AtuartigukAalisarnermut inatsisissaq akuerineqarpoq
Nassiussisuuvoq: Aalisarnermut Piniarnermullu NaalakkersuisoqarfikInatsisartut aalisarnermut inatsit ullumi pingajussaaneerlugu oqallisigalugulu taasissutigaat. Inatsisissatut siunnersuut amerlanerussutilinnit isumaqatigineqarluni akuerineqarpoq.
Tamanna pillugu Aalisarnermut Piniarnermullu Naalakkersuisoq, Kim Kielsen ima oqaaseqarpoq:
“Kiisami! Suleqataasimasut tamarmik qujaffigerusuppakka. Soorunalimi kikkut tamarmik naammagisaannik iliortoqarsinnaanngilaq. Suliaq imaannaasimanngeqaaq. Taamaattorli nuannaarutigeqaara amerlanerussuteqartut akuersimmata, illuatungiliuttullu immersueqataammata qujaffigerusuppakka.
Suliassat assigiinngitsut aallartisarneqassapput oqarusuppungalu suleqatigiinnissaq maani inersuarmi pisariaqarmat,” Kim Kielsen ilaatigut oqarpoq nangillunilu.
“Aalisartut pisaminnik nalittorsaanissaminnut atortuminnilluunniit nutarterinissaminnut inatsisip akuerineqarnerata kingorna kiffaanngissuseqarnerulernissaat sinaakkuserneqarpoq”, Kim Kielsen oqarpoq.
Naalakkersuisooqatigiit Inuit Ataqatigiit Siumullu tunngaviusumik isumaqatigiissutaanni aalisarnermut inatsit naammassineqassasoq siunnerfiuvoq. Tamanna naammassineqarpoq.
Naalakkersuisut aalisartut taassuminngalu ingerlataqarlutik inuussutissarsiortut maanna atukkaminnit ajornerusumik atugaqarnissaat siunertarinngilaat, inatsisissamullu nalimmassarnissaat kissaatigaat.
Naalakkersuisut Siulittaasuat, Múte Bourup Egede, pisoq pillugu ima oqaaseqarpoq:
“Aalisakkanik pisuussutit inuiaqatigiit pigisarigaat Inatsisartutigut naqissuserneqarpoq. Tamanna tamatsinnut iluarisimaarnarpoq. Inatsit ukiorpassuarni naammassineqartarsimanngitsoq naammassivoq. Inatsisissap akuerineqarnissaa pingaaruteqarsimaqaaq. Inuussutissarsiortut aalisartullu ataasiakkaat maanna nalorniunnaarlutik siunissami qanoq nunamut namminerminnullu pissarsissutaalluartumik aningaasarsiussanerlutik pilersaarusiorsinnaanngorput”, Múte Bourup Egede oqarpoq nangillunilu:
“Inatsisartut piumasaat, ilaatigut tunitsiviit ammatiinnarnissaat, soorlu Aasianni kiisalu aalisartut piujuarnissaat qulakkiissallugu sulissaagut”.
Aalisarnermut inatsit nutaaq 2025-mi ukiup aallartinneranit atuutilissaaq.
Annertunerusunik paasisaqarusuttunut attavissat:
Naalakkersuisut Siulittaasuata allattaa, Niels Dorph, allatsit@nanoq.gl
Aalisarnermut Piniarnermullu Naalakkersuisoqarfik, apn@nanoq.gl