Suliffimmik misiliinissaq

Bruxellesimi Kalaallit Nunaata Sinniisoqarfiani illit ilinniagaqartutut periarfissaqarputit ilinniagaqarnernut naleqquttumik suliffimmik qaammatini arfinilinni piffissani 1. februarimiit 31. julimut imaluunniit 1. septemberimiit 31. januarimut misiliinissannik.  Misiliinissaq imaalillugu piareersarneqassaaq anguneqareersut nuussinnaanngorlugit, matumani suliffimmik misiliisup ilinniarfia akuersisinnaappat.

Sinniisoqarfiup pingaarnertut suliassaraa Kalaallit Nunaat EU-mi soqutigisaanik isumaginninnissaq. Kalaallit Nunaat EU-mi ilaasortaanngilaq OLT–mulli ilaasortaalluni (Nunat nunasiaataasimasut Kattuffiat).   Kalaallit Nunaat aamma arlalinnik isumaqatigiissuteqarpoq akuttunngitsumik nalilersorneqartartussanik EU-millu isumaqatiginninniutigineqartussanik, soorlu suleqatigiinnissamik isumaqatigiissut aamma aalisarneq pillugu isumaqatigiissut.

Periarfissamik neqerooruteqarpugut, ilinniagaqartut ilinniakkatigut ilisimasanik nalinginnaasumik pissutsini atuisinnaanngortillugit. Ilinniartoq suliniutinik suliassanillu arlalinnik pissanganartunik suliaqarnissaminut periarfissaqassaaq, suliniutit suliassallu piareersarneqarsimasut pineqarsinnaapput, kisianni aamma suliassat tassanngaannartumik takkussinnaapput. Suliffimmik misiliinerup nalaani Sinniisoqarfiup inaarutaasumik suliassaanut ilinniagaqartoq sunniuteqarnissamut periarfissaqarpoq.

Sammisat ilinniagaqartunit pingaarnerusumik suliarineqartartut ukuupput: OLT-mi suleqatigiinneq suliassallu suleqatigiinnermut attuumassuteqartut, Kalaallit Nunaata EU-mut aalisarneq pillugu isumaqatigiissutaa aamma Kalaallit Nunaata EU-llu akornanni suleqatigiinnissamik isumaqatigiissut. Tamakkua saniatigut suliffimmik misiliinerup ingerlanerani suliassarpassuaqartarpoq nukiginnartunik. 


Sinniisoqarfimmi ukiaru suliffimmik misileerusukkuit qinnuteqarnissaq pillugu uani paasisaqarnerusinnaavutit.