Ajugaasut Ujarassioriup meeqqanut unammisitsinerani: “Ulluinnarni ujarassiornerup sunniutai”

Kinguaariinni nukarliunerusut Ujarassiorimmut unammeqataatinniarlugit, meeqqat atuarfianni unammisitseqqammerpugut, tassani meeqqat atuarfianni atuaqatigiiaat tamarmik qaaqquneqarlutik.

Sammisaqarfiusumi qulequtarineqarluni: “Ulluinnarni ujarassiornerup sunniutai”. Atuartut teknologip nalaani inuusugut eqqaatinniarneqarput, tassanilu ujarassiornermit tunisassiat tamani nassaassaasut, ulluinnatsinnilu pinngitsoorneqarsinnaanatik.

Sammisamut atuartut imminnut ilinniartipput. Atuartut nammineq soqutigisartik aallaavingalungu ulluinnarmi atortorissaarummik toqqaapput, atortorissaarullu toqqagartik qanoq atortussiassanik aatsitassaneersunik pisariaqartitsitiginersoq misissoqqissaarlugu.

Atuartut namminneq periusertik aallaavigalungu sammisamut paasisaminnik saqqummiussipput. Saqqummiussat Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmiit naliliiffigineqarput.

Ujarassiuut marluk tusagassiornermullu ilisimasalik ataaseq unammisitsinermi ajugaasunik toqqaapput:

1. Atuarfik Hans Lynge, Atuaqatigiit 2A, Nuuk: 5.000 kr
Unammisitsinermi ajugaasut, 2.A, Atuarfik Hans Lynge, smartphone pingaarnertut sammisimavaat. Plakatinik sisamanik saqqummiussaqarput, aatsitassat sorliit smartphone-liornermi pisariaqartinneqarnersut taakkunani saqqummiunneqarluni.

Taassuma saniatigut atuartut, klassenut saniliminnut misissueqqissaarisimanerminnik saqqummiussaqarput marlunnik, klassekkaarlungit atuartut qassit mobileqarnersut paasiniaasimanerminnit, sissamullu aneernerminni videoklip-imik aamma ilanngussisimapput, tassani atuartut ujaqqanik katersuipput immikkoortiteqqissaarlugillu.

Taakku saniatigut atuartut aamma logbog-inik marlunnik tunniussisimapput, tassanilu malittarineqarsinnaavoq sammisamut atatillugu qanoq ilinniartinneqarsimanersut.

Atuaqatigiit katillugu plakatinik sisamanik, videoklip-imik ataatsimik, naatsorsueqqissaarnermilu inernernik marlunnik nalilersugassanik nassitsisimapput.

Unammisitsinermi naliliisut atuaqatigiit sammisamut tunniusimalluarsimanerat, tunniussaasalu siammasillutillu inernerat nalilerluarsimavaat. Unammisitsinermi naliliisut aalajangersimapput atuaqatigiit akissarsiassamik annermik tunineqassasut.

2. Nuussuup Atuarfia, Klasse 6.A, Nuuk: 3.000 kr
Ajugaasut tullii, 6.A, Nuussuup Atuarfia, aamma smartphone-t sammisatut pingaarnertut toqqarsimavaat, tassani smartphone-t ilusilersorneqarnerat atortussiassallu pisariaqartinneqartut slides atorlungit saqqummiussimavaat.

Atuaqatiit marluk-/sisamakkaarlutik eqimattakkaarlutik suliaqarsimapput, smartphones-illu saniatingut ujarassiorneq sunaanersoq ilisaritissimallugu. Atuartut aamma Mohs-ip kigajaassusermut uuttuutaa saqqummiussaminnut ilanngussimavaat.

Atuaqatigiit katillugu plakatit marluk slides-illu arfineq marluk nalilersugassatut nassiussimavaat.

3. Nuussuup Atuarfia, Klasse 5.B, Nuuk: 2.000 kr
Ajugaasut pingajui, 5.B fra Nuussuup Atuarfia, aamma smartphone-t sammisatut pingaarnertut toqqarsimavaat. Atuaqatigiit smartphonet qanoq sananeqartarnerat atortussiassanillu pisariaqartitsinerat saqqummiussimavaat, tassumalu saniatigut oqarasuaatsit ineriartornerat saqqummiussaminni ilanngussimallugu.

Atuaqatigiit sammisamut atatillungu slides-imik saqqummiussamik ataatsimik nassitsisimapput. Tassuma saniatingut plakat-inik arfineq marlunnik aamma nalilersugassanik nassitsisimallutik.

Kalaallit Nunaanni atuarfiit tamarmik unammisitsinermut uunga qaaqqusaanikuupput.

Atuartut unammisitsinermi peqataasut tamarmik immikkut atuartinneqarnikuunngillat, sammisarlu ” Ulluinnarni ujarassiornerup sunniutai”, nammineq ilinniutit toqqakkatik atorlugit paasiniaaffiginikuullugu.

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik peqataasunut qujarujussuarpoq akissarsitinneqartunullu pilluaqusilluni. Unammisitsinermut tulliuttumut suli peqataasoqarnerunissaa qilanaarutigaarput.

Annertunerusumik paasisaqarusunnermik saaffigineqarsinnaavoq Ujarassiooq Pele Tobiassen, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmi oqarasuaat +34 50 00 email pton@nanoq.gl