminik tigumminnillutik najugaqartut, taakku Naalakkersuisunut uppernarsartassagaat qimmitik akuttunngitsumik akiuussutissalerneqartarsimasut inatsisip atuutilernissaata tungaanut. Sumiiffimmut annikitsumik aarlerinaatilimmut ilaapput qaasuitsup kujataani illoqarfiit nunaqarfiillu, Tunumi Nunap Isuata tungaanut qimminik qimuttoqarfiusoq pinnagu.

Paasissutissat sukumiinerusut Pisortaq Jørgen Isak Olsen Aalisarnermut, Piniarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

EU-p aamma OLT-p akornanni Nunanik Imarpiup akianiittunik aamma Nunasiaataasimasunik Forum-imik aamma OLT-mi Ministerit ataatsimeeqateqarnerat
Naalakkersuisut aalajangerput:

  • OLT-mi Ministerit ataatsimiinneranni aamma OLT-EU-Forum-imi Kalaallit Nunaanniit angalaqatigiit pisortaata Naalakkersuisut sinnerlugit, Politikkikkut Nalunaarutip, Allaffissornikkut Aalajangersakkat, Ataatsimoorluni Inissisimanermut Uppernarsaatip aamma Ataatsimoorluni Inerniliinerit atsiornissaannut piginnaatinneqarnissaa akuerineqassasoq.
  • Nunat imarpiup akianiittut aamma Nunasiaataasimasut suleqatigiiffianni, isummernissamut tunngavissiami nassuiarneqartutut, nunanik qineqqusaartunik kalaallit angalatitaasa qinersinissaat akuerineqassasoq.
  • OCTA-p missingersuutaasa akuerinissaannut kalaallit angalatitaasa piginnaatinneqarnissaat akuerineqassasoq.

Paasissutissat sukumiinerusut Pisortaq Jørn Skov Nielsen Inuussutissarsiornermut, Suliffeqarnermut Niuernermut, Nukissiuuteqarnermut Nunanullu Allanut oqarasuaat 34 50 00 saaffiginnilluni pissarsiarineqarsinnaapput