30. december 2005

Ulloq 30. decemberi 2005-mi Naalakkersuisut ataatsimiinnerat

2006-2009-imut Inatsisartut aningaasanut inatsisissaannut siunnersuut.

Naalakkersuisut aalajangerput:

  • 2006-imut aningaasanut inatsisissatut siunnersuut inaarsarneqassasoq killissaritinneqartut iluanniittut naapertorlugit, taamaattorli imaalillugu taakkununnga naleqqiullugu Inerisaavimmut aningaasartuutaanerusussat 2006-imi 2 mio. kr.-it aamma ukiuni missingersuusiorfiusuni tamani 3 mio. kr.-it aningaasalersorneqassasut taakku amerlaqataanik ilinniartitaanermut pilersaarummut aningaasat atugassat ikilineqarnerisigut, aamma imaalillugu peqqinnissaqarfimmi napparsimasut pillugit nalunaarsuutinut eletroniskiusunut aningaasaliissutit ikilisinneqarlutik, siusinnerusukkut aningaasanut inatsisissamut siunnersuummi ilaatinneqareersut amerlaqataannik.
  • Naalakkersuisut aalajangernerisa ilanngulluguttaaq nassataraa, Royal Greenland A/S attaveqarfigineqassasoq aalisartut ikummatissanut aningaasartuutaasa qaffakkaluttuinnarneri pissutaalluni tunisinermi akit iluarsiissuteqarfigineqarsinnaanerat siunertaralugu. Taakku saniatigut aalisarnermut aningaasalersuisarnermut aaqqissuussinermut atatillugu isumaliutigineqassaaq 2006-ip ingerlanerani killilimmik suliniutinik aallartitsisoqarsinnaanersoq, soorlu inuussutissarsiutinut tapersiissuteqartarnermik aaqqissuussinerup iluarsiissuteqarfigineqarneratigut, taamaaliornikkut 2006-imi aningaasat immikkoortinneqartut ilaat 2006-imi atorneqalereerlutik
  • Isumaqatigiissutigineqarpoq 22. dec. saqqummiunneqartumi immikkoortut 7 aamma 8 allanngortinneqassasut, takkununngalu taarsiullugu Ineqarnermut Angallannermullu Pisortaqarfimmiit tusarniaanermi allanngortitsinissamut siunnersuutigineqartut aallaaviussallutik.
  • Aningaasanut inatsisissatut siunnersuut Naalakkersuisut inaarutaasumik 11. januar 2006-imi suliarissavaat, tassanilu aamma isummerfigineqassaaq apeqqut Nuummi Tuapannguani inissiarsuit iluarsaatiinnarneqassanersut imaluunniit piiarneqarsinnarlutik nutaanik piginneqatigiilluni pigineqartunik inissianik taarserneqassanersut.
  • Siunissami sanaartugassanut annertuunut atatillugu isumaqatigiissutigineqarpoq avataaniit aningaasalersorlugit ingerlanneqarsinnaanerat pillugu suliat Aningaasaqarnermik Pisortaqarfimmit aammalu Ineqarnermut Angallannermullu Pisortaqarfimmit suleqatigiilluni ingerlanneqartassasut

Paasissutissat sukumiinerusut Aningaasaqarnermut Pisortaqarfimmi pisortamut Peter Bech oqarasuaat 34 50 00 saaffiginnilluni pissarsiarineqarsinnaapput

EU-p Kalaallillu Nunaata akornanni nutaamik peqatigiinnissamut isumaqatigiissummut inatsisitigut toqqammavissamut tunngatillugu.

Naalakkersuisut aalajangerput:

  • Kommissioni nalunaarfigineqassasoq peqatigiilluni suleqatigiilernissami EU-p isumaqatigiissutaani art. 187 inatsisitigut toqqammavittut atorneqarsinnaaneranut naalakkersuisut tapersiisinnaasut,
  • ataatsimoorussatut nalunaarutip ilusiligaaneranut immikkuullarissumillu OLT-mi aalajangiisoqarnissaanut naalakkersuisut tapersiisinnaasut,
  • ataatsimoorussamik nalunaarut pillugu immikkuullarissumillu Kalaallit Nunaannut OLT-mi aalajangiinermik "qajamik" taallugu isumaqatigiissut toqqammavigalugu isumaqatiginninniartutut aallartitat isumaqatiginninniarsinnaanermut piginnaatitaassasut
  • manna tikillugu Kalaallit Nunaannut aningaasaqarnikkut taarsiissuteqartarnerit tamarmiusut pigiinnarneqarnissaat siunniunneqassasoq
  • aningaasaqarnikkut isigalugu aalisarnermut isumaqatigiissutip peqatigiinnissamullu tunngasup immikkoortinneqarnissaat pissasoq
  • suleqatigiinnissami aggersumi matumani aningaasatigut akiliutigineqartartut pisariinnerpaamik aqunneqassasut
  • inaarutaasumik oqaasertalersuinerit akuerineqarnissaat sioqqullugu naalakkersuisunut ingerlaavartumik ilisimatitsissutigineqarlutillu saqqummiunneqartassasut

Paasissutissat sukumiinerusut Aningaasaqarnermut Pisortaqarfimmi pisortamut Peter Bech oqarasuaat 34 50 00 saaffiginnilluni pissarsiarineqarsinnaapput

2006-imi aalisakkanut raajaanngitsunut saattuaanngitsunullu TAC-nik aalajangersaaneq.

Naalakkersuisut aalajangerput, Ilanngussaq aammalu saqqummiussaq una tassanilu oqaaseqaatit tunngavigalugit aalisakkanut qulaani taaneqartunut TAC-mik aalajangersaasoqassasoq.

Paasissutissat sukumiinerusut Aalisarnermut Piniarnermullu Pisortaqarfimmi pisortamut Amalie Jessen oqarasuaat 34 50 00 saaffiginnilluni pissarsiarineqarsinnaapput

2006-mi raajanut TAC-mik aalajangersaanissaq pillugu.

Naalakkersuisut aalajangerput, saqqummiussaq una tassanilu oqaaseqaatit tunngavigalugit 2006-imi raajanut TAC-mik aalajangersaasoqassasoq.

Paasissutissat sukumiinerusut Aalisarnermut Piniarnermullu Pisortaqarfimmi pisortamut Amalie Jessen oqarasuaat 34 50 00 saaffiginnilluni pissarsiarineqarsinnaapput

2006-imi saattuanut TAC-p aalajangerneqarnera pisassiissutillu agguaanneqarnerat pillugu.

Naalakkersuisut aalajangerput:

  • 2006-imi saattuarniarnissami TAC-tut kiisalu piumasaqaatissatut innersuussutaasut allat uani innesuussutigineqartut aalakkersuisunit akuerineqassasut
  • Peqqissutsimut, Avatangiisinullu Naalakkersuisoq Asii Chemnitz Narup kissaateqarpoq imaqarniliamut allanneqassaaq Pinngortitaleriffiup saattussat pillugit siunnersuinera, mianersoqqussutilik, malillugu pisassiisoqartariaqartoq

Paasissutissat sukumiinerusut Aalisarnermut Piniarnermullu Pisortaqarfimmi pisortamut Amalie Jessen oqarasuaat 34 50 00 saaffiginnilluni pissarsiarineqarsinnaapput

Pineqartoq NEAFC-imi ukiumoortumik ataatsimiinnermi isumaqatiginninniarnerit akuersissutigineqarnissaat.

Naalakkersuisut aalajangerput, Isumaqatiginninniarnermi angusat akuersissutigineqassasut.

Paasissutissat sukumiinerusut Aalisarnermut Piniarnermullu Pisortaqarfimmi pisortamut Amalie Jessen oqarasuaat 34 50 00 saaffiginnilluni pissarsiarineqarsinnaapput

Sinerissamut qanittumi raajarniarnermi ineriartornermut tunngatillugu ataatsimiititaliamiit nassuiaatit sisamaat kiisalu piffissami aggersumi raajanut sikulersukkanut tunisinermi tapiissutinut tunngatillugu inassuteqaatinut isummernermut tunngasoq.

Naalakkersuisut aalajangerput:

  • sinerissamut qanittumi raajarniarnerup ineriartorneranut tunngasumik Ataatsmiititaliap nassuiaataa tusaatissatut tiguneqassasoq, tamatumalu kingorna taamatut isikkoqartillugu tamanut saqqummiunneqarsinnaasoq.
  • piffissami ataatsimiititaliap tullianik nassuiaasiornissaata tungaanut, 2006-imi martsimi naalakkersuisunut nassiunneqartussatut naatsorsuutigineqartup, raajanut sikulersukkanut tunisinermi tapiissutinik akiliisoqassanngitsoq

Paasissutissat sukumiinerusut Aalisarnermut Piniarnermullu Pisortaqarfimmi pisortamut Amalie Jessen oqarasuaat 34 50 00 saaffiginnilluni pissarsiarineqarsinnaapput

Kalaallit Nunaanni Aatsitassat pillugit Siunnersuisoqatigiit siulittaasoqarfiannit suliaq inassutigineqartoq.

Naalakkersuisut aalajangerput, Immikkoortup siulliup 2006-imi aprilip aallaqqaataanut sivitsornissaanut Seqi Olivine A/S-ip qinnuteqaataa akuerineqassasoq; aamma, Immikkoortumi siullermi piiagassatut olivini 120.000 tons-imiit 160.000 tons-inngortinneqassaanut Seqi Olivine A/S-ip qinnuteqaataa akuerineqassasoq.

Paasissutissat sukumiinerusut Aatsitassanut Ikummatissanullu Pisortaqarfimmi pisortaq Jørn Skov Nielsen oqarasuaat 34 50 00 saaffiginnilluni pissarsiarineqarsinnaapput

Nuussuarmi, Upernavik kommune, qaleralinnik pisiortortussamik umiarsualiinissamik qinnuteqaat pillugu.

Naalakkersuisut aalajangerput, Nujus ApS nalunaarfigineqassasoq Nuussuarmi qaleralinnik pisiortortussamik umiarsuarmik tunitsiviliinissamik qinnuteqaat maannakkuugallartoq akuerineqarsinnaanngitsoq.

Paasissutissat sukumiinerusut Aalisarnermut Piniarnermullu Pisortaqarfimmi pisortamut Amalie Jessen oqarasuaat 34 50 00 saaffiginnilluni pissarsiarineqarsinnaapput