Kalaallit Nunaannut-isumaqatigiissut 1985-imeersoq

1973-imi Danmarki EF-imut peqataalermat Kalaallit Nunaat ilaasortanngorpoq. Kalaallit Nunaanni innuttaasut 1973-imi taasitinneqarput, tassani EF-imi ilaasortanngornissaq itigartitsissutigineqarluni, kisianni taamanikkut Kalaallit nunaat namminersortuunngimmat EF-imut pinngitsoorani ilaasortanngortinneqarpoq.

Namminersornerullutik Oqartussani naalakkersuinikkut suliassat siulliit ilagisimavaat EF-imit aninissaq, tassa Kalaallit Nunaata aalisarnikkut oqartussaaffigisaanni tamakkiisumik oqartussaasuunissamik kissaateqarneq pissutigalugu aammali sumiiffinnit Kalaallit Nunaata avataaneersunit toqqaannartumik sunnertittarnerup annikillisarneqarnissaanik kissaateqarneq pissutigalugu. 

1982-imi innuttaasut taasitinneqarput amerlanerussuteqartullu aninissamut akuersaarlutik. 1982-ip 1984-illu akornanni piumasaqaatissat isumaqatiginninniutigineqarput ullorlu 1. februar 1985 Kalaallit Nunaat EF-imit pisortatigoortumik tunuarpoq. Kalaallit Nunaata EF-imit aninissaa pillugu isumaqatigiissut – Kalaallit Nunaannut-isumaqatigiissut – taamani aaqqissuunneqarpoq, tassani Kalaallit Nunaat "immikkuullarissumik inissisimasutut" akuersaarneqarluni. 

"Immikkuullarissumik inissisimaneq" susassaqartut aalisarneq pillugu isumaqatigiissutaanni atuutsinneqarpoq, tassa EF-ip kingusinnerusukkullu EU-nngortup aalisarsinnaatitaani attatiinnarpaa aamma Kalaallit Nunaata aningaasatigut tapiiffigineqartarnini aninnginnermisulli attatiinnarpaa. Aamma naammaginartumik aalisarneq pillugu isumaqatigiissuteqartoqartillugu Kalaallit Nunaat aalisakkanit tunisassianik EU-mut akitsuuserneqanngitsunik tunisaqarsinnaavoq. Aamma nunat nunasiaataasimasut kattuffiata EF-imut kattussimanerat pillugu aalajangiinermi Kalaallit Nunaata inissisimanini aqqutigalugu Kalaallit Nunaat EU-mut atassuteqartinneqarpoq.