20. februar

Naalakkersuisut ulloq 20. Februar ataatsimiikkamik makku aalajangerpaat

Oqarasuaatikkut siunnersuisarfinnik aaqqisssuusseqqinnissaq ammasarfiinillu sivitsuinissaq pillugu
Naalakkersuisut aalajangerput:
  • Oqarasuaatikkut siunnersuisarfiit aaqqissuuteqqinneqarnissaat ammasarfiisalu sivitsorneqarnissaat akuerissagaat
  • Inassuteqaat kinguliini allassimasoq akuerisassanngorlugu Inatsisartut Aningaasaqarnermut Akileraartarnermullu Ataatsimiititaliaannut ingerlateqqinneqassasoq
Paasissutissat sukumiinerusut Pisortaq Julie Præst Wilche Isumaginninnermut, Ilaqutariinnut, Naligiissitaanermut Inatsisinillu Atortitsinermut Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Meeqqanut inuusuttunullu suliassaqarfinni suliassat amerlassusaat pillugit paasissutissiinermut akuersissut
Naalakkersuisut aalajangerput, Meeqqanut inuusuttunullu suliassaqarfinni suliassat amerlassusaat pillugit nassuiaat iluarsiissutitalerlugu akuersissutigineqassasoq, aammalu Inatsisartunut agguaanneqarsinnaassasoq.

Paasissutissat sukumiinerusut Pisortaq Julie Præst Wilche Isumaginninnermut, Ilaqutariinnut, Naligiissitaanermut Inatsisinillu Atortitsinermut Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Qaanaami Nukissiorfinnut ujaraaqqanik piiaanissamut akuersissuteqarneq.

Naalakkersuisut aalajangerput:

  • Qaanaami Nukissiorfiit aatsitassanut ikummatissanullu inatsimmi § 47 malillugu Qaanaami ujaraaqqanik, ujaqqanik saffiugassanillu assigisaannik katersinissamut piiaanissamullu akuerineqassasoq,
  • Aatsitassanut Ikummatissanullu Aqutsisoqarfik tamatuma kingorna teknikkimut inatsisilerinermullu tunngasunik annikinnerusunik iluarsiinissamut piginnaatinneqassasoq.
  • Aatsitassanut Ikummatissanullu Naalakkersuisoq akuersissut atsiornissaanut piginnaatinneqassasoq.

Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Sanaartugassanut aamma aserfallatsaaliinermi akisussaaffimmik atualerneq sioqqullugu aamma meeqqat atuarfiannut tunngatillugu kommuninut nuussineq
Naalakkersuisut aalajangerput:

  • Nunami tamarmi sanaartukkani pissutsit aserfallatsaalisassat nunamut tamarmut sanaartukkat qanoq issusiannik nalilersuinermi immikkoortukkaanut inissitsiterinermi ”pilertortumik iluarsagassatut” nalilerneqartut aallartinneqassapput aningaasalersorlugit kontumit pingaarnermit kommunini atuarfiit aamma Meeqqanik inuusuttunillu paaqqinnittarfiit aqqutigalugit,
  • Nunamut tamarmut aserfallatsaaliinermi suliniut aallaaveqartinneqassaaq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi,
  • Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq pisinnaatinneqassaaq kommunit oqaloqatigalugit aalajangersaanissamut malittarisassanik suliniummut, tamatumanilu aqutsisoqatigiinnik kommunini tamani kommuniniit peqataaffigineqartumik pilersitsisoqassalluni,
  • Politikkikkut ataqatigiissaarisoqatigiinni tulliani ataatsimiinnissamut saqqummiussassamik suliaqartoqassaaq inaarutaasumik aalajangiinissaq siunertaralugu, sanaartugassanut aamma aserfallatsaaliinermut akisussaaffiup atualerneq sioqqullugu ingerlatsinermi aamma meeqqat atuarfianni kommuninut nuunneqarnissaa pillugu.

Paasissutissat sukumiinerusut Pisortaq Lone Nukaaraq Møller Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Akiitsut akiitsunillu akilersuineq pillugit nalunaarusiaq
Naalakkersuisut aalajangerput:

  • Akiitsut akiitsunillu akilersuineq pillugit nassuiaat iluarsiissutitalerlugu akuersissutigineqassasoq.
  • Siunnersuisoqarfimmik inunnik akiitsoqartunik siunnersuisinnaasumik ikiuisinnaasumillu pilersitsinissamut periarfissat pillugit nassuiaasiornissaq pillugu Naalakkersuisut peqquneqarnissaannik aalajangiiffigisassatut siunnersuummut UKA2015/96-imut malitsitut nassuiaat Inatsisartunut nassiunneqassasoq.

Paasissutissat sukumiinerusut Pisortaq Nikolai Sten Christensen Aningaasaqarnermut Akileraartarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Illoqarfinni annerni tallimani illunik ilaqutariinnut inissianik illunillu marloqiusaasuni attartortumiit piginnittumut aaqqissuussineq naapertorlugu tigusisarneq
Naalakkersuisut aalajangerput:

  • Namminersornerullutik Oqartussat kommunillu inissiaataannik attartortittakkanik inissiatut imaluunniit illutut nammineq pigisatut tigusisarneq pillugu Inatsisartut peqqussutaat nr. 12, 19. november 2007-imeersoq illoqarfinni annerni tallimani, Nuummi, Sisimiuni, Ilulissani, Aasianni aamma Qaqortumi Namminersorlutik Oqartussat illuutaannut ilaqutariinnut inissianut aamma illunut marloqiusaasuni atuutissanngitsoq Naalakkersuisut aalajangissagaat.
  • Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik illoqarfinni annerni tallimani, Nuummi, Sisimiuni, Ilulissani, Aasianni aamma Qaqortumi Namminersorlutik Oqartussat illuutaannik ilaqutariinnut inissianik aamma illunik marloqiusaasunik attartortumiit piginnittumut tigusinissamik qinnuteqartunut itigartitsinissamut piginnaatinneqassasoq.

Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Ineqarnermut suliassaqarfiup iluani iluarsaaqqinnissamut suliniutit
Naalakkersuisut aalajangerput:

  • Namminersorlutik Oqartussat inissiaataannik kommuninut tunniussineq, Suliassaqarfimmut pilersaarutit tunngavigalugit pissasoq aammalu isumaqatiginninniarnerit 2018-imut ataatsimoortumik tapiissutit isumaqatiginninniutigineqarnerisa nalaanni aallartinneqassasut. Tassunga atatillugu Illuut A/S-ip siunissaa isummerfigineqassaaq.
  • inissialiortiternermut taarsigassarsititsisarneq pisariillisarneqassasoq, taamaalilluni tunngaviusut isummernissamut tunngavissiami nassuiarneqartut naapertorlugit piginneqatigiilluni inissiat aamma inissianut aningaasalersuisarneq pillugit inatsisit nutaat atuutilerpata, kontumi pingaarnermi Nammineq inissianik tapiissutitalimmik sanaartorneq, aningaasassat kommuninut tunniunneqassallutik.
  • Isummernissamut tunngaviusut matumani saqqummiunneqartut naapertorlugit piginneqatigiilluni inissiat pillugit nutaamik UKA 2017-imut saqqummiussinissaq siunertaralugu inatsisiliortoqassasoq.
  • Naalakkersuisuisut isummernissaannut tunngavissiami saqqummiunneqartut naapertorlugit UKA 2017-imut saqqummiussinissaq siunertaralugu inissianut aningaasalersuisarneq (aaqqissuussineq 20/20/60) pillugu nutaamik inatsisiliortoqassasoq.
  • tunngaviusut isummernissamut tunngavissiami nassuiarneqartut naapertorlugit UKA 2018-imut saqqummiussinissaq siunertaralugu inissianik attartortitsisarnermut nutaamik inatsisiliortoqassasoq.
  • Naalakkersuinikkut aalajangernerit Ataqatigiissaarisoqatigiinnut allakkiami ”Suliassat nuutinneqarnissaat – Ineqarnermut suliassaqarfik 2018”, nassuiarneqartut Naalakkersuinikkut Ataqatigiissaarisoqatigiit ataatsimiinnissaanni pisussami saqqummiunneqassasut.
Paasissutissat sukumiinerusut Pisortaq Ruth Lindhardt Ineqarnermut, Sanaartornermut Attaveqarnermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput