AtuartigukSuliffeqarfiutit fast-trackimut nalunaarutigiuk
Nassiussisuuvoq: Isumaginninnermut, Suliffeqarnermut Nunamullu Namminermut Naalakkersuisoqarfik
Kalaallit Nunaani tamarmi suliffeqarfiit Isumaginninnermut Sulisoqarnermullu Naalakkersuisoqarfimmut nassiussillutik maanna qinnuteqarsinnaalerput.
Sulisartunik nunanit allaneersunik inuttassarsiornermut fast-trackimik isumaqatigiissummut sioqqutsisumik akuerisaasutut suliffeqarfiit allattorsimaffiannut ilaalissagunik suliffeqarfiit taamatut iliussapput.
Allanngorarsinnaassutsip nukittorsarnera
Fast-trackimik isumaqatigiissutip siunertaraa nunanit allamiunik inuttassarsiornermi allanngorarsinnaassutsip nukittorsarniarnera, tassani ukiup ilaani annikitsumik suliffissaaleqisoqarfimmi sulisartunik nunat allamiunik pisariaqartitsineq ikiorserniarneqarluni, taamatullu inuussutissarsiorfiit ilaanni annertuumik suliffissaaleqisoqassappat Naalakkersuisut fast-trackimik isumaqatigiissummik atorunnaarsitsisinnaallutik.
Suliap isumagineranut piffissaq atugaq
Namminersorlutik Oqartussani fast-trackimik aaqqiissutip pissarsiariniarnerani suliap isumaginerani piffissap atukkap ullunik 14-inik sivisussuseqassanera, sioqqutsisumillu akuerisaanerup suliarinerata ukiut pingasut tikissinnaassagaat naatsorsuutigineqarpoq.
Sioqqutsisumik akuersissutip utertinneqarnera
Sioqqutsisumik akuersissutip utertissinnaanissaanut aallaaviatigut makku piumasaqaataapput:
- Suliffeqarfiup atorfinitsitsinermut isumaqatigiissummik annertuumik sumiginnaasimanera.
- Sullivimmi avatangiisinut inatsimmik annertuumik sumiginnaasoqarsimaneq.
- Suliffeqarfiup akiliisinnaajunnaarnera.
Qinnuteqaatip minnerpaamik makku imarissavai:
- Suliffeqarfiup cvr-normua, aamma suliffeqarfiup taaguutaa.
- Suliffigisassap suussusaanut isumaqatigiissut, soorlu igasumut, eqqiaanermi ikiortimut, sanasumut assingusumulluunniit.
- Annikinnerpaatut nalinginnaasumik nunatsinni pissutsit assingannik aningaasarsianut atorfinitsitaanermullu pissutsinut paasissutissat.
- Suliffeqarfik Kalaallit Nunaanni qullersaqarfeqarluniluunniit immikkoortortaqarfeqassaaq.
- Aningaasarsiat Danmarkimi imaluunniit nunatsinni aningaaserivimmut akiliutigineqassapput.
Suli.gl-imi suliffeqarfiit allattorsimaffiat
Fast-trackimik isumaqatigiissummut suliffeqarfiit akuerisat www.suli.gl-imi takuneqarsinnaajuassapput.
Paasissutissat sukumiinerusut pissarsiariniarukkit Sulisoqarnermi Naalakkersuisoqarfimmi Immikkortortami pisortaq Lona Lynge attavigiuk, mailikkut: isn@nanoq.gl aamma oqarasuaatikkut: 34 56 24