Kalistat Lund: Inuit silap pissusiata allannguutaanit eqqugaanerpaat tusarnaarneqartariaqarput – aamma silap pissusianut aningaasaliissutit atorlugit taarsiiffigineqartariaqarput

Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund Green Overseas Climate Finance Forum-imut, Bruxelles-imi ingerlanneqartumut peqataavoq, tassanilu oqalugiartunut pingaarnernut ilaavoq. Oqalugiaammi nunat, suli namminersulerlutik naalagaaffinngunngitsut, tamatumali peqatigisaanik silap pissusiata allannguutaasa kingunerini qitiulersimasut silap pissusianut aningaasaliissutinik pissarsisinnaannginneranni ajornartoortarneq aallaavigineqarpoq.

Green Overseas Climate Finance Forum, 7.-11. oktobarimi, Bruxelles-imi ingerlanneqartoq EU-p aamma Tuluit Nunaata nunat imarsuaq ikaarlugu nunaatigisaasa nunallu immikkoortuisa silap pissusianut aningaasaliiffigineqarsinnaanerinut tunngasuuvoq. Ukioq manna Silap Pissusianut Isumaqatigiissutip ataani silap pissusia pillugu isumaqatiginninniarnerit nunat peqataasut, “nunanut suliffissuaqarfiusunut” aamma “nunanut ineriartortitanut” agguarneqarput. Agguaanermi tassani nunat, Kalaallit Nunaattut ittut – aamma Nunat Inoqqaavi nunarsuarmit tamaneersut – pingaartumik silap pissusianut aningaasaliissutit pineqartillugit, silap pissusia pillugu isumaqatiginninniarnerni immikkoortiterinerit pioreersut avataaniittut eqqarsaatigineqartanngillat.

Naalakkersuisoq Kalistat Lund-ip Kalaallit Nunaanni – aammalu nunani peqataasuni allani – silap pissusiata allannguutaanik ullut tamaasa misigisaqartarnitta, illuatungaatigullu oqaluttuarisaanerput peqqutigalugu silap pissusianut aningaasaliissutinik pissarsisinnaannginnitta ajornartoorfiunera aallaavigaa. Naalakkersuisoq Kalistat Lund oqalugiarnermini oqarpoq, nunanut, silap pissusia pillugu isumaqatiginninniarnerni immikkoortiterinerit pioreersut avataaniittunut silap pissusianut aningaasaliisernernik pilersitsinissamut piffissanngortoq.

”Nunat Green Overseas Climate Finance Forum-imut peqataasut assigiissuterpassuaqarput. Oqalugiaatinni assigiissutigut eqqartorpakka, aammalu ataatsimoorluta nipimik, nukittuunngorluni sakkortuunngorlunilu annertusisinnaasumik pilersitsinissarput, taamaalillutalu nunanit tamalaanit isiginngitsuusaaginnarneqannginnissarput neriuutigalugu oqaatigaara. Tamanna taamaallaat naligiimmik naapertuuttumillu allannguinikkut, aammalu naligiimmik naapertuiffiusumillu inuiaqatigiit akiuussinnaasunngorlugit nukittorsarnerisigut pisinnaavoq. Taamaattumik ataatsimoorluta silap pissusiata allannguutaasa kingunerinut ikiorserneqarnissarput noqqaassutigisariaqarparput. Silap pissusiata allannguutaasa ullut tamaasa sunnigaannut – tassalu inuiaqatitsinnut – iluaqutaasumik”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Oqalugiaat kalaallisut, tuluttut aamma danskisut pissarsiarineqarsinnaavoq

Green Overseas Climate Finance Forum
Green Overseas Climate Finance Forum-imi EU-mi aamma Tuluit Nunaata nunat imarsuaq ikaarlugu nunaatigisaasa nunallu immikkoortuisa (OCT-t) silap pissusianut aningaasaliissutinik pissarsisinnaaneq pineqartillugu unammilligassaat aallunneqarput. Oqalliffimmi nunat silap pissusianut aningaasaliissutinik pissarsisinnaanerinik pitsannguinissaq, aammalu silap pissusiata allannguutaannut, soorlu immat qaffannerinut uumassusillillu assigiinngisitaarnerini annaasaqartarnermut akiuussinnaanerulernissaq siunertarineqarpoq.

Oqallinneq 2024-mi 7. – 11. oktobarimi Bruxelles-imi ingerlanneqarpoq, tassanilu nunat OCT-t silap pissusianut aningaasaliissutinik pissarsisinnaanerinut akimmisaarfinnik qaangiinissamut ikiorneqarnissaannut periusissianik ineriartortitsinissaq siunnerfigalugu, OCT-t naalakkersuisui, namminersortut, inuiaqatigiit inuinnaat, inuusuttut attaveqaataasa aamma nunani tamalaani suliniaqatigiiffiit aallartitaat katersuupput.

Suliniut Green Overseas Program-ip siammasinnerusumik atuuttup, EU-mit aningaasaliiffigineqartup, aamma Expertise France-mit atuutsinneqalersup ilagaa. Pilersaarummi nunarsuup immikkoortuini sunnertiasuni taakkunani piujuartitsinerup, akiuussinnaanerup akuutitsiviusumillu ineriartortitsinerup siuarsarneqarnissaa siunnerfigineqarpoq, silap pissusianut naleqqussarnissaq nukissiornermilu nuussisarnissaq immikkut aallunneqarlutik.

Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaaq.