Kalaallit Nunaata Reykjavikimi Sinniisoqarfia

Nunatta nunanut allanut attaveqarfissaanik sisamassaanik ammaanissaq 2017-imi upernaakkut Inatsisartut ataatsimiinneranni aalajangiunneqarpoq, tassa Islandimi nunatta sinniisoqarfissaanik pilersitsisoqarniarpoq pitsaasumik eqqaamioriinnerup ineriartortinneqarnissaa qulakkeerniarlugu aamma ilaatigut nunatta Islandillu niuernikkut aningaasaqarnikkullu attaveqatigiittarnerat pitsanngorsaaffiginiarlugu suliassaqarfimmik nutaamik pilersitsinissaq sulissutiginiarlugu.

November 2013-imi Islandip aamma Kalaallit Nunaata akornanni ataatsimoortumik nalunaarutip atsiorneqarneratigut Islandimik suleqateqarneq ukiuni kingullerni annertuumik pitsanngoriarsimavoq aamma suleqatigiiffiusinnaasut suussusersineqarsimapput kiisalu Nunani Avannarlerni Killerni, Nunani Avannarlerni Siunnersuisoqatigiinni aamma Nunani Avannarlerni Ministerinut siunnersuisoqatigiinni suleqatigiinnerusoqalersimalluni. Ukiut tamaasa malitseqartitsinissaq aamma nalunaarummi suleqatigiiffigisassatut salliutitat piviusunngortinneqarnissaat, taakkununnga ilanngullugit aalisarnerup, peqqissuunissap, takornariartitsisarnerup, silaannakkut angallannerup inuussutissalerinerullu iluini suleqatigiinnerulernissaq siunertaralugit atuutsitsilernissaq pillugu ataatsimeeqatigiittoqartarpoq. Tassani sinniisoqarfik naalakkersuisoqarfinnut tamanut kiffartuussisuussaaq.
Sinniisoqarfimmi ullumikkut sulisuupput aallartitaalluni Sinniisoqarfimmi Pisortaq aamma allatsi sumiiffimmi najugalittut atorfinitsinneqarsimasoq.

Sinniisoqarfimmi pisortaq Jacob Isbosethsen, jsis@nanoq.gl
Oqa. nr.: (+354) 6655610

Allatsi Birta Jóhannesdóttir, birj@nanoq.gl
Oqa. nr.: (+354) 7756321