Pisunik naliliineq pingasunngornermi ulloq 3. januar 2024

Uummannap Sulluani annertunerusunik qaqqanik sisoortoqarnissaa imaluunniit tamatuma kingorna sumiiffinni inoqartuni navianartunik mallerujussuarnissaa qanittumi navianaateqartoq takuneqarsinnaanngitsoq, maannakkut nakkutiginninnermiit paasissutissat nalunaarsukkat tunngavigalugit paasissutissiissutigineqarsinnaavoq. Taamaattoq ilusiliaq1-imi 2-milu aappaluttumik nalunaaqutserneqarsimasuni, qaqqat sivinganertaanni ujaqqat nakkaanerat aammalu annikinnerusunik sisoortoqarsinnaanera ilimanaateqartorujussuuvoq. Qaqqat qajannartortallit qanitaanni angalaartoqarnissaa siunnersuuteqanngilaq suli navianaateqarsinnaammat.

Umiammakku Nunaanni aamma Kangerluarsummi qaqqat qajannartortaqartut ilaanni millimeterialunniit centimeteri tikillugu nikikkiartortoqartuaannartoq, nakkutiginninnerup takutippaa.

Nikikkiartuaarnerit takuneqartut taakkua matuma kinguliani nunap assingini sumiiffiit qalipaatilerlugit takutinneqarput: Sumiiffinni tungujortuni aalasoqarneranik nalunaarsuiffiusut takutinneqarput, aappaluttumik qalipaatilinni sumiiffiit 2023-mi decembarip ingerlanerani ujaqqanik sisoortunik arlalinnik nalunaarsuiffiusimasut nalunaaqutserneqarlutik. Sumiiffik qajannartortalik ataatsimik arlalinnilluunniit ataqatigiissunik sisoortoqartarpoq, assigiinngitsunik sukkassusilinnik ingerlaartunik.

'Umiammakku Nunaat 1'-imi (Ilusiliaq 1) sisoortut allersaanni sukkasuumik nikikkiartuaarnerit ujaqqallu nakkaaneri decembarimi ingerlaannarput. Taamaattoq nunap iluata qeriartuaarnera ilutigalugu decembarip qaammataata naajartulernerata tungaanut annikitsumik arriilliartortut takuneqarsinnaavoq.

Kangerluarsummi qaqqani qajannartortalinni suli nikikkiartuaartunik aalasoqartuaannarpoq, kisianni taakkua Umiammakku Nunaata eqqaani aalasuniit malunnaatilimmik annikinnerupput. Nikikkiartuaarnerit ataasiakkaanik ujaqqanik nakkaasoqartut qaqqat innartaasa qajannartortallit appasissortaanni takuneqarput (Ilusiliaq 2).

Ukiup nikinnera iluatsillugu matumuuna ukiumi qaqqat ilaanni nakkutigineqartuni aalasut ilusaat eqikkarpagut:

- Umiammakku 3-mi ukiumut nikinnerit annertunerpaartai 0.2-miit 12 m akornanniipput (Ilusiliaq 3). Sisoortut issunersaat qullerpaat ukiumut 0.2 m tikillugu annikitsuaraannarmik aalasoqartoq takutitsipput. Aalanerit annerpaartai sumiiffinni allerniittuni nalunaarsorneqarput, tamaani aalasut ukioq tamaat nalunaarsorsinnaanissaannut sukkavallaarlutik. Aasap qaammataasa ingerlaneranni sumiiffinni taakkunani ullormut nikinnerit 1 meteriusutut nalunaarsorneqarput.

- Umiammakku 1 aamma 2: Nikikkiartuaarnerit sukkanersai Umiammakku 1-ip appasinnerusortaani takuneqarput, 100 m missaanniittutut missiliorneqarlutik (Ilusiliaq 4). Umiammakku 1-ip qatsinnerusortaani nikikkiartuaartut agguaqatigiissillugu 1 meterit missaanniissimapput, Umiammakku 2-p kippasinnerusortaanituulli. Umiammakku 2-mi 2017-mi qaqqap sisoornerani unerarnerni nikikkiartuaarnerit ilaatigut annertoorujussuusut takuneqarpoq. Qaqqap sisoortup innartaani ukiup annertunerpaartaani ujaqqanik nakkaasoqartuaannartoq takuneqarsinnaavoq, taakkua ataani katersuullutik.

- Kangerluarsuk (Ilusiliaq 5): Sumiiffinni allerniittuni sukkasuumik sisoorfiusut 9 m missaannik ukiumut nikikkiartuaartut takutinneqarpoq, aammalu qaffasinnerujartornerani nikikkiartuaarnerit arriilliartorlutik. Kangerluarsummi qaqqat qajannartortallit qatsinnerusortaanni ukiumut 1 meterit missaanni nikikkiartuaartoqartoq takuneqarpoq.

Tullianik nalilersuinissaq pingasunngorneq ulloq 7. februar 2024 tamanut saqqummiunneqassaaq. Pisariaqalissappat, siusinnerusukkut paasissutissiissaagut.

Ilusiliaq 1. 2023-mi decembarip allartinneraniit Umiammakku Nunaanni aalasoqarnerinik ujaqqallu nakkaanerinik nalunaarsuinernut nunap assinga takussutissiaq.

Ilusiliaq 2. 2023-mi decembarip aallartinneraniit Kangerluarsummi aalasoqarnerinik ujaqqallu nakkaanerinik nalunaarsuinernut nunap assinga takussutissiaq.

Ilusiliaq 3. Umiammakku Nunaat 3-mi juli 2022 – juli 2023 akornanni ukiumut nikinnerit. Nikinnerit dronit atorlugit uuttortaanikkut naatsorsorneqarput. Aalasut annersai aappaluttut ukioq tamaat nalunaarsorsinnaanissaannut sukkavallaarput, kisianni aasap ingerlanerani sumiiffinni taakkunani ullormut 1 meteri tikillugu nikinnerit nalunaarsorneqarsinnaasimallutik.

Ilusiliaq 4. Umiammakku 1 & 2-mi ukiumut aalasoqarsimaneri, tassani nikinnerit annersai Umiammakku 1-ip appasissortaani aammalu qaqqap sisoornerani unerartut sumiiffiisa ilaanni nalunaarsorneqarsimallutik.

Ilusiliaq 5. Juli 2022 aamma juli 2023 akornanni dronit atorlugit paasissutissat nalunaarsukkat iluaqutsiullugit Kangerluarsummiit ukiumut nikinnerit takutinneqarput. Aappaluttunik nalunaaqutserneqarsimasuni takuneqarsinnaavoq ukiumut 9,2meter-imik nikittoqarsimasoq. Sungaartumik kipisajaartumik nalunaaqutserneqarsimasumi nikinnerit ataasiakkaat nuna qeriuaannartup aattarneranik peqquteqartut takuneqarsinnaapput.