Ukiut pingasut sinnerlugit ingerlareersullu Naalakkersuisut isumaqatigiissitsiniarnermut eqqartuussivimmi taperserneqarput

Suliassaq Greenland Minerals A/S-ip Naalakkersuisut suliakkiullugit suliassanngortitaa, isumaqatigiissitsiniarnermut eqqartuussivimmi suliarineqarsinnaanersoq pillugu isumaqatigiissitsiniarnermut eqqartuussivik ulloq 28. oktober aalajangiivoq.

Isumaqatigiissitsiniarnermut eqqartuussivik aalajangiivoq Kuannersuarni aatsitassanik piiaanissamut pisinnaatitaaneq pillugu apeqqut isumaqatigiissitsiniarnermut eqqartuussivimmi suliarineqassanngitsoq aammalu danskit naalagaaffit suliami peqataasinnaanngitsoq.

Suliassaq Greenland Minerals A/S-imit ulloq 22. marts 2022 isumaqatigiissitsiniarnermut eqqartuussivimmut suliakkiissutigineqarpoq. Greenland Minerals A/S-ip piumasaa naapertorlugu Kuannersuarni aatsitassanik piiaanissamut akuersissummik tuniussinissamik Naalakkersuisut pisussaaffileqquneqarput.

Suliassaq uranimut inatsisip akuerineqarneranit pinngorpoq, tassani uranimik misissueqqaarnissaq, aatsitassarsiorluni misissuinissaq piiaanissarlu inerteqqutigineqarmat. Ingerlatseqatigiiffiup sumiiffimmi akuersissuteqarfigisaani piiaanissamut akuersissummik tunniussisoqarsinnaanera inatsimmi akornuserneqarpoq, tassami uranimik akoqarnera uranimut inatsimmi killissat minnerpaaffissai qaangerlugit annertussuseqarmat.

Ingerlatseqatigiiffiup suliassaq isumaqatigiissitsiniarnermut eqqartuussivimmut suliakkiissutiginiarlugu toqqarmagu Naalakkersuisut tupaallaatigaat, tassami Naalakkersuisut naliliillutik aalajangiineri eqqartuussivinnut taamaallaat suliakkiissutigineqarsinnaammata, aammalu isumaqatigiissitsiniarnermut eqqartuussivik suliami aalajangiinissamut piginnaatitaanngitsoq, suliap ingerlanera tamaat Naalakkersuisut aalajangiusimavaat. Taamaattumik isumaqatigiissitsiniarnermut eqqartuussiviup aalajangiinera naatsorsuutigineqareerpoq.

Isumaqatigiissitsiniarnermut eqqartuussiviup aalajangiinermini, eqqartuussivik siunissami apeqqut taanna isumaqatigiissitsiniarnermut eqqartuussiviup piginnaatitaaffiiniittoq isumaqassagaluarpat, taarsiissutissap annertuussusissaa pillugu apeqqummut aalajangiinissamut periarfissaqarnissaminut isumaqatigiissitsiniarnermut eqqartuussivik imminut pisinnaatippoq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq:

”Naalakkersuisut aalajangiineq naammagisimaartorujussuuaat. Soorunami suliassap tassunga tunngasortaa maannakkut naammassimmat, aammalu ajugaagatta, oqiliallannattorujussuuvoq. Kisianni suliassaq eqqartuussivinni ingerlaannartussaavoq, tassami Greenland Minerals A/S Nunaatta Eqqartuussiviani aammalu Københavnimi byret-imi, isumaqatigiissitsiniarnermut suliassamisut piumasaqarluni, aamma suliassanngortitsivoq. Suliassat taakkua aallartinnerminni killiffeqarput, taamaattumik aqqut suli sivisusussaavoq. Minnerunngitsumillu ajugaaneq manna pingaaruteqarpoq aammalu aningaasartuutit Namminersorlutik Oqartussat suliassamut aningaasartuutigisimasai maannakkut Greenland Minerals A/S-imit matussuserneqartussanngorput. Naalakkersuisut suli isumaqarput suliassaq tunngaviusumik aalajangigassaasoq, maannakkullu nukissaqaleqqillutik ingerlaqqissallutik.”

Paasisaqarnerorusukkuit Naalakkersuisoqarfimmi pisortaq Jørgen T. Hammeken-Holm joeh@nanoq.gl-ikkut attavigiuk