11. november 2010

Naalakkersuisut ulloq 11. november ataatsimiikkami makku aalajangerpaat

Puisinik illersuineq piniarnerlu pillugit nalunaarutissap akuerineqarnera.

Naalakkersuisut aalajangerput:

  • puisinik illersuineq piniarnerlu pillugit nalunaarutissatut siunnersuut ilanngunneqartoq taamatut iluseqartillugu akuersissutigalugu.
  • puisinik illersuineq piniarnerlu pillugit nalunaarutissamut ilitsersuutissatut siunnersuut ilanngunneqartoq taamatut iluseqartillugu akuersissutigalugu.

Paasissutissat sukumiinerusut Pisortaq Jens K. Lyberth Aalisarnermut, Piniarnermut Nunalerinermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Kalaallit Nunaata EU-llu akornanni Joint Committee pillugu ulluni 15. - 16. juni 2010-mi ataatsimiinnerat.

Naalakkersuisut aalajangerput:

  • ulluni 15. - 16. juni 2010-mi ataatsimiinnermi isumaqatiginninniartitat isumaqatigiissutigisaat Agreed Records isummernissamut tunngavissiamut uunga  akuersissutigalugu,
  • misileraalluni saarullinniarnissamik Kalaallit Nunaata neqerooruteqarsinnaannginneranik EU nalunaarfigineqarnissaa akuersissutigalugu,
  • piffissami 2007 - 2010-mut ammassannik saarullinnillu 'akiitsoqarnerup' kingunerisaanik EU-mit katillugit akiliutigineqartartut 12.437.797 kr.-inut annikillisinneqarnerat akuersissutigalugu.

Paasissutissat sukumiinerusut Pisortaq Jens K. Lyberth Aalisarnermut, Piniarnermut Nunalerinermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput

Atlantikup Avannaata Kitaani Aalisarnermut kattuffiup (NAFO) ukiumoortumik ataatsimiissimaneranit ulluni 20. – 24. september 2010 Halifax Canada-miittumi isumaqatiginninniarnermi angusat inaarutaasumik akuersissutigineqarnissaat pillugit.

Naalakkersuisut aalajangerput, NAFO-mi ukiumoortumik ataatsimiinnermi isumaqatiginninniarnermi angusat akuersissutigalugit.

Paasissutissat sukumiinerusut Pisortaq Jens K. Lyberth Aalisarnermut, Piniarnermut Nunalerinermullu Naalakkersuisoqarfimmi oqarasuaat 34 50 00 saaffiginnilluni pissarsiarineqarsinnaapput