Kimberley Process

Kalaallit Nunaat EU-mut atassuteqarnini aqqutigalugu februar 2015-imi Kimberley-mi suliamut pisortatigoortumik ilanngunneqarpoq.

Siunnersuisoqatigiit aalajangiinerisigut Kalaallit Nunaat EU-mik suleqateqarnini aqqutigalugu diamantit silisaanngitsut pillugit Kimberley-mi sulinermi akuersissuteqartarnermik aaqqissuussinermut peqataasinnaalerpoq. Tamatumani piumasaqaataavoq diamantit silisaanngitsut avammut nioqqutigineqarnissaannut EU-mi oqartussat uppernarsaallutillu akuersissuteqartussaanerat.

Taamaammat diamantinik silisaanngitsunik Kalaallit Nunaanni niueruteqarneq EU-mi malittarisassat naapertorlugit ingerlanneqassaaq. Kalaallit Nunaat diamantinik silisaanngitsunik taamaallaat Kimberley-mi sulinermi akuersissuteqartarnermik aaqqissuussinermut peqataasunut allanut niueruteqarsinnaavoq, tassa EU-mi oqartussanit akuersissummik pissarsisimaguni. Aamma diamantinik silisaanngitsunik Kalaallit Nunaannut eqqussuinissaq EU-mi oqartussanit akuersissutigineqartussaavoq. Nunat tamalaat EU-mi niuernissamut malittarisassat naapertorlugit Kalaallit Nunaanni diamantinik silisaanngitsunik niueruteqarnissaat akuerineqassappat Kalaallit Nunaat pisussaavoq EU-mut tunngatillugu peqqussummi aalajangersakkanik Kalaallit Nunaanni inatsimmut ilanngussinissamut atuutsitsilernissamullu.

Kimberley-mi sulinernut ilaasortat 54-iupput, tassani EU ilaasortatut ataatsitut isigineqarluni. Kalaallit Nunaat nunat nunasiaataasimasut kattuffiannut  (OLT)  ilaasortatut aningaasaqarnerup isumaginninnerullu ineriartortinneqarnerisa iluini EU-mi ikiorserneqarnissamut pisinnaatitaavoq, taamaammat Kalaallit Nunaat EU-mik suleqateqarnini aqqutigalugu Kimberley-mi sulinermut peqataavoq. Ilaasortaanerup malitsigisaanik Kalaallit Nunaat diamantinik silisaanngitsunik nunanut Kimberley-mi sulinermut peqataasunut taamaallaat niueruteqarsinnaavoq.

Kalaallit OLT-mi ilaasortanit siullersaalluni Kimberley-mi sulinermut peqataatinneqarpoq.

Linki ataaniittoq Kalaallit Nunaat pisortatigoortumik ilaatinneqarnissaanut atugassiaavoq.