AtuartigukNajugaqavissut akuutinneqarnissaat ilisimasaallu ilaatinneqarnissaat qulakkeerneqassaaq – Kalaallit Nunaata kitaani nuna allanngutsaaliugaq iluatsissappat, taakku pingaaruteqarput
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Kalaallit Nunaata kitaani nunamik allanngutsaaliukkamik nutaamik pilersitsinissamut atatillugu Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik EU-mit kiisalu Wild Nature Foundation-imit aallartitanik, kiisalu silaannarsualiartartumik Andreas Mogensen-imik tikeraartoqarpoq. Maanna nuna allanngutsaaliugaq pillugu suliap tullia aallartippoq, tassanilu kommunini innuttaasut najugaqarfimmilu takornariartitsisartut sumiiffimmik atuinerat pillugu ilisimasanik katersuissaaq.
Qaammatini kingullerni Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik EU-mit Wild Nature Foundation-imillu sinniisut aallartitanik aamma silaannarsualiartartumik Andreas Mogensen-imik, kingullermut taaneqartumut naalagaaffiit oqaasissaqartitamittut aallartitaasumik tikeraartoqarpoq. Sinniisut aallartitat tikeraarnerisa naammassineqarnerani nunami allanngutsaaliukkami suliassap immikkoortua tulleq – pingaarnerlu – nunap allanngutsaaliukkap iluatsinnissaanut tunngaviliisussaq aallartippoq. Tassanilu najugaqartut aammalu sumiiffinnik atuisut qanittumik akuutinneqarnissaat ilisimasaannillu katersuinissaq pisariaqartinneqarpoq. Innuttaasut sumiiffimmilu atuisut qanillugit akuutinneqarneranni nunap allanngutsaaliukkap ineriartortinneqarneranut atatillugu innuttaasut sumiiffimmi sammisaasa pitsaanerpaamik eqqarsaatigineqarnissaat qulakkeerneqassaaq. Piffissami aggersumi ilisimasat katersukkat inerneri, aammalu innuttaasunik ataatsimiititsinerit nunamut allanngutsaaliukkamut nalunaarusiassamut missingiusiornermi aallaaviussapput. Aatsaat ilisimasanik katersuisoqareerpat, aammalu innuttaasunik ataatsimiisitsisoqareerpat suliassaqarfimmut killigititassat malittarisassiassallu aalajangiunneqartussaapput.
”Qeqqata Kommunia aamma Kommune Qeqertalik innuttaasut najukkamilu takornariartitsisartut sumiiffimmik, nunap allanngutsaaliukkap nutaap ilagisassaatut naatsorsuutigineqartumik atuineranni ilisimasanik katersuillutik sulipput. Ilisimasanik katersuineq nuna allanngutsaaliugaq pillugu nalunaarusiassamut tunngaviliissaaq”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq nangillunilu:
”Innuttaasut atuisullu sumiiffik pillugu ilisimasaat qulakkeerneqassapput, pinngitsuuinnatillu suliap ingerlaqqinneranut atorneqassallutik. Taamaalilluni nunap allanngutsaaliukkap ineriartortinneqarneranut atatillugu najugaqartut sumiiffimmi sammisaat pitsaanerpaamik eqqarsaatigineqassapput. Uteqqikkusuppara sumiiffimmi innuttaasut nunami angalasarnerminnik ingerlatsiinnarsinnaanertik ilisimassammassuk. Nunami allanngutsaaliukkami eqqissisimaarniarunik nukissanillu katersiniarunik – imaluunniit umimmanniarunik aavarniarunilluunniit. Sumiiffimmik atuisut nunanik nuannarisaminnik ornitaqartarnertik ingerlatiinnarsinnaavaat. Taamatut pinngortitamut atassuteqarneq kipineqanngisaannassaaq”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund naggasiivoq.
Ilisimasanik katersuineq najugaqavissullu akuutinneqarneri siunertanut pingasoqiusanut qulakkeerissapput
Kalaallit Nunaata kitaani nunami allanngutsaaliukkami nutaami siunertaasoq – aammalu ilisimasanik katersuinermi aallartinneqartumi peqqutaasoq – tassaavoq, innuttaasut ilaatigut piniariarlutik aalisariarlutillu sumiiffimmik atuinnarnissaannik qulakkeerinissaaq. Tamatuma peqatigisaanik masarsoqarfiit, pinngortitami naleqartitat kulturikkullu kingornussat illersorneqarnerisa ingerlaannarnissaa qulakkeerneqassaaq. Kiisalu piujuartitsinissamut takornariaqarnermi atugassarititaasut najukkani innuttaasunut, takornariartitsisartunut inuiaqatigiillu aningaasaqarnerannut iluaqutaasumik qulakkeerneqassapput. Ilisimasanik katersuinerit siunissamut ungasissumut piujuartitsinissamut periusissiamut tunngaviliissapput, aammalu kinguaariinni tulliuttut pinngortitamik alianaatsorsuarmik asseqanngitsumik atuisinnaanissaat – ilinniarfeqarsinnaanissaallu – qulakkeerneqassalluni.
”Suliaq 2020-mili aallartinneqarmat suliami siunertaasoq pillugu nassuiaateqarniarluta innuttaasunik ataatsimiitsitsisarsimavugut. Tamatuma peqatigisaanik Naalakkersuisuniit tapersersorneqarnerput, aammalu EU-p mingutsitsinngitsunut allannguinissamut aningaasaateqarfianit aningaasalersorneqarnerput nuannaarutigaarput. Taamatut tapersersorneqarnitsinni suliassap iluatsinnissaa ilimanaateqarluinnarpoq”, Qeqqata Kommuniani borgmesteri Malik Berthelsen oqarpoq.
Mittarfiit nutaat, aammalu nunap allanngutsaaliukkap nutaap, kommunimit aqunneqartussap atuutilernerini ukiuni tulliuttuni takornarissanik amerlanerusunik Kommune Qeqertalimmut pileritsatsitsisoqarsinnaassasoq naatsorsuutigaara. Tamanna najukkatsinni aningaasaqarnermut nukittorsaataassaaq, aammalu najukkatsinni takornariaqarnermit maannakkut ingerlasumi inuussutissarsiornermut suliatsinnillu iluanaarutissanik pissaganartunik pissarsinissamut periarfissaavoq. Naak takornariaqarneq annertusigaluartoq innuttaasut sumiiffimmi suli piniarsinnaapput, aammalu aallaqqaataaniit aqutsisinnaassallutik. Ilisimasanik katersuinermi kommunimi innuttaasut tusarneqarnissaat, taamaallunilu immikkut ittut inatsisiliornissamut akuutinneqarnissaat qulakkeerneqassaaq”, Kommune Qeqertarimmi borgmesteri Ane Hansen oqarpoq.
”Kangerlussuarmukarpunga Nuna allanngutsaaliugaq pillugu, kommunilu suleqatigiillutik pinngortitamik Wild Nature Foundation asseqanngitsumik illersuiniarluni pilersinniagaata aallunneqarnissaa siunertaralugu. Wild Natur Foundation-imi oqariartaaseq kusanartoq una atorneqarpoq; ”What you love, you will protect” – tamannalu sumiiffimmut maanga naleqqulluinnarpoq”, Andreas Mogensen tikeraarnerminut atatillugu oqarpoq.
-------------------
Paasissutissat
Nunap allanngutsaaliukkap killeqarfissai suli inaarutaasumik atuutsilerneqanngillat, killeqarfissanullu illersugassatut soqutigisat, inuussutissarsiortut soqutigisaat, najugaqartut soqutigisaat il.il. nunap assinganut nalunaarsorneqartussat apeqqutaassapput. Tassalu Naalakkersuisut Qeqqata Kommunia aamma Kommune Qeqertalik qanittumik suleqatigalugit atuinermi illersuinermilu soqutigisat nalunaarsuleruttorpaat, tassani innuttaasut sumiiffimmut orniguttarnerisa – iluaquteqartarnerisalu – ingerlaannarnissaanik qulakkeerinninnissaq immikkut pingaartinneqarluni.
Sumiiffiup angissusissaanut siunnersuummi kommuninit immersorneqarnerit qanittumilu oqaloqateqarnerit tunngavigineqarput. Suliassaq aqutsisoqatigiinnit, Qeqqata Kommunianit, Kommune Qeqertalimmit, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit, Aalisarnermut Piniarnermullu Naalakkersuisoqarfimmit, Inuussutissarsiornermut, Niuernermut, Aatsitassanik, Inatsisinik Atuutsitsinermut Naligiissitaanermullu Naalakkersuisoqarfimmit, Pinngortitaleriffimmit, Visit Greenlandimit aamma Wild Nature Foundation-imit aallartitanik ilaasortaqartunit aqunneqarpoq.
Suliassaq EU-miit Grøn Vækst-imut aningaasaliissutit atorlugit 2027 ilanngullugu aningaasalersorneqassaaq.
-------------------
Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaaq