Atorfinitsitanik pikkorissaasarneq

Namminersorlutik Oqartussat isumaqatigiissuteqarneri tunngavigalugu Kalaallit Nunaata Københavnimi Sinniisoqarfia Kalaallit Nunaanni sulilersussanut ilisarititsinermik pikkorissaatitsisarpoq.



Kikkut peqataasinnaappat




Pikkorissaanerit Kalaallit Nunaannili sulilersussat tamarmik peqataaffigisinnaavaat - pisortani namminersortuniluunniit atorfinissimagaanni.



Nalunaarneq



Sulisitsisup sulilersussaq pikkorissarnermut nalunaarutigissavaa, sapinngisamik pikkorissaatitsisartup e-mailianut E-mail



Qanoq akulikitsigisumik



Atorfineqqaanut pikkorissaanerit qaammammut ataasiarlutik ingerlanneqartarput. Pikkorissaanerit nalinginnaasumik qaammatip aallartinnerani ingerlanneqartarput.

Juulimili pikkorissaatitsisoqarneq ajorpoq sulinngiffeqarnerit pissutigalugit.



Pikkorissaanerit sivisussusaat



Pikkorissaanerit ulluni marlunni najuunnikkut ingerlanneqartarput - sisamanngornermi nal. 9.00-imiit tallimanngornermut nal.18.00-ip tungaanut (allanngortoqarsinnaavoq).



Pikkorissarfik



Pikkorissaanerit ingerlanneqartarput Kalaallit Nunaata Københavnimi Sinniisoqarfiani, Strandgade 91, 1401 København.



Ullut pikkorissarfiit akornanni unnuiffissap inniminnernera isumagissavaa, unnuinissaq pisariaqassappat. Akigititap iluaniippoq akunnittarfimmi unnuineq ataaseq ullut pikkorissarfiit akornaniittoq aamma nerisaqarneq tamaat isumagalugu (ullaakkorsiorneq, ullup qeqqasiorneq, kaagi pikkorissarup ingerlanerani aamma unnukkorsiorneq pikkorissarfiusup ullup siullliani). Saniatigut nerisaqarneq/atuineq pikkorissartup nammineq akilissavaa.





Akigititat



Septembarip 1-at 2019-imi aallarnerfigalugu ulluni marlunni pikkorissarneq, unnuineq ataaseq ullut pikkorisasrfiit akornaniittoq, nerisaqarnerlu pikkorissarnerup nalaani ilanngullugit akeqarpoq DDK 7.000,-. Aappariinnut ulluni marlunni pikkorissarneq, unnuineq ataaseq ullut pikkorisarfiit akornaniittoq aamma nerisaqarneq pikkorissarnerup nalaani ilanngullugit akeqarpoq DDK 12.800,-.



Unnuiffissaq ilanngunnagu pikkorissaraanni pikkorissarnermut akigitinneqartoq ineqarnermut akip nalinganik apparneqartarpoq, ullumikkut taanna annertussuseqarpoq DKK 1.400,- unnuineq ataaseq.



Amerlanerusunik unnuineq



Pikkorissarneq sioqqullugu amerlanerusunik unnuinissaq aaqqissuunneqarsinnaavoq. Tamanna suliffeqarfiummut atorfinitsitsisumit akuerineqarsimassaaqakiligassartaali suliffeqarfimmut atorfinitsitsisumut immikkut nassiunneqassaaq.



Pikkorissarfissamut utimullu angalaneq pikkorissaanermut akigititamiinngilaq aamma.



Pikkorissaanerup imarisaa



Pikkorissaanermi peqataasoq Kalaallit Nunaanni ulluinnarni inuuneq kiisalu inuiaqatigiinni iluaqutissatut ilisimasassat pillugit paasitinneqartarpoq. Sapinngisatsinnik - soorunami nunamut pingaartitsineq aallaavigalugu - Kalaallit Nunaat ilisaritinniartarparput inuiaqatigiiusut siuarsimasut soqutiginartuusullu sukkulluunniit unammilligassanik naapitaqarsiusoq.



Makku sammineqartarput: Atassuteqaqatigiinneq aamma attaveqarneq, akileraarutit akitsuutillu pillugit paasisitsineq, CITES, uumasut pinngortitarlu, illoqarfiit, pinngortitami isumannaatsuunissaq, Kalaallit Nunaat piorsarsimasoq "qanganisamut" sanilliullugu, Namminersornerullutik Oqartussaaneq/Namminersorlutik Oqartussaanermut sanilliullugu, aatsitassarsiorneq, oqaatsit, isummat pigiliutiinnakkat, unammilligassat, eqqarsartaaseq, quiasoriaaseq sammilaarlugit, kiisalu kulturimik paasinninneq.



Pikkorissartut ataasiakkaat pisariaqartitaat pikkorissarnermullu peqataanera naapertorlugu pikkorissarneq aaqqissorniartarpara, pikkorissarneq tamanut uummaarissumik misigisaqartitsiniassammat.



Attaveqarfissaq:



Grønlands Repræsentation

Kursus for Nyansatte

Strandgade 91

DK-1401 København K

Tlf.: +45 3283 3800

E-mail

 

Kursusprogram 2019