AtuartigukPiniartunut tapersersuiinnarnissamut ilassutitut aningaasaliissutit qulakkeeripput
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Great Greenlandip puisit amiinik pisiortorneranut 3 mio. koruuninik ilassutitut aningaasaliissuteqarnissaq, Naalakkersuisut 2024-mi novembarip 27-ani akuersissutigaat. Kalaallit Nunaanni isorliunerusuni piniartunik ingerlatseqatigiiffiup tapersersuiinnarsinnaanissaa, ilassutitut aningaasaliissutit qulakkeeriissavaat. Ilassutitut aningaasaliissutissat Aningaasaqarnermut Akileraartarnermullu Ataatsimiititaliamit ullumikkut akuersissutigineqarput, maannalu aningaasat atugassanngortinneqarsinnaalerlutik.
Aalajangiinermut tunuliaqutaasoq
Ukioq manna puisit amii tunisat siorna tunisanut sanilliullugit aatsaat taamak amerlatigalutik 31 %-mik amerleriarsimanerat, 3 millioner koruuninik pisariaqartitsinermi ilaatigut peqqutaavoq.
Taassumap kingunerisaanik 2024-mi puisit amiinik tunisinermut tapiissutissatut aningaasanut inatsimmi aningaasaliissutaaqqaartut manna sipporneqarput, tamannalu pillugu Great Greenland ukiup sinnerani tapiissuteqaannarsinnaaqqullugu ilassutitut aningaasaliiffigineqarluni.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen, ima oqarpoq:
”Ukioq naallugu puisit amiinik tunisisinnaanissap pingaaruteqassusia ilisimagatsigu, ukioq naallugu tunisisoqarsinnaanissaa Naalakkersuisut qulakkeerusussimavaat. Ajornartorsiutaasoq piaartumik aaqqiissuteqarfigineqarsinnaanngorlugu, Aningaasanut Akileraartarnermullu Ataatsimiititaliap suliaq piaartumik suliarimmagu qujamasuutigaarput”.
Annertunerusumik paasisaqarusunnermi attavissaq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik Email: asn@nanoq.gl, Oqarasuaat: +299 34 50 00