Inuit innarluutillit sapaatip akunnerat: Ulluinnarni naleqartitat – Ulluinnarni ingerlalluarneq nammineernerunerlu

Inuit innarluutillit sapaatip akunneranni 41-mi inunnut innarluutilinnut ulluinnarni inuunerup pitsaassusaa ulluinnarnilu inuuneq ingerlalluarlunilu namminersorfiunerusoq qitiutinneqartarpoq.

Ulluinnarni inuuneq innarluuteqarluni inuuneqarnerup arlalippassuartigut sunnersinnaasarpaa.

Inuk piginnaasakinnerulersimasoq ulluinnarni suliarisartakkat, soorlu assersuutigalugu allaniit ikiorneqarani qulinnermik, støvsugernermik imaluunniit naatsiianik qalipaajaanermik naammassinninnissaminut sapersinnaasarpoq ajornakusoortitsilluniluunniit.

Allaniit ikiorneqarani ulluinnaat ingerlassinnaanissaanut periarfissaqarneq inuup piginnaasakinnerlulersimasup inuunerata pitsaassusaanut aamma isumalerujussuusinnaavoq. Taamaattoq piginnaanikinnerulernerup suussusaa sakkortussusaatalu annertussusaa apeqqutaalluni allanngorarpoq. Inuit ilaasa allaniit ikiorneqanngiivillutik ulluinnartik ingerlassinnaasarpaat, allat ulluinnarminni tapersersorteqarnissartik suli pisariaqartissinnaasarpaat, kisianni attaveqarnissaminnut, aalasinnaassutsimikkut ineriartornissaminnut periarfissaqarnerusinnaallutik imaluunniit inuunerissaarnerulerlutik.

”Inuit ataasiakkaat piginnaasaminnik piviusunngortitsinissaminnut inuiaqatigiinnilu peqataanissaminnut periarfissaqarnissaat Naalakkersuisut innarluuteqarnermut politikiata ilaatigut aallaavigaa. Inuit piginnaasakinnerulersimasut ulluinnarminni timikkut ersinngitsutigullu aporfeqartarput taamaattumillu inuiaqatigiittut innuttaasunut tamanut ilanngutititsinerusutut suli ineriartuaarnissarput pingaaruteqarpoq.” taama oqarpoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede.

Ikiuutit teknologiilu allannguisinnaasorujussuupput, taakkua atorlugit inuit piginnaasakinnerulersimasut sammisassanik ingerlataqalersitsisinnaasarput imaluunniit assigiinngitsutigut ajornarsimagaluartumik attaveqaqateqarsinnaalersarput.

Aningaasanik qinnuteqartoqarsinnaasoq
Taamaattumik inuit innarluutillit sapaatip akunneranni ulluinnarni teknologiit ikiuutillu sammisassanut, peqataanissamut, imminut ikiorsinnaanissamut inuillu innarluutillit atugarissaarnerannut ikorfartuutaasinnaasut immikkut ukkatarineqarput.

Innuttaasunut ataasiakkaanut angerlarsimaffimmiittunut atuuppoq, kisiannili aamma inuit innarluutillit ulluinnarni inuunerisa pitsaassusaannik qaffaanissamut ikiuutit teknologiillu inuiaqatigiittut qanoq atuisinnaanitsinnut atuuppoq – angerlarsimaffimmi, atuarfimmi, suliffimmi aamma ulluinnarni aamma ulloq unnuarlu neqeroorutini.

Inuit innarluutillit sapaatip akunneranut atatillugu ikiuutinik teknologiinillu ulluinnarminnut inuunerullu pitsaassusaanut ikiuutaasimasunut atuisimanerminnit misilittakkaminnik avitsissasut Isumaginninnermut Aqutsisoqarfik tamanut kaammattuivoq.

Innuttaasut susassaqartullu attuumassutillit aaqqissuussanik ingerlataqarnissamut tapiiffigineqarnissaminnik qinnuteqarsinnaapput, aaqqissuussat ulluinnarni naleqartitanik ulluinnarnilu ingerlalluarneq nammineernerunerlu qitiutillugit.

Kikkut tamarmik qulaani allassimasumik aaqqissuussanik ingerlataqarnissamut tapiiffigineqarnissaminnik qinnuteqarsinnaapput una aqqutigalugu socialstyrelsen.gl. Qinnuteqarfissaq kingulleq tassaavoq sapaat septembarip 22-at.

Inuit innarluutillit sapaatip akunnerani sammisassanut tapiissuteqarneq pillugu apeqqutit uunga nassiunneqassapput iass@nanoq.gl.



Attavissaq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.