Pinngortitaleriffimmi pisortaanermik atorfinitsitsineq

Josephine Nymand Pinngortitaleriffimmi pisortaaninngussaaq.

Klaus Nygaard atorfimmit tunuarniarluni aalajangermat, Josephine Nymand Pinngortitaleriffimmi pisortaaninngussasoq Naalakkersuisut aalajangerput. Massakkorpiaq Pinngortitaleriffimmi Avatangiisinut Immikkoortortaqarfimmi pisortatut atorfeqarpoq, 2014-mili tassani atorfeqarsimalluni. Aamma Ilisimatusarnermut Siunnersuisoqatigiinni siulittaasuuvoq. Josephine Nymandip Kalaallit Nunaanni Ilisimatusarnermut Siunnersuisoqatigiinniinnermini kalaallit ilisimatusarnerannik aallaaviliinissaq ingerlaavartumik sulissutigisimavaa, kiisalu nunani tamalaaniit ilisimatusarnerit Kalaallit Nunaanni ingerlanneqartut kalaallit ilisimatusarnikkut avatangiisaannut inuiaqatigiinnullu iluaqutaanissaat qulakkeerniarlugu sulissutigisimallugu.

Josephine Nymand biologitut ilinniarsimavoq aammalu Københavns Universitet-imiit ph.d.-qarluni. Josephine ukiorpassuarni ilisimatusarnermik suliaqarsimavoq, aqutsinerullu iluani aqutsisutut ilinniagaqarsimalluni.

“Josephine Nymand atorfinitsissinnaagatsigu nuannaarutigaara. Ilisimatusarnerup silarsuaani Kalaallit Nunaannilu ilisimaneqarluarpoq pikkorissuullunilu. Nukittuumik kiinnertarpoq, ukiorpassuarnilu aqutsisutut misilittagaqarluni, periusissiorfiusumik eqqarsartarluni aammalu angusassanik angusaqarnissamut pikkorissuulluni”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

“Tamatuma saniatigut Klaus Nygaard Pinngortitaleriffimmi inuiaqatigiinnilu sulisimaneranut qutsavigerusuppara, ukiut 30-t sinnerlugit atorfimmi atuussimaneranut”, Kalistat Lund oqarpoq.

Josephine Nymand 1. septembari 2023-mi atorfinissaaq.

Annertunerusumik paasissutissanik pissarserusuttunut saaffiginniffissaq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Natuk Lund Olsen,
oqarasuaat: +299 34 64 76, e-mail: natl@nanoq.gl